व्यवसायीको हकहितका पक्षमा निरन्तर काम गर्छु ः संघई

A+ A A-

उद्योग वाणिज्य महासंघको निर्वाचन नजिकिइसकेको छ । चैत २८, २९ र ३० गते काठमाडौंमा हुने साधारणसभा तथा निर्वाचनका लागि विभिन्न पदका आकांक्षीहरू दौडधुप गरिरहेका छन् । योपटक त्रिपक्षीय प्रतिस्पर्धा भएका कारण पनि निर्वाचन रोचक हुने देखिन्छ । अहिले वरिष्ठ उपाध्यक्षमा निर्वाचित हुने व्यक्ति स्वत: अर्काे कार्यकालमा अध्यक्ष हुने भएकाले मुख्य प्रतिस्पर्धा वरिष्ठ उपाध्यक्षमै छ ।

उद्योगी तथा व्यवसायी रामचन्द्र संघई महासंघको वरिष्ठ उपाध्यक्षका आकांक्षी हुन् । वर्षौंदेखि महासंघका विभिन्न जिम्मेवारीमा रहेर काम गरिसकेका संघईले वरिष्ठ उपाध्यक्षको रूपमा आफूलाई अघि सार्नुको उद्देश्य, नेतृत्वमा पुगेपछिको योजनालगायतका विषयमा शिलापत्रका सुधिर भण्डारीले संघईसँग गरेको कुराकानीको सम्पादित अंशः

नेपाल उद्योग वाणिज्य महासंघको वरिष्ठ उपाध्यक्षमा तपाईंको उम्मेदवारी किन ?

नेपाल उद्योग वाणिज्य महासंघको विरासतलाई अझ उचो राख्न तथा मुलुकभर उद्यम व्यवसायको विस्तार र संरक्षणमा योगदान गर्न थप सक्षम बनाउन नै मैले वरिष्ठ उपाध्यक्षमा उम्मेदवारी दिएको हुँ । मेरा स्पष्ट तीनवटा एजेण्डा छन् । त्यसलाई समेटेर मैले प्रतिवद्धता पत्रसमेत सार्वजनिक गरिसकेको छु ।

संगठनात्मक सुधार र समन्वय, सरकारसँग उद्योगी व्यवसायीका समस्या समाधानको पहल तथा आर्थिक विकास र अर्थतन्त्र सुधार मेरा एजेण्डा हुन् । यी नै एजेण्डामा केन्द्रित रहेर भिजन सन २०३० को प्रतिवद्धता पूरा गर्ने हाे ।

नेपाल उद्योग वाणिज्य महासंघको साख अझै उचो राख्ने, जिल्ला नगर उद्योग वाणिज्य संघहरूलाई सक्षम र सबलीकरण गर्ने, नेपालमा उद्योगमैत्री वातावरणको निर्माण, व्यवसायीका हकहितका विषयवस्तु, नीति निर्माणमा गरिने पैरवी, नेपालमा उद्यमशीलताको विकास र विस्तारको वातावरण निर्माण, वैदेशिक लगानी भित्र्याउने वातावरणको निर्माणजस्ता विषयहरू नै मेरो प्राथमिकताका विषय रहने छन् । यसकै लागि म वरिष्ठ उपाध्यक्षको उम्मेदवार बनेको हो ।

निर्वाचन नजिक आइसक्यो तयारी कस्तो छ ?

तयारी त चलिरहेको छ नि । साथीहरूसँग भेटघाट, छलफल र टेलिफोन कुराकानीमा म त धेरै नै व्यस्त छु । तपाईंहरू मिडियाका साथीहरूले पनि कुराकानी गर्न खोज्नुहुन्छ, त्यो पनि सकेसम्म गरिरहेकै छु ।

यसपालीको निर्वाचनमा त्रिपक्षीय भिडन्त हुने देखिएको छ, यसले निर्वाचनलाई कत्तिको रोचक बनाउला ?

