स्मार्ट सिटीलाई गिज्याइरहेको एउटा कल्भर्ट !

A+ A A-

सुदूरपश्चिम प्रदेशको राजधानी धनगढी उपमहानगरपालिका– २ बैयावेहडी र बजार जोड्ने कल्भर्ट जीर्ण अवस्थामा छ ।

झन्डै ३५ वर्ष अघि निर्माण भएको उक्त कल्भर्टमा क्षमता भन्दा बढी लोडका सवारी साधन आवत आवतजावत गर्दा समस्या सिर्जना मात्रै भएको छैन दुर्घटनाको जोखिम पनि बढेको छ ।

जीर्ण कल्भर्टको मर्मतका लागि सरकारी पक्षले चासो नदिएको स्थानीयले गुनासो गरेका छन् । बर्षाैदेखि जीर्ण अवस्थामा रहेको उक्त कल्भर्ट बनाउनको सट्टा धनगढी उप–महानगरपालिकाले कल्भटको अवस्था जीर्ण छ भन्दै साइनबोर्ड झुन्डाएको छ ।

अहिले यो जीर्ण कल्भर्टले स्मार्ट सिटीको परिकल्पना अघि सारेको धनगढी उप–महानगरपालिकालाई नराम्ररी गिज्याइरहेको छ । जीर्ण कल्भर्टमा हेभी सवारी साधनमा रोक लगाए पनि धनगढी उप–महानगरपालिकाले मर्मतको लागि कुनै चासो नदिएको धनगढी उप–महानगरपालिका २ बैयावेहडीका भरत कुमार रावलले बताए ।

उनले भने, कल्भर्ट पुरै जीर्ण बनिसक्यो तर मर्मतको लागि कुनै पहल भएको छैन । एक वर्ष अघि कल्भर्टको अवस्था जीर्ण रहेको भन्दै धनगढी उप–महानगरपालिकाले हेभी सवारी साधन आवाज–जावतमा रोक लगायो । र कल्भर्टको छेउमै सावधान कल्भर्टको अवस्था जीर्ण लेखिएको ठुलो साइनबोर्ड झुन्डाइयो ।

साइनबोर्ड राखेको एक वर्ष बित्दा पनि उप–महानगरपालिकाले मर्मतको लागि कुनै चासो नदिएको स्थानीय रेणुका शाहले बताइन् । जसका कारण अहिले कल्भर्टमा ठुला प्वाल परेको उनको भनाई छ ।

कल्भर्ट भएर १५ भन्दा बढी स्कुलका शिक्षक विद्यार्थी, स्थानीय बासिन्दा र मालवाहक सामान बोकेका दर्जनौँ सवारी साधन दिनहुँ आवत आवतजावत गर्ने गरेको सवारी चालक पुष्कर कुँवरले बताए ।

कल्भर्टको अवस्था जीर्ण बन्दा दुर्घटनाको जोखिम बढेको उनको भनाई छ । जीर्ण कल्भर्ट मर्मतको लागि पटक–पटक आवाज उठाउँदा पनि कुनै सुनुवाइ नभएको बैयावेहडीका जङ्गबहादुर शाहले बताए । ज्ञापनपत्र सहित नगरपालिका धाउँदा पनि कुनै सुनुवाइ नभएको उनको गुनासो छ ।

वडा नम्वर २ मा रहेको सो कल्भर्ट सँगै जीर्ण अवस्थामा रहेका अन्य सडक मर्मतको काम सुरु भइसकेको धनगढी उप–महानगरपालिकाले जनाएको छ । ६ अर्व ४० करोडको लागतमा धनगढीका शाखा सडक निर्माण प्रक्रिया सुरु भएको मेयर नृप वडले बताए ।

चालु आर्थिक वर्ष भित्रै जीर्ण अवस्थामा रहेका कल्भर्ट र सडक बन्ने उनको दाबी छ । दिनहुँ सयौँको सङ्ख्यामा आवत जावतमा भइरहने उक्त कल्भर्ट जीर्ण भएपछि सर्वसाधारणको जनजीवन कष्टकर बनेको छ ।

प्रकाशित मिति: शुक्रबार, भदौ १३, २०७६ २१:४२