प्रधानमन्त्रीले गरे मन्त्रिपरिषद् पुनःगठन, यस्तो छ कार्यविभाजन

A+ A A-

प्रधानमन्त्री पुष्पकमल दाहाल प्रचण्डले शुक्रबार मन्त्रिपरिषद् पुनःगठन गरेका छन् । नयाँ सत्तासमीकरण बनेपछि प्रधानमन्त्रीले शुक्रबार पहिलोपटक मन्त्रिपरिषद् पुनःगठन गरेका हुन् ।

नयाँ सत्ता समीकरण बनेसँगै शुक्रबार संसदको सबैभन्दा ठूलो दल कांग्रेस सरकारमा गएको छ । प्रधानमन्त्री प्रचण्डले शुक्रबार राष्ट्रपति रामचन्द्र पौडेलसमक्ष मन्त्रिपरिषद् पुनःगठन र कार्यविभाजनको सिफारिस गरेपछि राष्ट्रपतिले उनीहरूकाे नियुक्ति र कार्यविभाजन ताेकेका छन् । नवनियुक्त मन्त्रीहरूले राष्ट्रपति पाैडेलसमक्ष पद तथा गाेपनीयताकाे शपथग्रहण गरेका छन् ।

नयाँ मन्त्रिपरिषद्‌मा माओवादी केन्द्र, कांग्रेस, नेकपा एकीकृत समाजवादी, जसपा, लोसपा, नागरिक उन्मुक्ति, जनमत र नेपाल समाजवादी पार्टी गरी आठ पार्टी सहभागी भएका छन् ।

पुनःगठन गर्दा पनि मन्त्रिपरिषद्ले पूर्णता भने अझै पाएको छैन । प्रधानमन्त्री प्रचण्डले आफूसँग कानुन न्याय, परराष्ट्र, युवा तथा खेलकुद, वन तथा वातावरण र स्वास्थ्य मन्त्रालय राखेका छन् । १८ सदस्यीय मन्त्रीमण्डल बन्दा एक जना राज्यमन्त्री छन् भने दुई जना उपप्रधानमन्त्री बनेका छन् ।

उपसभापति पूर्णबहादुर खड्काको नेतृत्वमा कांग्रेस सरकारमा गएको हो । उनी उपप्रधानमन्त्री तथा रक्षामन्त्री बनेका छन् । कांग्रेसकाे भागमा ८ मन्त्री परे पनि शुक्रबार भने चार जना मात्र मन्त्री बनेका छन् । कांग्रेसले अझै चार मन्त्रीकाे नाम सिफारिस गरेकाे छैन । प्रधानमन्त्रीले आफूसँग राखेका पाँच मन्त्रालयमध्ये चार मन्त्रालय कांग्रेसकाे भागमा परेका छन् ।