पूर्वमा पूर्वराजाको चहलपहलः के गर्दैछन् ज्ञानेन्द्र ?

A+ A A-

कुनै बेला ‘माओवादी जनयुद्ध’मा आफ्नो सहभागिता रहेको दावाका साथ भन्ने गर्छन् दुर्गा प्रसाईं । 'जनयुद्ध'का प्रडक्ट प्रसाईं केही समय अघिसम्म ‘केही समयको लागि’ एमालेमा बसे । अहिले तिनै प्रसाईं पूर्वराजा ज्ञानेन्द्र शाहलाई डोर्‍याउन थालेका छन् ।

‘माओवादी जनयुद्ध’कै प्रडक्ट बताउने प्रसाईंले गत फागुन १ को ‘जनयुद्ध दिवस’मा पूर्वराजा ज्ञानेन्द्र शाहलाई प्रमुख अतिथि बनाएर झापामा धुमधाम कार्यक्रम गरे । एमालेको केन्द्रीय सदस्य वहाल रहेको बेला प्रसाईंले 'जनयुद्ध दिवस'लाई काउन्टर दिँदै कार्यक्रम आयोजना गरेका थिए । राजतन्त्रकै बेलाको राजाको छनक दिने गरी धुमधामका साथ आयोजना गरिएको कार्यक्रमको नाम भने ‘नागरिक बचाऊ महाअभियान’ थियो ।

इटहरीमा पूर्वराजा ज्ञानेन्द्र शाह ।

महाअभियान नाम दिएको सो कार्यक्रममा पूर्वराजा ज्ञानेन्द्रसँगै पूर्वयुवराज पारस शाहसहित राजपरिवारको सदस्यहरूसँगै अन्य पूर्वपञ्चहरूको उपस्थिति थियो । उक्त कार्यक्रमको प्रमुख अतिथि भए पनि शाहले भने केही बोलेनन् । कार्यक्रमका वक्ताहरूको लम्बेतान भाषण मात्र सुनिरहे ।

नागरिक महाअभियान भनेर लघुवित्त र बैंकविरुद्ध धावा बोल्न गरिएको कार्यक्रममा पूर्वमन्त्री केशरबहादुर विष्टले राजतन्त्रको पक्षमा उत्तेजक भाषण गरेका थिए । राजतन्त्रको विशेषता र गणतन्त्रको आलोचनामा विष्टले लामो समय खर्चिएका थिए । राजतन्त्रको ‘जयजयकार’ गरिरहँदा विष्टले राप्रपाविरुद्ध भने तिखो टिप्पणी गरे । राजतन्त्र ल्याउँछु, हिन्दु राज्य फर्काउँछु, संघीयता खारेज गर्छु भन्दै झापाबाट निर्वाचित भएर गएका नेताले अन्तिममा सरकारसँग मिलेर ’जनयुद्ध दिवस’ को बिदा दिनेमा सहमति जनाएको भन्दै उनले राप्रपामाथि व्यङ्ग्य गरेका थिए ।

पछिल्लो निर्वाचन हेर्ने हो भने कोशी प्रदेशमा राप्रपाको प्रभावशाली उपस्थिति झापामा मात्र छ । प्रदेशभर प्रत्यक्षमा प्रतिनिधिसभा एक र दुई प्रदेशसभा राप्रपाले झापाबाटै जितेको हो । तर, झापामै भएको कार्यक्रममा ज्ञानेन्द्रको उपस्थितिमा विष्टले राप्रपाविरुद्ध दिएको भाषणले पूर्वराजा शाहसमेत राप्रपा नेतृत्वप्रति असन्तुष्ट रहेको बुझाई कतिपयको थियो ।

‘सरकार (पूर्वराजा ज्ञानेन्द्र) राप्रपासँग रिसाइबक्सेको भन्ने सङ्केत अस्ति दुर्गा प्रसाईंको कार्यक्रमबाट सङ्केत बुझिएको थियो,’ राप्रपाका प्रदेशस्तरीय नेताले शिलापत्रसँग भने ।

प्रसाईंको त्यो कार्यक्रमपछि राप्रपा नेताहरू ज्ञानेन्द्रसँग सम्बन्ध सुधार्नतर्फ लागे । शाहकै स्वामित्वमा रहेको हिमालय महालक्ष्मी चिया बगानमा निरन्तर राप्रपा नेताहरूले पूर्वराजालाई भेट्न थाले ।

स्थानीय नेताहरूको ज्ञानेन्द्र शाहलाई भेट्ने निरन्तरतापछि राप्रपाको केन्द्रीय नेतृत्व पनि शाहलाई भेट्न चिया बगान नै पुग्यो । गत चैत ८ मा शाहलाई भेट्न राप्रपा अध्यक्ष राजेन्द्र लिङ्देन, उपाध्यक्ष रवीन्द्र मिश्र, महामन्त्री धवलशमशेर राणा र नेता प्रकाशचन्द्र लोहनी दमक पुगेका थिए ।

पूर्वराजासँग राप्रपाका नेताहरू ।

पृथ्वी जन्यन्तिको अवसरमा विज्ञप्ति निकालेपछि प्रायः समय झापामै बस्दै आएका शाहसँग राप्रपा नेताहरूले झन्डै २ घण्टा कुराकानी गरेका थिए । के कुरामा गफ भयो भन्ने ठोस जवाफ भने राप्रपा नेताहरूको थिएन । शाहसँग भेट भएपछि राप्रपा नेताहरूले नियमित जस्तो प्रतिक्रिया ‘राष्ट्रिय राजनीतिको विकसित घटनाक्रम, बदलिँदो भूराजनीतिमा राजाले चासो दिनुभएको’ भन्ने कर्मकाण्डी उत्तर मात्र थियो नेताहरूको छ ।

