मन्त्रिपरिषद् पुनर्गठन गर्दै प्रधानमन्त्री प्रचण्ड, को-को बन्दैछन् मन्त्री ?

मन्त्रिपरिषद् पुनर्गठन गर्दै प्रधानमन्त्री प्रचण्ड, को-को बन्दैछन् मन्त्री ?

A+ A A-

प्रधानमन्त्री पुष्पकमल दाहाल प्रचण्डले आज मन्त्रिपरिषद् पुनर्गठन गर्दैछन् ।

कांग्रेस, माओवादी केन्द्र, जसपा, नेकपा एकीकृत समाजवादी, लोसपा, नागरिक उन्मुक्ति र नेपाल समाजवादी पार्टीका सांसदहरूलाई समेटेर प्रधानमन्त्री प्रचण्डले मन्त्रिपरिषद् पुनर्गठन गर्न लागेका हुन् । मन्त्रीलाई दिउँसो ३ बजे शीलतनिवासमा शपथ ग्रहण गराउने कार्यक्रम तय भएको छ ।

सत्ता गठबन्धनको सबैभन्दा ठूलो दल कांग्रेसले पहिलो चरणमा आज चार जनालाई सरकारमा पठाउँदैछ । सभापति शेरबहादुर देउवाले प्रधानमन्त्री प्रचण्डलाई मन्त्रीका लागि चार जनाको नाम दिएका छन् । कांग्रेसबाट पहिलो चरणमा उपसभापति पूर्णबहादुर खड्का उपप्रधान तथा रक्षामन्त्री बन्दैछन् ।

यसैगरी, प्रवक्ता डा. प्रकाशरण महत अर्थ, रमेश रिजाल उद्योग र सीता गुरुङ शहरी विकास मन्त्री बन्नेछिन् । कांग्रेसको शेखर कोइराला समूहले तीन मन्त्री नदिए नाम सिफारिस गर्ने अडान राखेपछि देउवाले पहिलो चरणमा चार जनालाई मात्रै सरकारमा पठाउन लागेका हुन् ।

यसैगरी, माओवादी केन्द्रबाट शक्तिबहादुर बस्नेत उर्जामन्त्री बन्दैछन् । यस्तै, नेकपा एकीकृत समाजवादीले बेदुराम भुसाल र प्रकाश ज्वालालाई सरकारमा पठाउने भएको छ । भुसालले कृषि तथा पशुपन्छी विकास मन्त्रालय र प्रकाश ज्वालाले भौतिक पूर्वाधार तथा यातायात मन्त्रालयको जिम्मेवारी पाउनेछन् ।

यसैगरी, जसपाबाट अशोक राई मन्त्री बन्दैछन् । राईले शिक्षा, विज्ञान तथा प्रविधि मन्त्रालयको जिम्मेवारी पाउनेछन् । लोसपाबाट मन्त्री बन्ने शरतसिंह भण्डारीले श्रम, रोजगार तथा सामाजिक सुरक्षा मन्त्रालय, नागरिक उन्मुक्ति पार्टीकी अध्यक्ष रञ्जिता श्रेष्ठ चौधरीले भूमि व्यवस्था, सहकारी तथा गरिबी निवारण मन्त्रालय र नेसपाका महिन्द्र राय यादवले महिला, बालबालिका तथा ज्येष्ठ नागरिक मन्त्रालयको जिम्मेवारी पाउनेछन् ।

यसअघि नै मन्त्री बनेका माओवादी केन्द्रका नारायणकाजी श्रेष्ठको जिम्मेवारी भने हेरफेर हुने भएको छ । भौतिक पूर्वाधार तथा यातायात मन्त्रालय नेकपा एसले पाउने भएपछि श्रेष्ठलाई उपप्रधानसहित गृह मन्त्रालयको जिम्मेवारी दिइने भएको छ ।

यस्तै, संघीय मामिला तथा सामान्य प्रशासन मन्त्री रहेका अमनलाल मोदीको पनि मन्त्रालय हेरफेर हुँदैछ । मोदीले महिला, बालबालिका तथा ज्येष्ठ नागरिक मन्त्रालयको जिम्मेवारी पाउने बालुवाटार स्रोतले जनाएको छ ।