भिख माग्दामाग्दै बलिउड स्टार

A+ A A-

केही महिना अघिसम्म कोलकाताको एक रेलवे स्टेसनमा गीत गाएर गुजारा चलाउँथिन् ६० वर्षीया रानु मण्डल । उनी रेलवे स्टेसन नजिकै रहेको एउटा गाउँको झुपडीमा बस्थिन् । श्रीमान वर्षौं पहिले संसारबाट बिदा भइसकेका थिए । आमा अत्यन्तै गरिब र मागेर खानुपर्ने अवस्थाकी भएकाले छोरीले पनि उनलाई १० वर्षअघि नै छाडेर हिँडिन् । त्यसपछि कहिल्यै ‘आमा तिमिलाई कस्तो छ’ भनेर सोध्न आइनन् ।

रानु बिलकुल एक्ली र बेसहारा थिइन् । काली वर्णकी रानु मण्डल बिरामी र कमजोर शरीरलाई बचाउन संघर्ष गरिरहेकी थिइन् ।

उनीसँग भौतिक सम्पत्ति केही पनि थिएन । न रेखदेख गरिदिने आफन्त नै । खान लाउनै धौधौ थियो । तर, उनीसँग यी सबैभन्दा ठूलो सम्पत्ति थियो, उनको गला । त्यही गलाले एकदिन उनको जीवन कयापलट गराउनेवाला थियो ।

एकदिन रेलवे स्टेसनमा उनी गीत गाइरहेकी थिइन् । वरिपरिका मान्छे उनलाई सुनिरहेका थिए । त्यतिकैमा अतेन्द्र चक्रवर्ती नाम गरेका युवा पनि त्यो भीडमा आइपुगे । तर, त्यतिबेला रानु मण्डलले गीत गाइसकेकी थिइन् ।

अतेन्द्रले रानुले गाएको गीतको अन्तिम अन्तरामात्रै सुन्न भ्याएका थिए । उनलाई रानुको स्वरले आकर्षित गर्यो । फेरि गीत गाउन आग्रह गर्दै अतेन्द्रले रानुलाई चिया र बिस्कुट किनेर खुवाए । त्यसपछि रानुले गीत गाउन थालिन् । गीत थियो बलिउडकी लेजेन्ड लता मंगेश्करको ‘एक प्यार का नगमा है, मौजों की रवानी है’ ।

उनले गाएकाे गीत हेर्न यहाँ क्लिक गर्नुहाेस् :

अतेन्द्रले भिडियो गरिरहेका थिए । पछि त्यसलाई उनले सामाजिक सञ्जालमा पोष्ट गरिदिए ।

रानुलाई जीवनको उत्तरार्धमा एउटा ठूलो र अकल्पनीय सफलताले पर्खिरहेको थियो । त्यो सफलताको ढोका खोलिदिएका थिए, अतिन्द्र चक्रवर्तीले । ‘एक प्यार का नगमा है’ले रानुलाई कहाँबाट कहाँ पुर्यायो । भनिन्छ, उनको स्वर पनि लता मंगेश्करको जस्तै छ ।रानु पहिलेदेखि नै गाउनमा पोख्त थिइन् । किशोर अवस्थादेखि नै उनले गाउन थालेकी हुन् । तर, उनी आर्थिक रुपमा विपन्न थिइन् । आफूलाई अब्बल साबित गराउन रानुसँग सामर्थ्य थिएन । त्यसैले उनले आफूलाई साबित गराउन ६० वर्षको उमेरसम्म कुर्नुपर्यो ।

सामाजिक सञ्जालमा उनले गाएको गीत भाइरल बन्यो । रातारात उनलाई त्यो गीतले बलिउडको यात्रा गरायो । हिमेश रेशमियादेखि बलिउड स्टार सलमान खानसम्मले उनलाई सहयोग गरे ।