रोचक यस अर्थमा हुँदैछ कि अहिलेसम्म महासंघमा यस्तो त्रिपक्षीय प्रतिस्पर्धा भएको थिएन । तर पनि लोकतन्त्रको अभ्यास हो । स्वस्थ र मित्रवत् प्रतिस्पर्धाका आधारमा अघि बढौं भन्ने मेरो भनाइ हो ।

तपाईं र अरु उम्मेदवारमा फरक के छ ?

फरक त हेर्नोस् हरेक मानिसको आनिबानी संस्कार संस्कृति सबै त फरक हुन्छ । हामी वरिष्ठ उपाध्यक्षका तीनैजना उम्मेदवार त फरक नै छौँ । तर महासंघमा काम गरेकै अनुहार हौं । आपसी सम्वन्ध र मित्रता पनि छ । तर चुनावी प्रतिस्पर्धालाइ त सहजै मान्नुपर्‍यो नि होइन र ?

तपाईंको जितको आधार के हो ?

महासंघमा मेरो निरन्तरको लगाव, उद्यमी व्यवसायीको सद्भाव एवं समर्थन र इमानदारिता नै मेरो जितका आधार हुन् ।

जिल्ला नगरका साना तथा मझौला उद्यमीहरूको के प्रतिक्रिया पाउनुभएको छ ?

सबै साथीहरूको सकारात्मक प्रतिक्रिया नै पाएको छु । अघि बढ्नोस्, तपाइलाईं हाम्रो साथ सहयोग रहने छ भन्ने हौसला पाएको छु । म त उहाहरूसँगको कुराकानी र भेटघाटवाट निक्कै उत्साहित भएको छु ।

मुलुकलाई आर्थिक संकटबाट निकाल्न के गर्नुपर्ला ?

सरकार र निजीक्षेत्रबीच सहकार्य र हातेमालो जरुरी छ । सकारात्मक सोचका साथ व्यवहारिक र नीतिगत समस्याको समाधान खोज्ने हो भने अर्थतन्त्रलाई लयमा फर्काउन सकिन्छ । यतिबेला मुलुकको अर्थतन्त्र चलायमान बन्न नसकेको र सुस्ताएको अवस्था छ ।

अर्थतन्त्रका समग्र सूचकहरू पनि राम्रो देखिँदैन । लगानीका लागि पुँजीको अभाव छ । व्यवसायीमा उत्साह देखिँदैन । तै पनि कुनै पनि अर्थतन्त्रमा जब शिथिलता आउँछ त्यो एकैपटक ह्वात्तै बढ्ने अवस्था त हुँदैन । विस्तारै सुधार हुँदै जान्छ । हाम्रो अवस्था पनि त्यस्तै छ । विस्तारै सुध्रिँदै गएको देखिएको छ । अर्थतन्त्र चौपटै हुन लाग्यो, गरिखाने वातावरण नै भएन, लगानीको अवसर भएन भन्ने जस्ता नकारात्मक कुरामा अल्झनुभन्दा अर्थतन्त्रलाई गतिशिल बनाउन सकारात्मक सोच तथा सरकार र निजीक्षेत्र दुवैको सहकार्य एवं हातेमालो जरुरी देखिन्छ । यसका लागि तत्काल सुधार गर्नुपर्ने तथा दिर्घकालीन हिसावले गर्नुपर्ने कामहरू छुट्याएर अघि बढ्नु जरुरी छ । आर्थिक विकास र मुलुकको समग्र अर्थतन्त्र सुधारका लगि नेपाल उद्योग वाणिज्य महासंघको भूमिका महत्च्वपूर्ण रहने मैले महसुस गरेको छु ।

एकातर्फ तरलताको समस्या छ, यो समस्या हटाउन आयात प्रतिबन्ध लगाउँदा राजस्वमा समस्या देखियो । दुवै समस्या हटाउने माध्यम मार्ग चाहिँ के छ ?