सार्वजनिक मञ्चमा सक्रिय तर मौन

शाह वर्षको लामो समय झापामा बिताउने गर्छन् । कहिले एक्लै त कहिले परिवारका साथ दमकमा रहेको हिमालय महालक्ष्मी चिया बगानमा आएर बस्ने गर्छन् । बगानसँगै झापामा उनको बस्ने अर्को स्थान हो पाँचतारे होटल मेची क्राउन । मेची क्राउन र चिया बगानमा उनको भेटघाट उस्तै रहने गरेको छ ।

होटल र चिया बगानमा मात्र होइन । पछिल्लो समय सार्वजनिक मञ्चमा ज्ञानेन्द्रको उपस्थिति बाक्लिएको छ । दुर्गा प्रसाईंले गरेको कार्यक्रम होस् या इटहरीमा केही दिनअगाडि भएको गङ्गा आरती उनको उपस्थिति रह्यो । शाह पछिल्लो समय सार्वजनिक मञ्चमा निकै सक्रिय देखिएका छन् ।

इटहरीमा आरती र पूर्वराजा हेर्न आएका स्थानीयहरू ।

सार्वजनिक कार्यक्रममा बाक्लै सहभागी हुन थालेका शाहको सार्वजनिक अभिव्यक्ति भने आएको छैन । प्रमुख अतिथिको रूपमा दुर्गा प्रसाईंको महाअभियानमा शाहले कुनै अभिव्यक्ति दिएनन् ।

केही दिनअगाडि इटहरीको बुढीखोलामा शिव सेनाले आयोजना गरेको कार्यक्रममासमेत नागरिकको ठूलो भिड जम्मा भएको थियो । खोलामा आरती अवलोकन गर्न आएका शाहलाई भेट्न र हेर्न आउनेको सङ्ख्या उल्लेखनीय थियो । तर, धार्मिक सेन्टिमेन्टसँग जोडिएको बुढीखोलाको किनारमासमेत शाह मौन बसे । कुनै अभिव्यक्ति दिएनन् ।

इटहरीमा आरती र पूर्वराजा हेर्न आएका स्थानीयहरू ।

‘हामीले हरेक सोमबार बुढीखोलामा गङ्गा आरती गर्ने गरेका छौँ,’ आरती व्यवस्थापन गरिरहेका शिव सेनाका सुनसरी अध्यक्ष सुरज कँडेलले भने, ‘नेपाल र नेपाली जनताको सुख शान्तिको कामना गर्दै महाराज पनि त्यही आरती हेर्न आइबक्सिनुभएको हो ।’

धार्मिक कार्यक्रम सकिएपछि पूर्वराजा इटहरीका पुराना राप्रपा नेता रामकुमार सुब्बाको घरमा डिनरको लागि पुगे । डिनरसँगै शाहले अधिकांश राजावादी नेता तथा व्यापारीहरूलाई समेत सुब्बाको घरमा भेट दिएका थिए ।

भेटमा सुनसरीकै इनरुवामा शाहलाई गर्न लागिएको नागरिक अभिनन्दनको विषयमा समेत छलफल भएको थियो । छलफलमा राप्रपाका सुब्बासहित, कोशी प्रदेशका मन्त्री भक्ति सिटौला, राप्रपाका प्रवक्ता सगुन लावती, पूर्वमन्त्री बद्री मण्डल, विद्वत परिषद्को जीत बहादुर अर्याल रहेका थिए ।

इनरुवामा गर्ने भनिएको अभिनन्दनमा प्रशासनले असहयोग गरेको विषयमा प्रदेशमन्त्रीसहित छलफल भएको थियो । ‘नागरिक अभिनन्दन गृह मन्त्रालयले गर्न नदिनु भन्ने निर्देशन दिएको रहेको छ,’ छलफलमा सहभागी रहेका एक व्यक्तिले भने, ‘प्रक्रिया पूरा गरेपछि नदिने भन्ने कुरो हुँदैन भनेर छलफल भयो । आआफ्नो ठाउँबाट लबिङ गर्नुपर्ने कुरा नेताहरूले गर्दै थिए ।’

नागरिक अभिनन्दनबारेको पत्रकार सम्मेलन ।

सक्रियता बढेको अर्को सूचक हो इनरुवामा हुने नागरिक अभिनन्दन । गणतन्त्र पश्चात् पहिलो पटक इनरुवामा राजाकै हैसियतमा ज्ञानेन्द्र शाहलाई नागरिक अभिनन्दनमा सहभागी हुने भएका हुन् । राजावादीहरूको आयोजनामा सुनसरी सदरमुकाम इनरुवामा शाहलाई राजाकै हैसियतमा अभिनन्द गर्न लागिएको पूर्वमन्त्री केशरबहादुर विष्टले बताए ।

विष्टको संयोजकत्वमा ‘श्री ५ महाराजाधिराज सरकारको नागरिक अभिनन्दन कार्यक्रम’ भनेर चैत २० गते सोमबार इनरुवामा कार्यक्रम तय गरिएको छ । इनरुवाको जेल फिल्डमा ३० देखि ३५ हजार मान्छे भेला हुने भनिएको कार्यक्रममा राजाकै हैसियतमा ज्ञानेन्द्र शाहलाई अभिनन्दन गरिने विष्टले जनाए ।

प्रकाशित मिति: आइतबार, चैत १९, २०७९ २०:४३