उद्याेग वाणिज्य महासङ्घकाे चुनावी सर्वेक्षण : दाेस्राे चरणमा जानेछ वरिष्ठ उपाध्यक्षकाे भिडन्त

उद्याेग वाणिज्य महासङ्घकाे चुनावी सर्वेक्षण : दाेस्राे चरणमा जानेछ वरिष्ठ उपाध्यक्षकाे भिडन्त

A+ A A-

नेपाल उद्योग वाणिज्य महासङ्घको ५७औँ साधारणसभाको दोस्रो दिन आज नयाँ नेतृत्वका लागि चुनाव हुँदैछ । बिहान ८ बजेदेखि देशभरबाट आएका महासङ्घका प्रतिनिधिले वरिष्ठ उपाध्यक्षसहित कार्यसमितिका सदस्यलाई मतदान गर्दैछन् । वरिष्ठ उपाध्यक्ष स्वतः अध्यक्ष हुने भएकोले नयाँ वर्षसँगै वरिष्ठ उपाध्यक्ष चन्द्र ढकाल अध्यक्ष हुनेछन् । केही कार्यसमिति सदस्यहरू निर्विरोध निर्वाचित भइसकेका छन् ।

महासङ्घको इतिहासमा पहिलोपटक तीन जना वरिष्ठ उपाध्यक्षका लागि उम्मेदवार भएकाले चुनावी माहौल निकै रोचक बनेको छ । अहिले वरिष्ठ उपाध्यक्षका लागि उमेशलाल श्रेष्ठ, अञ्जन श्रेष्ठ र रामचन्द्र संघाई प्रतिस्पर्धा गर्दैछन् । उमेशलाल श्रेष्ठको समूहबाट वस्तुगततर्फको उपाध्यक्षमा हेमराज ढकाल, एसोसिएटतर्फबाट भरत आचार्य र जिल्ला नगरतर्फबाट दिनेश श्रेष्ठ उम्मेदवार भएका छन् ।

महासङ्घको जिल्ला नगर उपाध्यक्षमा उमेशलाल श्रेष्ठको समूहबाट हाल जिल्ला, नगर उपाध्यक्ष रहेका दिनेश श्रेष्ठले दोहोरिन चाहेका कारण पुनः उम्मेदवारी परेको हो । दिनेश श्रेष्ठले संघाईको समूहका सुरकृष्ण वैद्य र अञ्जन श्रेष्ठ समूहका अरुणराज सुमार्गीसँग प्रतिस्पर्धा गर्नेछन् । अञ्जन श्रेष्ठको समूहबाट मनिषलाल प्रधान र संघाईको समूहबाट सकुन्तलाल हिराचन उम्मेदवार छन् । अनि, एसोसिएटतर्फ भने भरतराज आचार्य दुईवटा समूहको उम्मेदवार भएका छन् । उमेशलाल श्रेष्ठ र अञ्जन श्रेष्ठको समूहमा रहेका आचार्यले संघाई समूहका जोत्सना श्रेष्ठसँग प्रतिस्पर्धा गर्नेछन् ।

जोत्सनाले अञ्जन श्रेष्ठको समूह छोडेर संघाईको समूहका गएर उम्मेदवारी दिएकी हुन् । अञ्जन श्रेष्ठको समूहले प्रवलजंग पाण्डेलाई उम्मेदवार बनाउन लागेको थियो । तर, पाण्डेले उम्मेदवारी नदिने भएपछि अञ्जन श्रेष्ठ समूहले आचार्यलाई नै समर्थन गरेको हो । समूहगत प्रतिस्पर्धा भइरहेका बेलामा भावी अध्यक्ष तथा अहिलेका वरिष्ठ उपाध्यक्ष चन्द्र ढकालको ग्रिन सिग्नल कसलाई हुन्छ भन्नेले पनि उम्मेदवारीको पल्ला भारी पार्नेछ । चुनावी मैदानमा खटेका उद्योगी व्यवसायीहरूको भनाइमा ढकालले वरिष्ठ उपाध्यक्षमा उमेशलाल श्रेष्ठलाई ग्रिन सिग्नल दिएका छन् । तर, ढकालले अन्य उपाध्यक्षको हकमा सङ्केत गरिसकेका छैनन् ।

