परराष्ट्र र स्वास्थ्यमन्त्री बन्न कांग्रेस संस्थापनमै प्रतिस्पर्धा , को को छन् आकांक्षी ?

परराष्ट्र र स्वास्थ्यमन्त्री बन्न कांग्रेस संस्थापनमै प्रतिस्पर्धा , को को छन् आकांक्षी ?

A+ A A-

नेपाली कांग्रेसले पाएको ८ मन्त्रालयमध्ये ४ मन्त्रालयमा नेतृतव पठायो । पुष्पमकल दाहाल प्रचण्ड नेतृत्वको सरकार १७ चैतमा सातौं पटक विस्तार हुँदा कांग्रेसले अर्थ, रक्षा, शहरी विकास र उद्योग मन्त्रालयमा मन्त्री पठायो ।

अझै पनि खानेपानी, कानुन, परराष्ट्र, युवा तथा खेलकुद, वन र स्वास्थ्य मन्त्रालय प्रधानमन्त्री माताहत नै छन् । कांग्रेसले यीमध्ये चार मन्त्रालय पाउनेछ । कांग्रेसले आन्तरिक किचलाेका कारण आफूले पाए जति मन्त्री पठाउन नसकेकाे हाे । शेखर काेइराला पक्षले तीन मन्त्रालयमा दाबी नछाेडेपछि कांग्रेसभित्र आन्तरिक भागवण्डामा सहमति हुन सकेकाे छैन । त्यसमाथि स्वास्थ्य र परराष्ट्र मन्त्रालय लिन संस्थापन पक्षभित्रै हानाथाप छ ।

स्वास्थ्यमन्त्री को बन्ने भन्नेमा संस्थापनभित्र रामहरी खतिवडा र मोहन बस्नेत प्रतिस्पर्धामा छन् । उनीहरू दुवैले मन्त्री बन्न प्रत्यक्ष/अप्रत्यक्ष रुपमा सभापति शेरबहादुर देउवालाई सन्देश पठाइरहेका छन् ।

‘सांसदहरू सबै मन्त्री बन्न सक्षम छन् । सभापति ज्यूले सहमतिमा पार्टीबाट मन्त्रीको नाम सिफारिस गर्नुहुन्छ,’ सांसद खतिवडाले शिलापत्रसँग भने, ‘कांग्रेसबाट आकांक्षी धेरै हुनु स्वभाविक हो । पाएको जिम्मेवारी पूरा गर्न सबै तयार छन् ।’

परराष्ट्रमन्त्रीमा एनपी साउदको सम्भावना धेरै रहेको कांग्रेस नेताहरू बताउँछन् । अर्थ मन्त्रालयमा गरेकाे प्रयास खेर गएपछि उद्योगी तथा सांसद विनोद चौधरीले परराष्ट्र मन्त्रालयमा दाबी गरेका छन् । अर्थतन्त्र सुधार्न उनले सय दिने कार्ययोजना पेस गरेका थिए । तर देउवाले प्रकाशशरण महतलाई अर्थमन्त्री बनाए ।

एनपी साउद भने परराष्ट्र मन्त्री हुनेमा संस्थापन पक्षका नेताहरू ढुक्क देखिन्छन् । ‘सभापति ज्यूले सुदूरपश्चिमबाट मन्त्री बनाउन चाहानुभएको नेताहरूमध्ये एनपी दाइ पनि हुनहुन्छ । अन्य कुराहरूमा पनि सहमतिको प्रयास जारी छ । सम्भवना उहाँ कै देखिन्छ,’ संस्थापनका एक नेताले शिलापत्रसँग भने ।

शेखर काेइराला समूहले पनि स्वास्थ्य मन्त्रालयमा दाबी गरेको छ । महामन्त्री गगन थापा र विश्वप्रसाद शर्माले प्रदीप पौडेललाई मन्त्री बनाउन लबिङ गरेको कांग्रेस नेताहरू बताउँछन् । पौडेलले मन्त्री बन्ने अवसर पाए स्वास्थ्य मन्त्री बन्ने सम्भावना रहेको कांग्रेस नेताहरू बताउँछन् ।

प्रकाशित मिति: शुक्रबार, चैत २४, २०७९ २०:१३