टिकटकमा अहिले एउटा गीत भाइरल छ, ‘तेरी मेरी, तेरी मेरी’ । यो गीतको सुरुवात महिलाको सुमधुर आलापबाट हुन्छ । सुरु भइसकेपछि यो गीत पूरै सुन्न मन लाग्छ । हिमेश रेशमियासँग यो गीत गाउने गायिका अरु कोही नभएर रानु मण्डल नै हुन् । यो गीत सुन्दा लाग्दैन, कुनै ६० वर्षीया महिलाले गाएको हो । वास्तवमा उनको स्वरमा जादु नै छ ।

भारतीय सञ्चारमाध्यममा चर्चा छ, रानुलाई बलिउड स्टार सलमान खानले ५५ लाख भारुमा घर किनिदिएका छन् । यद्यपि, सलमानले भने यसबारे केही बोलेका छैनन् । सलमानले आफ्नो आगामी चलचित्रमा रानुलाई गीत गाउने अवसर दिने बताएका छन् ।

हिमेशले आफ्नो गीतमार्फत रानुलाई बलिउडमा डेब्यु गराएका छन् ।अरु थुप्रैले रानुसँग काम गर्न चाहेका छन् ।

आज रानु मण्डलले जुन सफलता पाएकी छन् त्यसलाई भाग्यको खेल भन्यो भने सायद यो गलत हुँदैन ।

त्यो दिन रानुलाई अतेन्द्र चक्रवर्तीले नभेटेका हुन्थे भने सायद उनको क्षमता दुनियाँसामु आउने थिएन । यसलाई रानुको भाग्य नै मान्नु पर्छ । ६० वर्षसम्म उनलाई धेरैले देखेनन्, चिनेनन् । तर, यो उमेरमा आएर उनले लाखौं फ्यान कमाइन् । आफ्ना लागि ‘जे गर्न पनि तयार हुने’हरु भेट्टाइन् ।
आमा रातारात सेलिब्रेटी भएपछि १० वर्षअघि छाडेर गएकी छोरी पनि फर्केर आएकी छन् । आमाको मन न हो, दुःखमा आफूलाई छाडेर जाने छोरी फर्केर आएकोमा रानु खुसी छिन् । ‘छोरी आएपछि बल्ल मलाई शान्ति मिलेको छ,’ भारतीय मिडियालाई उनले भनेकी छन्, ‘मेरो परिवार पूर्ण भएजस्तो लागेको छ ।’१५/२० वर्षको उमेरमै ‘फ्रस्टु भइयो’ भन्नेहरुका लागि रानु मण्डल ठूलो उदाहरण हुन् । यो सफलताका लागि उनले ६० वर्षको उमेरसम्म कुर्नुपर्यो । एउटा मान्छेको जीवनमा मेहनतसँगै भाग्यले पनि ठूलो अर्थ राख्दछ भन्ने कुराको उदाहरण बनेकी छन् उनी ।

उदाहरणीय टेड विलियम्स

रानु मण्डलसँग मिल्दोजुल्टो घटना अमेरिकामा पनि भएको थियो । विश्वकै लागि उदाहरणीय बनेका थिए, टेड विलियम्स ।अमेरिकाको ब्रुकलिनमा जन्मिएका उनी आफ्नो खराब आदत र आर्थिक अवस्थाका कारण सडकमा भिख मागेर पेट पाल्थे । उनी रोगी थिए, बेसाहारा थिए । बूढो शरीर लिएर जिउन संघर्ष गरिरहेका थिए ।

लागुऔषध दूर्व्यसनका कारण उनले दुई पटक जेलको हावा खानु परेको थियो । जेलबाट बाहिर निस्किएपछि टेड विलियम्स एउटा प्लेकार्ड बोकेर भिख माग्थे । त्यो प्ले कार्डमा लेखिएको हुन्थ्यो, ‘मेरो आवाज निकै मोटो र सुरिलो छ ।’

उनी रातमा पेट्रोल पम्पको पछाडि राखिएका टेन्टमा गएर सुत्थे ।

एक दिन टेड विलियम्सले बोकेको प्ले कार्डमा एक रिपोर्टरको नजर पर्यो । ती रिपोर्टरले टेडको अन्तर्वाता लिए ।

