उत्कृष्ट सिनेमा २०७९ः नेपाली स्वादमा मनाेरञ्जन दिने कबड्डी ४

A+ A A-

२०७९ सालभर प्रदर्शनमा आएका फिल्ममध्ये 'कबड्डी ४' शिलापत्र वर्षसिनेमाअन्तर्गत उत्कृष्ट पाँचभित्र परेकाे छ । विधाविज्ञको रायका आधारमा मनोनयन र सातै प्रदेशका १० हजारभन्दा बढी सर्वसाधारणको मतका आधारमा फिल्म उत्कृष्ट पाँचमा परेकाे हाे । सर्वेक्षणमा यो फिल्मले सर्वाधिक ५१ दशमलव २ प्रतिशत मत पाएको छ । मनोनयनमा परेका १० फिल्ममध्ये यो नै सबैभन्दा बढी मत हो । मनोनयन र छनोट प्रक्रियाको विस्तृत विवरण शिलापत्रले केही दिनमा सार्वजनिक गर्नेछ ।

०००

साल २०७९ मा ‘सिक्वेल’ फिल्मको दबदबा रह्यो । सुरुवात कबड्डीको अन्तिम सिक्वेल कबड्डी ४ ले गर्‍यो । नेपाली स्वादमा मनोरञ्जन दिने यो फिल्मलाई दर्शकले अत्यधिक रुचाए । त्यसैले कीर्तिमानी कमाइ गर्न यो फिल्म सफल रह्यो ।

कोभिडपछाडि नेपाली फिल्म उद्योगलाई लयमा फर्किन निकै मुस्किल परिरहेको थियो । त्यसपछि दक्षिण भारतीय सिनेमाको चर्काे हल्लामा बलिउड नै छायामा पर्दै गएजस्तो देखिएको बेला नेपाली सिनेमालाई अप्ठेरो नपर्ने कुरै भएन । यही समयमा हिट भएर कबड्डी ४ ले सिनेकर्मीमा आशा जगाइदियो र साबित गरिदियो, फिल्म राम्रो बनाएमा निर्माताले हलिउड र बलिउडसँग तर्सिनुपर्दैन ।

विगतदेखि नै कबड्डीको कथा फरक छ । त्यसैले पनि दर्शक तान्न फिल्म सफल रह्यो । कबड्डीका यसअघिका तीनै शृंखलाजस्तै यो पनि पूरा रमाइलो अनि कथानकको उतारचढावले युक्त छ । फिल्ममा बमकाजी र वीरकाजी चरित्र पात्र छन् । अघिल्ला तीन सिरिजमा वीरकाजीको बिहे नहुँदा दर्शकको चासो वीरकाजीको बिहेमै अल्झेको थियो । कबड्डी ४ मा दयाहाङ राई, सौगात मल्ल, मिरुना मगर, बुद्धि तामाङ, विजय बराललगायतका कलाकारको मुख्य अभिनय छ ।

कबड्डी ब्रान्डको फाइनल म्याच रहे पनि फिल्मले फरक स्वादचाहिँ दिन सकेन । उही कथा र उस्तै पात्रमा पनि दर्शक रिझाइराख्ने फिल्म बनाउन सक्नु निर्देशक रामबाबु गुरुङको खुबी हो । वर्ष २०७९ मा रिलिज भएका फिल्ममध्ये पहिलोपटक ५१ दिन मनाउने कबड्डी ४ नै हो ।

यो फिल्मको खास विशेषता भनेको मौलिकता हो । मनोरञ्जन पनि यसले नेपाली स्वादमा दिन्छ । गाउँघरमा प्रयोग गरिने भाषा र शैलीलाई उस्तै तरिकाले प्रस्तुत गरेकाले पनि दर्शकलाई फिल्मको कथामा आफैँ छुजस्तो बनाउँछ । तर, कलात्मकताचाहिँ कबड्डी ४ मा यसअघिका सिक्वेलभन्दा नयाँ छैन । कलाकार पनि प्राय: उही, अभिनय पनि उस्तै छ । एजेन्डा पनि नयाँ ल्याएको देखिएन ।

निर्देशकको दायित्व मनोरञ्जनात्मक बनाउने मात्रै होइन, फिल्ममा नयाँ पात्र स्थापित गराउँदै लैजाने पनि हो । यसमा लेखक र निर्देशकले प्रयत्न गरेको देखिँदैन । सिक्वेल भएकाले हुन सक्छ, निर्देशकले पुरानो कबड्डीभन्दा पर गएर सोचेनन् । जे होस्, मनमोहक दृश्य, संवादैपिच्छे हास्यचेतना, अनि त्यसैमा घोलिएर आएको सामाजिक सन्देश सिक्वेलको राम्रो पक्ष हो । कबड्डीको खास शक्ति पनि यही हो । फिल्मका लेखक रामबाबु गुरुङ र उपेन्द्र सुब्बा हुन् । शैलेन्द्र डी कार्कीको छायांकन रहेको फिल्मलाई निमेष श्रेष्ठले सम्पादन गरेका हुन् ।

प्रकाशित मिति: मंगलबार, चैत २८, २०७९ १५:२७