‘प्रकाश’मार्फत प्रदीपको दाेस्रो जन्म

A+ A A-

विभिन्न कारणले वर्ष २०७९ मा अभिनेता प्रदीप खड्का समाचारमा छाइरहे । फिल्मको विवादले होस् वा फरक भूमिकाले प्रदीप समाचारका हेडलाइनमा अटाइरहे । चलचित्रमा अक्सर चक्लेटी भूमिकामा देखिने खड्का यस वर्ष फिल्म ‘प्रकाश’ मा जुम्लेली युवकको अवतारमा देखिए ।

सामाजिक यथार्थमा आधारित यस फिल्ममा गरेको अभिनयलाई लिएर अभिनेता प्रदीपको चौतर्फी तारिफ भयो । चलचित्र उद्योगमा फिल्म 'प्रकाश' उनका लागि दोस्रो जन्मसरह बन्यो । यसै वर्ष उनले नेपाल अन्तर्राष्ट्रिय चलचित्र महोत्सव (निफ) मा ‘प्रकाश’बाट सर्वश्रेष्ठ अभिनेताको अवार्ड जिते ।

एउटै खालको फिल्म र भूमिकाबाट बाहिर निस्कन नसकेको आरोपबाट पनि उनी मुक्त भए । उनले सामाजिक यथार्थवादी कथाका फिल्म रुचाउने दर्शकलाई समेत प्रभावित पारे । प्रदीपको अभिनयको प्रशंसा भए पनि प्रकाश फिल्मको कथामा धेरैले चित्त बुझाएनन् ।

यसबाहेक नायक प्रदीप प्रेमगीत- ३ र यससँग जोडिएको विवादका कारण चर्चामा रहे । उनी अभिनित फिल्म हिन्दीमा समेत डब भएर भारतसहित अन्य केही देशमा प्रदर्शन गरिएको थियो । व्यावसायिक सफलता पाएको उक्त फिल्मले राम्रो समीक्षा नपाए पनि प्रदीपका लागि यो फलदायी नै रह्याे । फिल्मको हिन्दी डबमार्फत अन्य भाषीमाझ पनि चिनिए उनी । भारतको ग्लोबल ताज अन्तर्राष्ट्रिय फिल्म फेस्टिबलमा प्रदीपले डेब्यु अभिनेताको अवार्ड जिते ।

त्यसअघि चलचित्र विकास बोर्डले प्रेमगीत- ३ लाई विदेशी फिल्मको क्याटगोरीमा राखेपछि विवाद उत्पन्न भएको थियो । पछि सञ्चार मन्त्रालयले नेपाली फिल्म नै भएको ठहर गर्‍यो । चर्चाअनुसारको तारिफ भने प्रदीप अभिनित प्रेमगीत- ३ ले पाउन सकेन ।

फिल्मलाई लिएर चलचित्र विकास बोर्डका अध्यक्ष भुवन केसीसँग परेको टकरावका कारण पनि प्रदीप चर्चामै रहे । विवादका माझ उनले विकास बोर्डका अध्यक्ष केसीको राजीनामा समेत मागेका थिए । प्रदीप-भुवन विवादकै क्रममा नेपाली फिल्ममा ‘नेपोटिज्म’को बहससमेत छेडिएको थियो ।

यस वर्ष उनी राजनीतिक अभियानमा समेत सामेल भएको देखियाे । चुनावका बेला उनले कांग्रेस उम्मेदवार विनोद चौधरीका लागि नवलपरासी पुगेरै भोट मागेको विषय पनि चर्चामै रह्यो ।

प्रकाशित मिति: आइतबार, चैत २६, २०७९ १५:३६