'नागरिक अभिनन्दन'मा ज्ञानेन्द्रले भने- सामाजिक संरचना च्यात्ने प्रयास भइरहेको छ (भिडियो)

'नागरिक अभिनन्दन'मा ज्ञानेन्द्रले भने- सामाजिक संरचना च्यात्ने प्रयास भइरहेको छ (भिडियो)

A+ A A-

पूर्वराजा ज्ञानेन्द्र शाहलाई सुनसरी सदरमुकाम इनरुवामा 'नागरिक अभिनन्दन' गरिएको छ । पूर्वमन्त्री केशरबहादुर विष्टको संयोजकत्वमा पूर्वराजा शाहलाई इनरुवामा 'नागरिक अभिनन्दन' गरिएको हो ।

हत्तपत्त सार्वजनिक कार्यक्रममा आफ्नो अभिव्यक्ति नदिने शाहले सोमबार भने आफ्नो मन्तव्य समेत राखेका थिए । इनरुवास्थित जेल फिल्डमा ठूलो सङ्ख्यामा राजावादी सहभागी भएको कार्यक्रममा ज्ञानेन्द्रले पछिल्लो राजनीतिक अवस्थालाई टालटुले स्थितिको संज्ञा दिएका छन् ।

'सतही फेरबदल, आलटाल र टालटुलको प्रणालीले कुनै खँदिलो परिणाम दिँदैन,' सम्बोधनका क्रममा शाहले भने । शाहले स्थिरता र स्थायित्व सही राज्य पद्धति, शान्ति एवम् अनुशासनबिना हुन नसक्ने बताए ।

कसैलाई धन, कसैलाई मन, कसैलाई पद र कसैलाई कद दिएर लोभ्याएर सामाजिक संरचना च्यात्ने प्रयास भइरहेको उनको दाबी थियो ।

‘हाम्रो राष्ट्रिय स्वाभिमान, अखण्डता तथा सार्वभौमिक स्वतन्त्रता जोगाउनु छ,’ ज्ञानेन्द्रले भने 'निश्चय पनि हामीले शान्ति, सुव्यवस्था र सुशासनको माध्यमबाट चौतर्फी विकासको बाटो लाग्नु छ ।’

पूर्वराजा शाहले सुनसरी सदरमुकाम इनरुवामा दिएको मन्तव्यः

उपस्थित दिदीबहिनी तथा दाजुभाइहरू,

सुनसरी जिल्लाको यो सुन्दर नगरी इनरुवामा भेला भएर तपाईंहरूले राष्ट्रको हित चिन्तन गर्दै र आजका जनआकाङ्क्षा तथा आवश्यकताहरूलाई औँल्याएर जुन प्रकारको अभिनन्दन भाव प्रकट गर्नुभएको छ, त्यसप्रति म कृतज्ञता व्यक्त गर्दछु ।

सदासर्वदा स्वाधीन रहेको र आफ्नै मौलिक मान्यताभित्र स्वाभिमानपूर्वक आधुनिकतातर्फ लागेको हाम्रो नेपाल हामीलाई सधैँ राम्रो लाग्छ, हामीलाई सधैँ प्यारो लाग्छ । राष्ट्रको यही गौरबगाथा र राष्ट्रप्रतिको त्यही अघात प्रेम फेरि एक पटक यहाँ प्रकट भएको छ । तपाईंहरूले दर्साउनुभएको यस्तो देशभक्ति हामीले हृदयदेखि सम्मान गर्दछौँ । आफ्नो देशलाई माया गरेर, आफ्नो देशको अवस्थालाई बुझेर तपाईंहरूबाट जस प्रकारको चिन्ता, चासो र चिन्तन प्रस्तुत भएको छ त्यसमा मेरो गहिरो ध्यान पुगेको छ ।

स्थिरता र स्थायित्व सही राज्य पद्धति, शान्ति एवं अनुशासनबिना हुन सक्दैन । कसैलाई धन, कसैलाई मन, कसैलाई पद र कसैलाई कद दिएर, लोभाएर हाम्रो सामाजिक संरचना च्यात्ने प्रयास भइरहेको छ । परिवर्तन देखाउन अहिलेको कोरा र सतही फेरबदल, आलटाल र टालटुलको प्रणालीले कुनै खँदिलो परिणाम दिँदैन ।

निश्चय पनि हामीले राष्ट्रियता र राष्ट्रिय एकताको रक्षा गर्नुछ, निश्चय पनि हामीले हाम्रो राष्ट्रिय स्वाभिमान, अखण्डता तथा सार्वभौमिक स्वतन्त्रता जोगाउनु छ र निश्चय पनि हामीले शान्ति, सुव्यवस्था र सुशासनका माध्यमबाट चौतर्फी विकासको बाटो लाग्नु छ ।

राष्ट्र नै हाम्रो आफ्नो ब्रह्म हो । आफ्नो भूभागका जनता नै हाम्रा विधाता हुन्, अनि यही प्रकृति र यिनै प्राणीको बोध गर्नु नै हाम्रो अहं धर्म हो । त्यसैले व्यक्ति, परिवार, समूह, दल वा गुट उपगुटमा अल्झिएर होइन अब हामीले हामी र हाम्रो भन्ने सुहाउँदो राष्ट्रिय अवधारणालाई प्रवाह गर्न सक्नु पर्दछ । तपाईंहरू जस्तै सबैमा यस्तै राष्ट्रिय दृष्टिकोँण जाग्रत हुँदै जाओस् ।

धन्यवाद । जय नेपाल ।
सुनसरी, इनरुवा, चैत्र २०, २०७९

प्रकाशित मिति: सोमबार, चैत २०, २०७९ १७:३७