केही पूर्वअध्यक्षहरू पनि विभाजित भइसकेका छन् । पूर्वअध्यक्ष विनोदबहादुर श्रेष्ठ, चण्डिराज ढकाल र पूर्वउपाध्यक्ष भाष्कराज राजकर्णिकारहरू उमेशलाल श्रेष्ठको पक्षमा लागेका छन् । अर्का उम्मेदवार अञ्जन श्रेष्ठको हकमा आनन्द मुल्मीसहितको टिम सक्रिय छ । संघाईलाई भने मारवाडी समुदायले सहयोग गरिरहेको छ ।

महासङ्घमा मूलतः मारवाडी समुदायभन्दा नेवार समुदाय बलियो मानिन्छ । मारवाडी समुदायमध्ये अधिकांश पूर्वअध्यक्ष विनोद चौधरीले लगेर उद्योग परिसंघ गठन गरेका छन् । यही समुदायबाट पछिल्लोपटक पशुपति मुरारका अध्यक्ष भएका थिए । त्यसपछिको अध्यक्षको लाइनमा संघाई लागेका हुन् । भावी अध्यक्ष हुने सपनासहित संघाईले मतदातालाई आर्थिक रूपमा प्रभावमा पारेर भए पनि जित निकाल्ने प्रयासमा रहेका छन् ।

अघिल्लोपटक उपाध्यक्षमा यही सूत्रबाट जित निकालेका थिए । अघिल्लोपटक मतदातालाई आर्थिक प्रभावमा पार्ने सूत्र प्रयोग गरेर नै संघाईले बलियो ठानिएका सौरभ ज्योतिलाई पराजित गरेका थिए । चुनावी खर्चमा भन्दा पनि मतदातामा लगानी बढाएका संघाई पनि बलियो उम्मेदवार भएको प्रतिनिधिहरू बताउँछन् ।

नेवार समुदायको बाहुल्य भए पनि यो पटक दुई जना नेवार समुदायबाट उम्मेदवार छन् । त्यसमा पनि काठमाडौंबाहिरबाट अञ्जन श्रेष्ठ उम्मेदवार रहेका कारण उनले थप कडा मिहिनेत गर्नुपर्ने व्यवसायीहरूको भनाइ छ । उनलाई मुल्मीसहितको समूहले सहयोग गरिरहेको भए पनि उनको समूहकै उम्मेदवार जोत्सना श्रेष्ठले छोड्नु र प्रवलजंग पाण्डेले उम्मेदवार हुन नमान्नुले उनलाई केही सकस परेको महासङ्घका प्रतिनिधिहरूबीच चर्चा भइरहेको छ ।

उमेश अघि तर दोस्रो चरणकै सम्भावना

महासङ्घका मतदाताहरूबीच भएको एक सर्वेक्षणमा पहिलो चरणमा वरिष्ठ उपाध्यक्षको नतिजा निस्कने सम्भावना कम देखाएको छ । महासङ्घको इतिहासमै पहिलोपटक वरिष्ठ उपाध्यक्षमा तीन जना उम्मेदवार भएका कारण अहिले चुनाव बढ्ता पेचिलो बनेको हो । विधानतः उम्मेदवार चुनाव जित्नका लागि ५० प्रतिशत मत कटाउनुपर्ने हुन्छ । तर, अहिले तीन जना उम्मेदवारको तीव्र प्रतिस्पर्धाका कारण एक जना उम्मेदवारले ५० प्रतिशत ल्याउने सम्भावना कम रहेको देखिएको छ ।

