वायु सेवा निगमको संरचना र व्यवस्थापनबारे अध्ययन गर्न पूर्वगभर्नर क्षेत्रीको नेतृत्वमा समिति गठन

वायु सेवा निगमको संरचना र व्यवस्थापनबारे अध्ययन गर्न पूर्वगभर्नर क्षेत्रीको नेतृत्वमा समिति गठन

A+ A A-

सरकारले नेपाल वायु सेवा निगमको संरचना र व्यवस्थापकीय पक्षको अध्ययन गर्न समिति गठन गरेको छ । पर्यटनमन्त्री सुदन किरातीका अनुसार नेपाल वायुसेवा निगमको संरचनागत र व्यवस्थापकीय पक्षको अध्ययन गरी सिफारिस गर्नका लागि दिपेन्द्रबहादुर क्षेत्रीको अध्यक्षतामा समिति गठन गरिएको हो ।

समितिको सदस्यमा ओम गुरुङ, टिकाराम राई, पियुस आनन्द र सहारा न्यौपाने रहेका छन् । अध्यक्ष बनेका क्षेत्री राष्ट्र बैंकका पूर्वगर्भनर तथा राष्ट्रिय योजना आयोगका पूर्वउपाध्यक्षसमेत हुन । यस्तै सदस्य बनेका राई पत्रकार हुने भने पियुस आनन्द आर्टर्ड एकाउन्टेन्ट हुन् । गुरुङ र न्यौपाने पनि हवाई क्षेत्रका जानकार हुन् ।

सरकारले डुब्न लागेको निगमलाई माथि उठाउने भन्दै पटक पटक यस्ता अध्ययन तथा सिफारिस समिति बनाउँदै आएको छ । तर, उपलब्धि भने खासै भएको छैन । नयाँ मन्त्री आएसँगै निगम सुधारका योजना बन्ने तर कार्यान्वयनमा नआउने गरेका छन् ।

किराती मन्त्री बनेपछि उनले यो अध्ययन समिति बनाएका हुन् । यसअघि योगेश भट्टराई पर्यटनमन्त्री हुँदा उनले पनि सुधार समिति गठन गरेका थिए । २३ साउन २०७६ मा उनले पूर्वपर्यटन सचिव सुशील घिमिरेको संयोजकत्वमा ५ सदस्यीय ‘नेपाल वायु सेवा निगम सुधार सुझाव कार्यदल’ गठन गरेका थिए । पछि उनै घिमिरे वायु सेवा निगमको अध्यक्ष भएका थिए । तर, उनको पालामा पनि निगम सुधार हुन सकेन ।

वायु सेवा निगम श्वेतपत्र २०७५ अनुसार निगमसँग हाल वाइड बडी, न्यारोबडी, ट्वीनटर गरी १६ वटा जहाज छन् । तत्कालीन अवस्थामा करिब ३८ अर्ब रुपैयाँ यसको मूल्य अनुमान गरिए पनि अहिले भने यो मूल्य पर्दैन । त्यसपछि देशभरका २३ स्थानमा भवन र जग्गा छन् । सबैभन्दा धेरै मूल्य पर्ने जग्गा कान्तिपथमा छ । भवनसहित १४ रोपनी ७ आना जग्गा निगमको नाममा छ । सिनामंगलमा निगमको ३४ रोपनी १३ आना, मोरङमा साढे १२ कट्ठा जग्गा छ ।

बाँकेमा १ सय ५४ कट्ठा, रुपन्देहीमा ७ कट्ठा, सुर्खेतमा ९.५० कट्ठा, मुस्ताङमा साढे २८ आना, पोखरामा ८२.७५ आना, दाङमा ५.७४ कट्ठा, गोर्खामा ५.६९ आना, कैलालीमा १० कट्ठा, संखुवासभामा १५.१० आना, महेन्द्रनगरमा ३ कट्ठा, पर्साका दुई स्थानमा ८.११ कट्ठा, जुम्लामा २८.८५ आना, खोटाङमा ३२ आना, हुम्लामा १०.१८ कट्ठा जग्गा रहेको श्वेतपत्रमा उल्लेख छ ।

प्रकाशित मिति: शुक्रबार, चैत २४, २०७९ १९:०२