उत्कृष्ट सिनेमा २०७९ः चाेटिलाे कथा भन्ने 'महापुरुष'

A+ A A-

फिल्म ‘महापुरुष’ शिलापत्र वर्षसिनेमा २०७९ अन्तर्गत उत्कृष्ट पाँचभित्र परेकाे छ । विधाविज्ञको रायका आधारमा मनोनयन र सातै प्रदेशका १० हजारभन्दा बढी सर्वसाधारणको मतका आधारमा फिल्म उत्कृष्ट पाँचमा चुनिएकाे हाे । सर्वेक्षणमा यो फिल्मले ३५ दशमलव ८ प्रतिशत मत पाएको छ । मनोनयन र छनोट प्रक्रियाको विस्तृत विवरण शिलापत्रले केही दिनमा सार्वजनिक गर्नेछ ।

०००

फिल्म ‘महापुरुष’ एकल पुरुषको कथामा आधारित छ । साल २०७९ मा ५१ दिन मनाउन सफल यो फिल्मले उठाएको विषय गहन छ । समाजमा खासै वास्ता नगरिएको एकल पुरुषको मानसिक पक्षलाई फिल्मले बोल्न खोजेको छ । तर, प्रस्तुति र निचोडलाई लिएर यसले खासै उत्साहित समीक्षा पाउन सकेन ।

आदर्शनगरमा बस्ने ‘आदर्श पुरुष’ बालकृष्ण क्षेत्री (हरिवंश आचार्य) र उनका दुई छोरा विदुर (रवीन्द्रसिंह बानियाँ) र विज्ञान (अरुण क्षेत्री) को वरिपरि छ महापुरुषको कथा । अवकाशप्राप्त शिक्षक बालकृष्ण समाजले समेत आदर्श मान्ने पात्रका रूपमा छन् भने दुई छोरा उनको आदर्श भजाएर लाभ लिन चाहन्छन् ।

कथा अघि बढ्दै जाँदा बालकृष्णको जीवनमा गौरी मल्लको प्रवेश हुन्छ । त्यसपछि उनको भावभङ्गी अनि लवाइखुवाइ नै बदलिन्छ । उनी प्रेममा पर्छन् ।

बुबाको आदर्श भजाएर भविष्य बनाऊँला भन्न्ने सोचेका छोराहरूले ‘बाउको बिहे’ देख्नुपर्ने दिन आइलाग्छ । आफैँ बिहे गरेर अस्ट्रेलिया छिर्न लागेको कान्छो छोरा बुबाको बिहे हेर्न तयार होला त ? अनि बुबाको आदर्श भजाएर भविष्य बनाउँछु भन्ठान्ने जेठो छोराले बुबा ‘आदर्शच्यूत’ भएको हेर्न सक्ला ? यस्तै प्रश्नहरू उब्जाएर फिल्म सकिन्छ ।

महापुरुषले एकल पुरुषको मानसिक समस्यालाई उठाएको छ, जुन तारिफयोग्य छ । तर, यसको समाधान असाध्यै हल्का लाग्छ । मानसिक समस्यासँग जुधिरहेको पुरुषले महिलालाई भेटेपछि ठीक भएको देखाएर अन्त्यन्तै सामान्य तरिकाले अन्त्य गरिएको छ । समीक्षकहरूका अनुसार कथाको हिसाबले यसलाई अलि बढी अंक दिन सकिन्छ । तर कथा भन्न चाहिने आधारभूमि भने कमजोर छ ।

प्रदीप भट्टराईले फिल्म ‘जात्रा’बाट नयाँ कथा, नयाँ परिवेश, नयाँ चरित्रहरू देखाएकाले त्यहीअनुसार अपेक्षा हुन्छ । तर, यस्तो अपेक्षा गर्नेलाई यो फिल्मले तृप्त पार्न सक्दैन । जे होस्, फिल्म महापुरुषले कमसेकम नयाँ र फरक विषयमाथि कथा भन्ने प्रयासचाहिँ गरेको छ ।

प्रदीप भट्टराईको लेखन तथा निर्देशनमा बनेको फिल्मलाई रवीन्द्रसिंह बानियाँ, म्याक्स दीपेश खत्रीले निर्माण गरेका हुन् । दीपक वज्राचार्यको छायाकंन, मित्र गुरुङको सम्पादन रहेको फिल्ममा मदनकृष्ण श्रेष्ठ, हरिवंश आचार्य, राजाराम पौडेल, गौरी मल्ल, अरुण क्षेत्री, अञ्जना बराइली आदि कलाकारको अभिनय छ । फिल्म २०७९ कात्तिक ११ गतेबाट प्रदर्शनमा आएको थियो ।

शिलापत्र वर्षसिनेमा २०७९ अन्तर्गत उत्कृष्ट पाँचभित्र पार्न पाठकहरूले यो फिल्मलाई तेस्रो सबैभन्दा बढी मत दिएका छन् ।

प्रकाशित मिति: मंगलबार, चैत २८, २०७९ १५:२८