मेक्सिकोमा ४० आप्रवासीको आगलागीमा मृत्यु भएपछि हत्या आरोपमा अनुसन्धान हुने

मेक्सिकोमा ४० आप्रवासीको आगलागीमा मृत्यु भएपछि हत्या आरोपमा अनुसन्धान हुने

A+ A A-

गत सोमबार मेक्सिको र अमेरिकाको सीमाक्षेत्रमा आगलागीमा परेर ४० आप्रवासीको मृत्यु भएको थियो ।

अमेरिका प्रवेश गर्ने सपना लिएर मेक्सिको पुगेका आप्रवासीहरूको आप्रवासी हिरासत केन्द्रमा आगलागीमा परेर मृत्यु भएपछि यतिबेला हत्या अभियोग मुद्दामा अनुसन्धान सुरु हुने भएको छ । अमेरिकाको सीमानजिकै उत्तरी मेक्सिकोको सिउडाड ज्वारेजमा रहेको आप्रवासी हिरासत सुविधामा आगलागी भएको थियो ।

आगलागीमा परेर ४० जनाको मृत्यु हुँदा अन्य २९ जना घाइते भएका थिए । अलजजिराका अनुसार आगलागीमा आप्रवासीको मृत्यु भएपछि ‘हत्या अपराध र सम्पत्ति क्षति’को अभियोगमा आठ सुरक्षागार्ड र केही सो हिरासत केन्द्रका अधिकारीमाथि अनुसन्धान हुने भएको छ ।

मानव अधिकारकर्मी तथा अभियोजनकर्ता इरेन हेरेरियासका अनुसार आगलागीको सार्वजनिक फुटेजमा सुरक्षागार्डले आप्रवासीको ढोका नखोलिदिएको पाइएको छ । उता महिला आप्रवासीहरू सबैको सकुशल उद्धार गरिएको थियो । उनीहरूको ढोका खोलिएको थियो ।

रोयटर्सले सार्वजनिक गरेको भिडियोअनुसार पुरुष हिरासत केन्द्रमा भने सुरक्षागार्डहरू आगो र धुँवाकाबीच आफू भाग्छन् तर आप्रवासी राखिएको ढोका खोल्दैनन् । आप्रवासीहरूले ढोका खोल्न लात्ता प्रहार गरेको पनि देखिन्छ । यसरी ढोका नखोलिएपछि त्यहाँ ४० आप्रवासीले ज्यान गुमाए ।

हिरासत केन्द्रकै कमजोरी देखिएपछि यतिबेला मेक्सिको सरकार दबाबमा छ । त्यहाँकी सुरक्षामन्त्री रोजा आइसेला रोड्रिग्वेजले सुरक्षागार्ड र आप्रवासी स्थान्तरण अधिकारीको गल्ती देखिएको स्वीकार गरेकी छिन् । उनका अनुसार सुरक्षागार्डलाई जोखिम व्यवस्थापनको प्रशिक्षण नहुँदा यस्तो अवस्था सिर्जना भएको हुनसक्छ ।

हाल आगलागी भएको क्षेत्र सिउडाड ज्वारेज अमेरिका अवैध रूपमा प्रवेश गर्न चाहनेका लागि मुख्य विन्दु हो । यो क्षेत्र र अमेरिकाको टेक्सास राज्य नजिकै पर्दछ । मेक्सिकोका विभिन्न आश्रय स्थलहरू आप्रवासी र शरणार्थीहरूले भरिएका छन्, जसले अमेरिका पुग्ने अवसर पर्खिरहेका छन् ।

उनीहरूले अमेरिका पुगेर अमेरिकामा शरणका लागि अनुरोध गर्ने गरेको बताइएको छ । मानव तस्करहरूको मद्दतमा आप्रवासीहरू लाखौँ खर्च गरेर मेक्सिकोसम्म पुग्ने गरेका छन् । शरणार्थीका लागि संयुक्त राष्ट्रसङ्घीय उच्चायुक्त यूएनएचसीआरका अनुसार मेक्सिकोबाट हरेक महिना दुई लाख आप्रवासीहरू अवैध रूपमा अमेरिका प्रवेश गर्न खोज्छन् ।

आप्रवासनका लागि अन्तर्राष्ट्रिय संगठन आईओएमको हालैको प्रतिवेदनअनुसार सन् २०१४ यता अवैध रूपमा अमेरिका आउन चाहने आप्रवासीहरूमध्ये ७ हजार ६६१ को बाटोमै मृत्यु भएको छ अथवा उनीहरू बेपत्ता छन् ।

प्रकाशित मिति: शुक्रबार, चैत १७, २०७९ १२:४८