सरकारले विकास खर्च बढाउनु पर्‍यो । विकासका काम सही समयमा सम्पन्न हुनुपर्‍यो । आयात प्रतिबन्ध हुनुभएन । यो त खुल्ला अर्थतन्त्रमा राम्रो कुरा भएन नि । अर्को महत्वपूर्ण कुरा आयात निर्यातबीचको ठूलो खाडल पुर्न हामीले उत्पादन बढाउनुपर्‍यो । उत्पादनमूलक उद्योगलाई प्रोत्साहन गर्नुपर्‍यो । रेमिट्यान्समा आधारित अर्थतन्त्रको विकल्प खोज्नुर्‍यो ।

विगतमा महासंघले साना तथा मझौला उद्योग व्यवसायको हितमा जति गर्नुपर्थ्यो, त्यति गरेन भन्ने छ नि ?

त्यसमा म सहमत छैन । महासंघको पहल निरन्तर जारी नै छ । तर सुन्नुपर्नेले नसुनेपछि के गर्ने ?

ठूला व्यवसाय पनि समस्यामा छन् । यसले गर्दा धेरैले रोजगारी गुमाउनुका साथै राज्यको राजस्व पनि घटेको छ । यो समस्या हल गर्न कस्ता योजना सोच्नुएको छ ?

ठूला मात्र होइन साना तथा मझौला सबै उद्यमी व्यवसायी समस्यामा परेका छन् अहिले । व्याजदर घटाउने, व्यवसायीको मनोवल बढाउने, उत्पादनमूलक उद्योगमा जोड दिने । आयात घटाउने तथा निर्यात बढाउने उपाएको खोजी गर्नु नै समस्या हल गर्ने उपयुक्त बाटो हो भन्ने मलाई लागेको छ । निजी क्षेत्रलाई उत्साह र सम्मानको वातावरण तयार नभएसम्म यी सबैकुरा हल हुने अवस्था देँखिदैन ।

विगतमा तपाईंहरूले दिनुएको सुझाव सरकारले कत्तिको कार्यान्वयन गरेको छ ?

केही कार्यान्वयन भएका छन् । तर धेरै भएका छैनन् । राजनीतिक अस्थिरता, कर्मचारी संयन्त्रले गर्ने ढिलासुस्ती, आर्थिक नीति, वजेट र मौद्रिक नीतिबीच तालमेल कायम हुन नसक्नु जस्ता कारणले कार्यान्वयनमा समस्या देखिएका छन् ।

देशभर रहेका उद्योगी व्यवसायीलाई के प्रतिबद्धता जनाउन चाहनुहुन्छ ?

म उद्योगी व्यवसायी साथीहरूसँग के प्रतिवद्धता जनाउँछु भने, म उद्यम व्यवसायलाई नै आफ्नो लक्ष्य र उद्देश्य राख्ने , यही क्षेत्रको उन्नति प्रगतिमा रमाउने, उद्योगी व्यवसायीका समस्या राम्रोसँग बुझ्न र महशुस गर्न सक्ने व्यक्ति हुँ । साना तथा मझौला उद्यम व्यवसायमा पनि म संलग्न छु । साना तथा मझौला उद्यमी व्यवसायी साथीहरूले भोग्नुपरिरहेका समस्याबारे म पूर्ण जानकार छु । म विगत २० वर्षदेखि नेपाल उद्योग वाणिज्य महासंघमा निरन्तर क्रियाशील छु । साथीहरूले नै निर्वाचित गरेर पठाएको एसाेसिएटतर्फको उपाध्यक्षका रुपमा तथा रोजगारदाता परिषद्को सभापतिका रुपमा मैले अहिले काम गरिरहेको छु । त्यसैले उद्योगी व्यवसायीका समस्या के छन् । त्यसको समाधान कसरी गर्ने भन्ने विषयमा म पूर्ण जानकार छु । त्यसैले व्यवसायीको हकहितका पक्षमा निरन्तर लाग्ने छु । रोजगारी सिर्जना, उत्पादन वृद्धिलाइ प्राथमिकता दिने छु । सरकारसमक्ष उद्यमी व्यवसायीका समस्या समाधानमा पहल गर्ने छु । सबैलाइ समेटेर, सबैको भावना बुझेर काम गर्नेछु ।

प्रकाशित मिति: शनिबार, चैत २५, २०७९ १५:३३