विश्व विजेता मेस्सी फर्किएलान् बार्सिलोना ?

मेस्सी

A+ A A-

आफ्नो फुटबल जीवनको शानदार २० वर्ष बिताएपछि सन् २०२१ अगष्ट ८ मा लियोनल मेस्सीले स्पेनिस फुटबल क्लब बार्सिलोना छाडेका थिए ।

मेस्सीले कहिल्यै बार्सा छाड्न चाहेका थिएनन् । तर अवस्था यस्तो सिर्जना भयो क्लबले मेस्सीलाई राख्ने अवस्था रहेन । बार्साबाट बिदा हुँदैगर्दा मेस्सी धरधरी रोएका थिए ।

उनलाई त्यसदिन पत्रकारहरुले बार्सिलोनाले तपाईंलाई क्लबमा राख्न सबै उपाय लगायो त ? भन्दै प्रश्न गर्दा उनले केहीबेर मौन बसेर उत्तरमा भनेका थिए,‘मलाई त्यसबारेमा केही थाहा छैन, तर मलाई यो थाहा छ कि मैले क्लबमा रहन हर सम्भव प्रयास गरेँ ।’

मेस्सीको भनाइअनुसार उनी यो विषयमा ढुक्क थिएनन् कि बार्साले उनलाई पुनः क्लबमै राख्नका लागि पूर्ण प्रयत्न लगायाे ।

रिपोर्टअनुसार मेस्सी आफूले पाएको तलबको ५० प्रतिशतसम्म कटौती गर्न राजी थिए । तर पनि क्लब कोरोनाकालमा ठूलो ऋणमा फसेका कारण मेस्सीलाई पुनः अनुबन्ध गर्ने अवस्थामै थिएन ।

मेस्सीले त्यसबेला बार्सिलोनाबाट ७ सय ७८ पटक खेलिसकेका थिए । ६ सय ७२ पटक बार्साका लागि गोल गरेका उनी बार्सिलोनाका सर्वाधिक गोलकर्ता हुन् । उनले बार्साबाट चारपटक च्याम्पियन्स लिग जित्दा, ११ पटक ला लिगा जिते । मेस्सीले ७ पटक बालाेन डि’ओर जितेर कीर्तिमान बनाएका छन् । ६ वटा यो उपाधि भने उनले बार्सिलोनाबाट खेल्दा पाएका थिए ।

मेस्सी र बार्सिलोनाको बन्धन निकै गहिरो छ । १३ वर्षे मेस्सीलाई बार्सिलोनामा अनुबन्ध गर्न न्यापकिनमा हस्ताक्षर गरिएको थियो ।

मेस्सी पीएसजीमा अनुबन्ध भएता पनि उनका बार्सिलोनाका समर्थक अझै यो विश्वास गर्छन् कि मेस्सी पुनः बार्सिलोना फर्किनेछन् । मेस्सी र बार्सिलोना कहिल्यै नछुट्ने विश्लेषण पनि हुन्छन् ।

यतिबेला बार्साका उपाध्यक्ष राफा युस्ताले यस्तो अभिव्यक्ति दिएका छन् जसले मेस्सी बार्सिलोनामै पुनः फर्किने चर्चा बेग्र रुपमा हुन थालेको छ । यदि मेस्सी बार्सा फर्किए त्यो पुनर्मिलनलाई विश्वभरका मेस्सीका फ्यानले स्वागत नगर्ने कुरै रहँदैन ।

गत हप्ताको शुक्रबार राफा युस्ताले बार्साले मेस्सीलाई ल्याउने प्रयास गरिरहेको विषय पुष्टि गरेका हुन् । जसले बार्साका समर्थको मुटुको धड्कन बढाइदिएको छ ।

क्लबले उनलाई पुनः अनुबन्ध गर्ने सम्भावना खोजिरहेको उनको भनाइ छ । युस्ताले भनेका छन्,‘म मेस्सी बार्सामा फर्किएको देख्न चाहन्छु । सुन्दर कथाहरूको सुखद अन्त्य हुनुपर्छ, र दुई पक्षबीच आपसी प्रेम हुनुपर्छ ।’

गतवर्ष मात्र विश्वकपको उपाधि जितेका मेस्सीले भने यस विषयमा कुनै प्रतिक्रिया जनाएका छैनन् । एजेन्सीको सहयोगमा

प्रकाशित मिति: आइतबार, चैत १९, २०७९ १७:०२