उत्कृष्ट सिनेमा २०७९ : दर्शकलाई हलसम्म तानेको 'छक्का पञ्जा ४'

A+ A A-

फिल्म 'कबड्डी ४' शिलापत्र वर्षसिनेमा २०७९ अन्तर्गत उत्कृष्ट पाँचभित्र परेकाे छ । विधाविज्ञको रायका आधारमा मनोनयन र सातै प्रदेशका १० हजारभन्दा बढी सर्वसाधारणको मतका आधारमा फिल्म उत्कृष्ट पाँचमा परेकाे हाे । सर्वेक्षणमा यो फिल्मले ३५ दशमलव ७ प्रतिशत मत पाएको छ । मनोनयनमा परेका १० फिल्ममध्ये यो तेस्राे सबैभन्दा बढी मत हो । मनोनयन र छनोट प्रक्रियाको विस्तृत विवरण शिलापत्रले केही दिनमा सार्वजनिक गर्नेछ ।

०००

वर्ष २०७९ का सफल सिक्वेल फिल्ममध्ये एक हो छक्का पञ्जा ४ । कमेडी जनराको फिल्मबाट दर्शकलाई हलसम्म तान्न सिपालु दीपकराज गिरीको टिम छक्का पञ्जा ४ मा पूर्णतः सफल देखिएको छ ।

व्यापार राम्रो गरे पनि कथाका हिसाबले फिल्मले राम्रो प्रतिक्रिया पाउन सकेन । हुन त छक्का पञ्जाका अघिल्ला सिरिजले पनि राम्रो समीक्षा पाएका थिएनन् । तर, फिल्म लागेपछि हल भरिभराउ हुने गरेको छ ।

विकृत राजनीति, नातावाद, कर्मचारीतन्त्रलाई व्यङ्ग्य गरेको फिल्मले नेपाली समाजमा बढ्दो पपुलिस्ट चरित्र, युट्युबकारिता, साइबरसेनालगायत विषयलाई समेट्न खोजेको छ । तर, यसलाई हल्काफुल्का रूपमै समेटिएको छ, गहिराइसम्म पुगेको छैन । फिल्मले कथाभन्दा पनि मनाेरञ्जनमै जाेड गरेकाे छ ।

छक्का पञ्जा ४ पनि २०७९ सालमा रिलिज भएका फिल्ममध्ये ५१औँ दिन मनाउने बाटोमा छ । फिल्मका लेखक, निर्माता तथा कलाकार दीपकराज गिरी नै हुन् । छक्का पञ्जा ४ लाई हेमराज बीसीले निर्देशन गरेका हुन् । फिल्ममा केदार घिमिरे, बुद्धि तामाङ, निर्मल शर्मा, बेनिशा हमाल, रमेश बुढाथोकी, नीर शाह, राज आचार्य, शिशिर बाङ्देल, मलिना जोशीलगायतको अभिनय छ ।

गहन कथा र चुस्त प्रस्तुतितिर नेपाली सिनेमाहरू अघि बढ्दै गरेको देखिन्छ । तर, अहिले दर्शकलाई हलसम्म तान्न सक्ने फिल्म पनि चाहिएको छ । यसको पुर्ताल गर्न छक्का पञ्जा ४ सफल देखिन्छ । दर्शकको रुचिको हिसाबले फिल्म बनाउन माहिर दीपकराज गिरीको टिमले छक्का ५ ल्याउने संकेत पनि गरिसकेको छ ।

प्रकाशित मिति: मंगलबार, चैत २८, २०७९ १५:३०