मधेशमा यो वर्ष पाठ्यपुस्तकको अभाव नहुने, शैक्षिकसत्र सुरु हुनुअगावै ८० प्रतिशत पुस्तक आइपुगे

मधेशमा यो वर्ष पाठ्यपुस्तकको अभाव नहुने, शैक्षिकसत्र सुरु हुनुअगावै ८० प्रतिशत पुस्तक आइपुगे

A+ A A-

विगतका वर्षहरूमा समयमा पाठयपुस्तकहरू नआउँदा विद्यार्थीहरूको पठनपाठन प्रभावित हुँदै आएको थियो । तर यस वर्ष शैक्षिकसत्र सुरु हुनुअगावै पाठ्यपुस्तकहरू आएकाले यसपालि मधेश प्रदेशमा विद्यार्थीहरूले समयमै पुस्तक पाउने भएका छन् ।

जनक शिक्षा सामग्री केन्द्र लिमिटेड प्रादेशिक कार्यालय जनकपुरधामले शैक्षिकसत्र सुरु हुनु एक महिनाअगाडि नै ८० प्रतिशत पाठ्यपुस्तकहरू आइसकेका छन् भने बाँकी २० प्रतिशत पुस्तकहरू आउने क्रममा रहेको जनाएको छ । जनक शिक्षा सामग्री केन्द्र लिमिटेड प्रादेशिक कार्यालय जनकपुरधामका प्रमुख रुद्र खनालले विगतका वर्षहरूजस्तो चालु आर्थिक वर्षमा पाठ्यपुस्तकको अभाव नहुने दाबी गरे ।

उनले भने, ‘पुस्तकले हाम्रा गोदामहरू भरिएका छन् । गोदाम खाली भएलगत्तै थप पुस्तक ढुवानी गरी जनकपुर ल्याइनेछ ।’ जनक शिक्षा प्रादेशिक कार्यालय जनकपुरले धनुषा, महोत्तरी, सर्लाही, सिरहा, सिन्धुली, सप्तरी, उदयपुर, ओखलढुङ्गा र खोटाङ जिल्लामा पाठ्यपुस्तक बिक्रीवितरण गर्दै आएको छ । यी जिल्लामाहरूमा ७९ वटा डिलरमार्फत पाठ्यपुस्तकको बिक्रीवितरण हुँदै आएको खनालले बताए । कार्यालयले ६ देखि १२ कक्षासम्मको पाठ्यपुस्तक बिक्री गर्दा डिलरलाई ९ प्रतिशत छुटमा उपलब्ध गराउँदै आएको उनले बताए ।

चालु आर्थिक वर्षमा १७ करोड मूल्यबराबरका १५ लाख ३५ हजार पाठ्यपुस्तक बिक्री गर्ने लक्ष्य लिएको सो कार्यालयका लेखापाल रमेश यादवले बताए । अघिल्लो वर्ष कार्यालयले ७ करोड ७० लाख ८६ हजार ८ सय ६ रुपैयाँ मूल्यबराबरका १६ लाख ६४ हजार ४ सय ८७ थान पाठ्यपुस्तक बिक्री गरेको थियो ।

अघिल्लो वर्षको तुलनामा चालु आर्थिक शैक्षिक सत्रमा १० प्रतिशतभन्दा बढी पाठ्यपुस्तक बिक्री गर्ने लक्ष्य लिएको प्रमुख खनालले बताए । कक्षा ८ र कक्षा १० को पाठ्यपुस्तक परिमार्जन भएको र जनसंख्या र आर्थिक वृद्धिदर बढ्दै गएकाले पाठ्यपुस्तकको बिक्री बढ्न सक्ने उनले बताए । उनले भने, ‘यसअघि कक्षा ८ मा १० वटा पुस्तक थिए । तर, अहिले कक्षा ८ मा आठवटा मात्रै पुस्तक रहेका छन् ।’ विगतका वर्षभन्दा यस शैक्षिक वर्षमा पुस्तकको मूल्यसमेत घटेको उनले बताए ।