उत्कृष्ट सिनेमा २०७९ः नेपाली स्वादकाे 'प्रकाश'

A+ A A-

'प्रकाश' फिल्म शिलापत्र वर्षसिनेमा २०७९ अन्तर्गत उत्कृष्ट पाँचभित्र अटाएकाे छ । विधाविज्ञको रायका आधारमा मनोनयन र सातै प्रदेशका १० हजारभन्दा बढी सर्वसाधारणको मतका आधारमा फिल्म उत्कृष्ट पाँचमा चुनिएकाे हाे । सर्वेक्षणमा यो फिल्मले २८ दशमलव १ प्रतिशत मत पाएको छ । मनोनयन र छनोट प्रक्रियाको विस्तृत विवरण शिलापत्रले केही दिनमा सार्वजनिक गर्नेछ ।

०००

कर्णालीको परिवेश र कथामा आधारित फिल्म ‘प्रकाश’ जुम्लामा खिचिएको हो । निम्न वर्गको युवाले देखेको सपना पूरा गर्न उसले गर्नुपरेको संघर्ष फिल्मले देखाएको छ । कर्णाली भूगोल र पिछडिएको वर्गको कथा भन्न खोज्ने फिल्मको उद्देश्य सही लाग्छ । तर, केही कमजोरीले यसलाई फिक्का बनाएको छ । फिल्ममा लेखकीय अलमल र सुझबुझको अभाव देखिन्छ ।

आरक्षण र जातीय हाइरार्कीको कुरा उठाउन खोजिएको छ । विषयका हिसाबले यसलाई नराम्रो मान्न सकिँदैन । तर यसको सन्देश, समाधानमा भने फिल्म चुकेको छ । फिल्मले आरक्षण गलत छ भन्ने भाष्य निर्माण गर्न खोजेको देखिन्छ भने कम्युनिस्ट विचारधारा गलत हो भन्ने तर्कलाई समर्थन गर्छ । फिल्मले यसो भन्नै नपाइने भन्ने हुँदैन तर एकतर्फी मात्र भनियो भने त्यो फिल्म होइन, प्रोपोगाण्डा हुन्छ ।

फिल्ममा प्रदीप खड्का, दिया मास्के प्रकाश घिमिरे, राजन खतिवडालगायत कलाकारको अभिनय छ । दिनेश राउतको निर्देशन रहेको फिल्ममा राजेश श्रेष्ठको छायाङ्कन, जीवन थापाको सम्पादन, सुवास भुसाल, दीपक शर्मा, ताराप्रकाश लिम्बू र एलिस कार्कीको संगीत रहेको छ भने फिल्मका निर्माता महेन्द्र अधिकारी हुन् ।

मुख्य विषयमा कमजोरीयुक्त भए पनि फिल्म ‘प्रकाश’ मौलिक स्वादमा छ । यसले अभिनेता प्रदीप खड्कालाई फरक अवतारमा उतारेको छ । उनको मिहिनेत पनि सानोतिनो देखिँदैन । मौलिक शैलीको फिल्म भएकाले ‘प्रकाश’लाई हामीले मनोनयनमा राखेका थियौँ, मतका आधारमा याे फिल्म उत्कृष्ट ५ मै अटाएकाे छ ।

प्रकाशित मिति: मंगलबार, चैत २८, २०७९ १५:२९