नेउवामकाे वरिष्ठ उपाध्यक्षमा तीन जना भिड्दै, चन्द्र ढकालकाे समर्थन कसलाई ?

A+ A A-

नेपाल उद्योग वाणिज्य महासङ्घको इतिहासमा पहिलो पटक वरिष्ठ उपाध्यक्षमा तीन जना उम्मेदवार भएका छन् । निजी व्यवसायीहरूको छाता संस्था महासङ्घमा वरिष्ठ उपाध्यक्षका लागि उमेशलाल श्रेष्ठ, रामचन्द्र संघाई र अञ्जन श्रेष्ठ उम्मेदवार छन् ।

यसअघि वरिष्ठ उपाध्यक्षमा दुई जना हुने गरेका थिए । महासङ्घमा तीन जना हस्तीले तीनवटा धारलाई समातेका छन् । राजनीतिक रूपमा उनीहरू विभाजित भएर उम्मेदवार भएको पनि देखिएको छ । वरिष्ठ उपाध्यक्षका उम्मेदवार उमेशलाल श्रेष्ठ एमालेनिकट मानिन्छन् । एमाले नेतृ साहना प्रधानका छोरा श्रेष्ठलाई राजनीतिक रूपमा एमालेनिकट भनेर चिनिन्छ । सोही कारण अहिले पनि उनीमाथि वामपन्थी पक्षधरहरूको समर्थन रहेको चर्चा भइरहेको छ ।

महासङ्घका प्रतिनिधिहरूबीच यो चर्चा भइरहेका बेला अञ्जन श्रेष्ठ र संघाईलाई भने कांग्रेसनिकट भनेर विश्लेषण भइरहेको छ । कांग्रेसमा देखिएको दुई धार अहिले उनीहरूबीचमा पनि देखिएको चर्चा भइरहेकाे छ । अञ्जन श्रेष्ठलाई कांग्रेसभित्र पनि शेखर कोइराला र गगन थापा समूहको व्यवसायीको रूपमा टिप्पणी भइरहेको छ ।

पोखराका व्यवसायी श्रेष्ठलाई कांग्रेसको कोइराला–थापा समूहको निकट भनेर व्याख्या भइरहेका बेला संघाई भने कांग्रेसको संस्थापन पक्षनिकट मानिन्छन् । संघाई सभापति शेरबहादुर देउवापत्नी तथा कांग्रेस केन्द्रीय सदस्य आरजु रााणानिकट मानिएको छ । त्यसैले, अहिले महासङ्घको वरिष्ठ उपाध्यक्षमा व्यवसायीभन्दा बढ्ता दलीय प्रतिस्पर्धा हुन लागेको चर्चा भइरहेको छ ।

वरिष्ठ उपाध्यक्ष अर्कोपटक स्वतः अध्यक्ष हुने भएकोले पनि उनीहरूले चुनावलाई प्रतिष्ठाको विषय बनाएका छन् । अहिलेका वरिष्ठ उपाध्यक्ष तथा भावी अध्यक्ष चन्द्रप्रसाद ढकाल भने सहमति गराउने प्रयासमा छन् । उनीहरूसँग छलफलसमेत भएको छ । तर, सहमति जुट्ने सम्भावना भने देखिएको छैन । भावी अध्यक्ष ढकालले कसलाई समर्थन गर्छन् त्यसले पनि उम्मेदवारी प्रभावित हुने देखिएकाे छ ।