जुगल शृंखलाका पाँच नयाँ हिमाल आरोहणका लागि खुला गर्ने तयारी

A+ A A-

सरकारले काठमाडौंबाट नजिक पर्ने जुगल हिमाल शृंखलाका पाँचवटा नयाँ हिमाल आरोहणका लागि खुला गर्ने भएको छ । संस्कृति, पर्यटन तथा नागरिक उडड्यन मन्त्रालयको प्रस्तावमा ती हिमाल आरोहणका लागि खुला गर्ने भएको हो । हिमाल खुला गर्नका लागि मन्त्रालयले प्रस्ताव मन्त्रिपरिषद्‌मा लगिसकेको छ ।

पर्यटन विभागका महानिर्देशक होमप्रसाद लुइँटेलका अनुसार जुगल हिमाली शृंखलाका पाँचवटा हिमाल खुला गर्न लागिएको हो । शिलापत्रसँगको कुराकानीमा लुइँटेलले भने, ‘हामीले ती हिमालको नाम भने जुगल–१, जुगल–२, जुगल–३, जुगल–४ र जुगल–५ भनेर राखेका छौँ ।’

सिन्धुपाञ्चोकमा पर्ने जुगल हिमाल काठमाडौंबाट नजिकमा पर्ने हिमाल हो । २०७५ मा जुगल हिमालको पहिलोपटक सफल आरोहण भएको थियो । ६ हजार १ सय ५१ मिटर उचाइको ग्याल्जेन चुचुरोको प्रथम पटक सफल आरोहण भएको हो । ग्याल्जेन पिकसहित जुगल शृङ्खलामा ११ वटा चुचुराहरू पर्छन् । उक्त हिमालको समावेशी सगरमाथा आरोही माया गुरुङ, शर्मिला थापा र मिलन लामाले मंगलबार आरोहण गरेको थिए । यो हिमशृङ्खलामा हालसम्म पहिचान भएका ११ चुचुरामध्ये ६ हजार २५६ मिटरदेखि ६ हजार ९६६ मिटर उचाइका आठ चुचुरा छन् ।

२०७० कात्तिकमा नेपाल पर्वतरोहण संघ (एनएमए)ले खुला गर्न सकिने हिमालको संख्या मन्त्रालयमा बुझाएको थियो । मन्त्रालयले एनएमएसँग खुला गर्न सकिने हिमालको सूची मागेपछि पूर्वअध्यक्ष आङछिरिङ शेर्पाको नेतृत्वमा सुझाव कमिटी गठन गरे हिमालको सूची बुझाएको थियो । उक्त सूची अनुसार नेपालमा १ हजार ७ सय ९२ वटा हिमाल आरोहणका लागि खुला गर्न सकिन्छ ।

अहिलेसम्म ४ सय ३ वटा हिमाल खुला गरिएको छ । आरोहणका लागि खुला गर्न बाँकी १ हजार ३ सय ८९ हिमाल रहेको शेर्पाले जानकारी दिए । शेर्पाले शिलापत्रलाई दिएको जानकारीअनुसार हिमाल खुला गर्दा चीन र भारतसँग सीमा जोडिएका क्षेत्रका हिमाललाई पहिलो चरणमा प्राथमिकता दिनुपर्ने सुझाव पनि दिइएको थियो । त्यसेबला हिमाल आरोहणबाट हुने आम्दानीमध्ये ३० प्रतिशत स्थानीय सरकारलाई दिनुपर्ने पनि सुझाव दिएको थियो ।