जब टेडले बोले, रिपोर्टरलाई उनको आवाज दमदार लाग्यो । रिपोर्टरले टेड विलियम्सको अन्तर्वार्ता भिडियो युट्युवमा अपलोड गरिदिए । त्यसपछि जे भयो, जुन रिपोर्टर र टेड विलियम्सको कल्पनाभन्दा धेरै टाढाको कुरा थियो । युट्युवको त्यो भिडियो रातारात भाइरल बन्यो । गुगलमा टेड विलियम्स व्यापक सर्च हुन थाले ।

त्यसपछि न्युयोर्कको एउटा टिभी च्यानलले कर्मचारीका रुपमा टेडलाई ल्याउन अन्तर्वार्ता लियो र उनी छानिए पनि । त्यसपछि टेडले ट्रेनरका रुपमा पनि काम गर्न थाले । उनले ठूलाठूला कर्पोरेट कम्पनीका विज्ञापनमा आवाज दिए । कतिपय भिडियोमा उनी खेले ।

यसरी कुनै बेला सडकमा भिख माग्ने टेड विलियम्स रातारात स्टार बने । अहिले अमेरिकाको लब्धप्रतिष्ठित व्यक्तिका रुपमा परिचित छन् टेड विलियम्स ।उनले आफ्नो संघर्ष र सफलताका बारेमा किताब पनि लेखेका छन् ।

धेरै मान्छे ‘भाग्यको खेल’मा विश्वास गर्दैनन् । तर, रानु मण्डल र टेड विलियम्सको जीवनमा भएको कायापलटले भने भाग्यमा विश्वास नगर्नेहरुलाई सोच्न बाध्य बनाएको छ ।

कोही मान्छेमा क्षमता छ भने सफलता ढिलोचाँडो निश्चित हुन्छ । यो सधैंका लागि क्षमतावान मान्छेबाट टाढा रहन सक्दैन भन्ने कुराको पुष्टि रानु र टेडको जीवनकथाले गरेको छ ।

जिन्दगीले हामीलाई हरेक दिन, घण्टा, सेकेन्ड केही नयाँ गर्ने मौका दिन्छ । तर, हामी यस्तो मौकालाई नकारात्मक सोचका कारण पन्छाइदिन्छौं । हामी सधैं त्यही चिजका लागि रुन्छौं जुन हामीसँग छँदैछैन । हामी आफूसँग भएका कुरालाई उपयोग गरेर नयाँ गर्ने प्रयास नै गर्दैनौं । जसका कारण ‘फ्रस्टू भइयो’ भनेर युवा अवस्थामै जीवनलाई धिक्कार्नेको संख्या बढ्दो छ ।

६० नाघेपछि रानु र टेडले पाएको सफलताले के पुष्टि हुन्छ भने क्षमता भएका मान्छेको भाग्य खुल्न कुनै उमेर वा परिवेश चाहिँदैन । धैर्यता चाहिँ हुनुपर्छ, प्रयास जारी राख्नुपर्छ । कुनै कुरा भएन भनेर छाड्नुहुँदैन ।

भनिन्छ, हरेक मान्छेसँग केही न केही विशेष क्षमता हुन्छ । कतिपयलाई आफूभित्र भएको यस्तो क्षमताको अन्दाजसम्म हुँदैन । तर, हामी आफ्नो क्षमता बुझ्ने भन्दा पनि अरुको देखेर त्यस्तो नक्कल गर्नेतिर लाग्छौं जसका कारण हामी जीवनमा कहिलेकाही हार मान्छौं, निराश हुन्छौं ।

सफल व्यक्तिहरु भन्छन्, ‘हामीले आफ्नो खराब परिस्थितिलाई सकारात्मक रुपमा लियौं भने हामी जे पनि गर्न सक्छौं । मान्छे जस्तोसुकै परिस्थितिमा भए पनि उसका लागि एउटा ढोका त खुल्ला नै हुन्छ जसलाई सफलताको ढोका भन्न सकिन्छ । तर, निराश भएर हामी आफैं त्यो ढोकालाई बन्द गरिदिन्छौं ।’

प्रकाशित मिति: शनिबार, भदौ १४, २०७६ ०१:२६