शिलापत्रलाई प्राप्त एक आन्तरिक सर्वेक्षण अनुसार वरिष्ठ उपाध्यक्षमा उमेशलाल श्रेष्ठ बलियो देखिएका भए पनि उनले पनि ५० प्रतिशत मत प्राप्त गर्ने सम्भावना देखिएको छैन । महासङ्घका मतदाताहरूबीच भएको उक्त सर्वेक्षण अनुसार तीन जना उम्मेदवारमध्ये उमेशलाल श्रेष्ठले जिल्ला तथा नगरतर्फको मतदातामध्ये कोशीबाट १५, मधेसबाट ८, बागमतीबाट ९, गण्डकीबाट ४, लुम्बिनीबाट १२ र कर्णालीबाट ५ र सुदूरपश्चिमबाट ६ भोट पाउने आकलन गरिएको छ । उनलाई ५९ भोट आउने सम्भावना रहेको छ ।

त्यसैगरी, अर्का उम्मेदवार अञ्जन श्रेष्ठले कोशीबाट ७, मधेसबाट २, बागमती ५, गण्डकीबाट १० लुम्बिनीबाट ५, कर्णालीबाट २ र सुदूरपश्चिमबाट २ भोट पाउने आकलन गरिएको छ । उनलाई ३४ भोट आउने सम्भावना रहेको छ । अर्को उम्मेदवार रामचन्द्र संघाईलाई कोशीबाट ५, मधेसबाट ५, बागमतीबाट ४, गण्डकीबाट २ लुम्बिनीबाट ४, कर्णालीबाट ३ र सुदूरपश्चिमबाट ४ भोट आउने सम्भावना रहेको छ । जम्मा २७ प्रतिशत मत पाउने सम्भावना रहेको देखिएको छ ।

जिल्ला तथा नगरतर्फ कोशीमा २७, मधेस १५, बागमती १८, गण्डकी १६, लुम्बिनी २१ कर्णाली १० सुदूरपश्चिम ११ मत रहेका छन् ।

त्यसैगरी, एशोसिएटतर्फबाट वरिष्ठ उपाध्यक्षका उम्मेदवार उमेशलाल श्रेष्ठले ७ सय मत ल्याउने सम्भावना रहेको छ । अर्को उम्मेदवार अञ्जन श्रेष्ठले ३२५ मत पाउने सम्भावना पनि रहेको छ । त्यसैगरी, अर्को उम्मेदवार रामचन्द्र संघाईले ६३५ मत पाउने सम्भावना रहेको सर्वेक्षणमा पाइएको छ ।

तीनै जनाले पाउने मत कुल मतको ५० प्रतिशत नपुग्ने भएका कारण दोस्रो चरणमा प्रवेश गर्ने सर्वेक्षणले देखाएको छ । तर, अहिले तीनै उम्मेदवार दोस्रो चरणमा चुनावलाई प्रवेश हुन नदिने प्रयासमा रहेका छन् ।

प्रतिस्पर्धाबाट बाहिरिने एक जना उम्मेदवारले दोस्रो चरणको चुनावमा कुन उम्मेदवारलाई समर्थन गर्छन्, उसैको पल्ला भारी हुने भएकाले मतदानअघि नै डिल गर्ने प्रयासमा पनि उम्मेदवार देखिएका छन् ।

त्यसका लागि उपाध्यक्षहरूमध्ये कसलाई जिताउने वा हराउने भन्ने रणनीति पनि बन्न थालेको छ । अहिले नै वरिष्ठ उपाध्यक्षका दुई उम्मेदवारबीच दोस्रो चरणमा सहयोग आदानप्रदान गर्ने सहमति भएमा एक अर्काबाट मिश्रित चुनावी नतिजा आउन सक्ने चर्चा प्रतिनिधिहरूबीच भइरहेको छ ।

प्रकाशित मिति: बुधबार, चैत २९, २०७९ ०७:५५