भोलिदेखि एसईई, करिब ५ लाख विद्यार्थीले दिँदै परीक्षा, चिटिङ गरे कारबाही

A+ A A-

२०७९ सालको माध्यमिक शिक्षा परीक्षा ( एसईई) भोलिदेखि सुरू हुँदैछ । परीक्षा नियन्त्रण कार्यालयका अनुसार परीक्षाको तयारी पूरा भएको छ । परीक्षामा ४ लाख ८५ हजार ३ सय ९६ जना सहभागी हुँदैछन् । जसमा छात्राको संख्या २ लाख ४२ हजार ७ सय १२ र छात्रको संख्या २ लाख ४२ हजार ७४ छन् । त्यसैगरी अन्य १० जना छन् । परीक्षाको लागि २ हजार ३७ केन्द्र तोकिएको छ ।

‘केन्द्रमा उत्तरपुस्तिका पुगिसकेको छ । प्रश्नपत्र हरेक परीक्षा केन्द्रको सुरक्षा निकायमा पुर्‍याइएको छ,’ परीक्षा नियन्त्रक विष्णुनारायण श्रेष्ठले भने, ‘केन्द्राध्यक्ष नियुक्ति भइसकेको छ ।’

प्रश्नपत्र आउट हुन नदिन केन्द्रीय सुरक्षा परिचालन गरिएको उनले बताए । ‘अभाञ्छित गतिविध हुँदैन भन्ने विश्वास छ । नआत्ति ढुक्क भएर डर त्रास नराखी परीक्षामा सामेल हुन अनुरोध छ,’ उनले भने, ‘अभाञ्छित गतिविधि गरे रेस्टिकेट, परीक्षामा सामेल हुन नपाउने हुन्छ । गल्तिको किसिम हेरर सजाय हुन्छ ।’

उनका अनुसार जापानको एभरेस्ट इन्टरनेसनल स्कुलबाट पनि १४ जना विद्यार्थीले परीक्षा दिँदै छन् । जापानमा प्रश्नपत्र अनलाइनबाट पठाइने उनले बताए । यसपटक दृष्टिविहीन विद्यार्थीका लागि जहाँ कक्षा भएको छ, त्यही परीक्षा दिन पाउने व्यवस्था मिलाइएको उनले बताए । ‘दृष्टिविहीन विद्यार्थीका लागि छुट्टै केन्द्र तोकिएको छैन । होम सेन्टरको व्यवस्था गरिएको छ,’ उनले भने । यो वर्ष ५५ जना दृष्टिविहीन विद्यार्थी छन् ।

त्यसैगरी, प्राविधिक धारका परीक्षार्थीले पनि नजिकैको परीक्षा केन्द्रबाट परीक्षा दिन पाउने व्यवस्था मिलाइएको उनले बताए । प्राविधिक धारका परीक्षार्थी टाढा टाढाबाट परीक्षा केन्द्रमा आउनु पर्थ्यो । अब नजिकै परीक्षा केन्द्र भएको ठाउँबाट परीक्षा दिन पाउँछन्,’ उनले भने ।

विज्ञान विषयको परीक्षाका लागि पनि एक दिन बिदा दिन लागिएको नियन्त्रक श्रेष्ठले बताए । २२ गते विज्ञानको परीक्षा छ । २१ गते बिदा दिइएको छ । एसईई चैत १७ देखि २९ गतेसम्म सञ्चालन हुँदैछ । भोलि अंग्रेजी विषयको परीक्षा हुुनेछ ।

प्रकाशित मिति: बिहीबार, चैत १६, २०७९ १८:२५