टेलिप्रेजेन्स क्याविनेट बैठकः विष्णु पौडेललाई पत्याउने कि केपी ओलीलाई ?

A+ A A-

अहिले नेपालको प्रधानमन्त्री केपी शर्मा ओली छन् । उनी नेकपाको अध्यक्ष पनि हुन् । र, नेकपाको महासचिव विष्णु पौडेल हुन् ।
गत सोमबार (९ भदौ) नेपालकै इतिहासमा पहिलो पटक टेलिप्रिजेन्स मार्फत मन्त्रिपरिषद बैठक बसेको प्रधानमन्त्री केपी शर्मा ओलीले आफ्नो व्यक्तिगत ट्वीटर ह्याण्डलमा ट्वीट गर्दै जानकारी दिए । उनको ट्वीटर ह्याण्डलको बायोमा ‘नेपालका प्रधानमन्त्री र नेकपाको अध्यक्ष’ लेखिएको छ ।
आज (१२ भदौ) मा प्रकाशित भएको अन्नपूर्ण पोष्ट दैनिकको ५औं पेजमा नेकपा महासचिव विष्णु पौडेलको अन्तरवार्ता प्रकाशित छ । प्रकाशित अन्तरवार्ताको अन्तिम प्रश्न प्रधानमन्त्री ओलीले ट्वीटर मार्फत जानकारी दिएको विषयमा नै छ ।

‘प्रधानमन्त्रीले टेलिप्रेजेन्समार्फत मन्त्रिपरिषद् संचालन गरेको विषय निकै आलोचित बनेको छ, कार्यभार दिएकालाई विश्वास नगरे जस्तो देखिएन र ?’ प्रश्न यस्तो छ ।

यो प्रश्नको जवाफमा महासचिव पौडेलले ‘यो विषयमा सही सूचना सम्प्रेषण नभएको हो कि झै लाग्छ । त्यो मन्त्रिपरिषदको बैठक नभएर प्रधानमन्त्री, कार्यवाहक प्रधानमन्त्री तथा मन्त्रीहरुको भिडियो सम्वाद थियो । प्रधानमन्त्रीले मन्त्रीहरुसँग अपडेट लिनुभएको हो,’ भनेका छन् ।

हेर्नुहाेस प्रधानमन्त्री र महासचिवकाे परस्पर बाझिएका ट्वीट

पार्टी अध्यक्ष तथा प्रधानमन्त्रीले मन्त्रिपरिषद बैठक भन्ने र सोही पार्टीका महासचिवले बैठक नभएर मन्त्रिपरिषद सदस्यसँग प्रधानमन्त्रीले भिडियो संवाद गरेको भन्ने सार्वजनिक जानकारी दिएपछि अन्योल भएको छ ।

सरकारका प्रवक्ता संचार तथा सूचना प्रविधिमन्त्री गोकुल बास्कोटाको गतिविधिले भने टेलिप्रेजेन्समार्फत मन्त्रिपरिषद बैठक नबसेको संकेत गर्छ । मन्त्री बास्कोटाले मन्त्रिपरिषद बैठकका निर्णयहरु प्रत्येक बिहीबार पत्रकार सम्मेलन गरेर सार्वजनिक गर्थे ।

तर, आज (१२ भदौ, बिहीबार) को पत्रकार सम्मेलन स्थगित गरिएको मन्त्री बास्कोटाले ट्वीटर मार्फत नै जानकारी गराएका छन् । गत साता मन्त्री बास्कोटाले पत्रकार सम्मेलन गरेका थिए । त्यसयता मन्त्रिपरिषद बैठकले कुनै निर्णय नगरेकोले पत्रकार सम्मेलन स्थगित भएको उनको ट्वीटर ह्याण्डलमा उल्लेख छ ।

सरकारका प्रवक्ताले मन्त्रिपरिषदले कुनै निर्णय नगरेको भनेपछि सो बैठक हो वा नेकपा महासचिव पौडेलले भने झै भिडियो संवाद मात्रै थियो भन्नेमा दुविधा उत्पन्न भएको छ ।

प्रधानमन्त्रीले भने झै मन्त्रिपरिषद बैठक बसेको थियो भने कुनै न कुनै निर्णय हुन्थ्यो नै । र, मन्त्रिपरिषदले कुनै निर्णय गरेको थियो भने सरकारका प्रवक्ताले सार्वजनिक गर्थे ।

भिडियो कन्फरेन्स मार्फत मन्त्रिपरिषद बैठक बस्ने, केही निर्णय गर्ने र सरकारका प्रवक्ताले ती निर्णय लुकाउन ‘नयाँ निर्णय भएको छैन’ भनेर ढाँटेको पक्कै होइन ।

उपचार गराउनको लागि विदेश गएका र अस्पतालमा भर्ना भएका प्रधानमन्त्री महत्वपूर्ण विषय नभई ‘कार्यवाहक प्रधानमन्त्री र मन्त्रीहरुसँग भिडियो संवाद गरेर’ रमाइलो गरेका पनि हुनु नपर्ने हो ।

त्यसो भए ९ भदौमा टेलिप्रेजेन्समार्फत मन्त्रिपरिषद बैठक बसेको थियो कि थिएन ? नेकपा अध्यक्ष तथा प्रधानमन्त्री ओलीले दिएको जानकारी सही हो कि नेकपा महासचिव पौडेलले भनेको कुरा सही हो ? यस्ता प्रश्नको जवाफ अझै मिलेको छैन ।

टेलिप्रेजेन्समार्फत मन्त्रिपरिषद बैठक बसेको विषय सार्वजनिक भएपछि यसका डेटा सुरक्षाको विषयलाई लिएर विभिन्न प्रश्न पनि उठेका थिए ।

यस्ता प्रश्न उठेपछि प्रधानमन्त्रीको सूचना प्रविधि सल्लाहकार अस्गर अलीले सामाजिक संजाल फेसबुक मार्फत यो प्रविधिमा डेटा सुरक्षाको प्रसस्त सावधानी अपनाइएको भ्रममा नपर्न आग्रह नै गरेका थिए ।