फेरि मन्त्री बन्दिनँ भनेका खड्का पार्टीको नेतृत्व गर्दै बने रक्षामन्त्री

A+ A A-

२०७० सालमा तत्काली पार्टी सभापति सुशील कोइरालासँग असन्तुष्टि पोख्दै पार्टीको सहमहामन्त्रीबाट राजीनामा दिएर अर्घाखाँची पुगेका पूर्णबहादुर खड्काले भनेका थिए, ‘म धेरैपटक मन्त्री भएँ । अब फेरि मन्त्री बन्दैन ।' यस्ताे सार्वजिनक घाेषणा गरेकाे ९ वर्षपछि उनी पार्टीकाे नेतृत्व गर्दै शुक्रबार उपप्रधानमन्त्री तथा रक्षामन्त्री बनेका छन् । उनले त्यतिबेला गरेकाे घाेषणा अहिले आफैँ किन उल्लंघन गरे, यसकाे जवाफ उनीसँगै छ । तर उनी मन्त्री बनेकाे याे आठाैँपटक हाे ।

४ मंसिरकाे चुनावपछि कांग्रेस र माओवादी केन्द्रबीच कसले पहिला सरकारकाे नेतृत्व गर्ने भन्ने विषयमा कुरा नमिल्दा भत्किएकाे कांग्रेस-माओवादी सहकार्य पुन:ब्युँताउन महत्वपूर्ण भूमिका खेलेका कांग्रेस उपसभापित खड्काले अहिले उपप्रधानमन्त्रीबाट पुरस्कृत हुने अवसर पाएका हुन् ।

पुस १० को गठबन्धन भत्काएर कांग्रेसलाई सत्तामा पुनरागम गराउन उनले पार्टीकाे तर्फबाट नेतृत्वदायी भूमिका खेलेका थिए । याे सन्दर्भमा कांग्रेस सभापति शेरबहादुर देउवाकाे सबैभन्दा निकट रहेर उनले काम गरेका थए । पार्टी सरकारमा जाने भएपछि उनले फेरि मन्त्री नबन्ने पूर्व घाेषणा बिर्सिएर उनी मन्त्री बन्ने प्रयासमा लागे । उनले सुरुमा गृह मन्त्रालयमा इच्छा देखाए । गृह माओवादीले नछाड्ने भएपछि उनले अर्थमा रुचि देखाए । अर्थ पनि नपाएपछि रक्षामा चित्त बुझाएका छन् । अर्थमा एउटै समूहका नेता भएर पनि तिक्ततापूर्ण सम्बन्ध रहेका डा प्रकाशशरण महतले बाजी मारे । अर्थमन्त्री काे हुने भन्ने विषयमा खड्का र महतकाे लडाईं हेर्न लायक थियाे । खड्कानिकटहरू सार्वजिनक रूमै महतमाथि खनिएका थिए ।

अर्का सांसद रमेश रिजाल र खड्काबीच रक्षा र परराष्ट्रमा को हुने भन्ने कुरा मिल्न सकेन । सभापति देउवाले बिहीबार यही विषयमा खर्चिए । अन्तत: रक्षा मन्त्रालय सम्हाल्दै खड्का उपप्रधानमन्त्री बने ।

यसअघि ७ पटक मन्त्री भैसकेको खड्काले गृहसहित विभिन्न मन्त्रालयको जिम्मेवारी सम्हालेका छन् । पहिलाेपटक खड्का २०५५ वैशाखमा युवा तथा खेलकुदमन्त्री बनेका थिए । त्यसपछि उनी संस्कृति र जनसंख्या तथा वातावरणमन्त्री, वाणिज्य, युवा तथा खेलकुद तथा संस्कृतिमन्त्री भएका थिए ।

२०५६ काे सुरुमा सूचना तथा सञ्चार र उद्योग मन्त्रालयकाे नेतृत्व गरेका उनी २०५६ काे असारमा गृहमन्त्री बने । त्यसपछि २०५८ मा उद्योग, वाणिज्य तथा आपूर्तिमन्त्री बनेका उनी २०६१ असारमा गृहमन्त्री बने । अहिले उनी १८ वर्षपछि उपप्रधानमन्त्री बनेर सिंहदरबार प्रवेश गरेका छन् ।

याेपटक उनले मन्त्रीमा चाहना राख्नुका पछाडि कांग्रेसकाे १५ औँ महाधिवेशनसँग जाेडेर हेर्नेहरू छन् कांग्रेसमा । देउवा समूहमा उनी अहिले सबैभन्दा सिनियर नेता हुन् । १५औँ महाधिवेशनमा देउवा उम्मेदवार हुन नपाउने भएकाले उनी आफूलाई देउवाकाे उत्तराधिकारीका रूपमा उभ्याउन चाहन्छन् । त्यसैकाे तयारीका लागि उनी पार्टीकाे नेतृत्व गर्दै सरकारमा गएकाे चर्चा कांग्रेसमा छ ।

प्रकाशित मिति: शुक्रबार, चैत १७, २०७९ १८:४८