जासुसी गरेको आरोपमा रुसले गिरफ्तार गर्‍यो अमेरिकी पत्रकार, हुनेछ २० वर्षसम्मको जेल सजाय

जासुसी गरेको आरोपमा रुसले गिरफ्तार गर्‍यो अमेरिकी पत्रकार, हुनेछ २० वर्षसम्मको जेल सजाय

इभान ग्रेसकोभिच

A+ A A-

रुसले जासुसी गरेको अभियोगमा एक अमेरिकी पत्रकारलाई गिरफ्तार गरेको छ ।

वाल स्ट्रिट जर्नलका पत्रकार अमेरिकी नागरिक इभान ग्रेसकोभिचलाई रूसको संघीय सुरक्षा सेवा एफएसबीले बिहीबार पक्राउ गरेको हो ।

एफएसबीले भनेको छ, ‘रुसको संघीय सुरक्षा सेवाले अमेरिकी अखबार द वाल स्ट्रिट जर्नलको मस्को ब्युरोका संवाददाता, सन् १९९१ मा जन्मिएका अमेरिकी नागरिक इभान ग्रेसकोभिचको गैरकानुनी गतिविधिलाई रोकेको छ ।’

रुसको पूर्वी पहाडी क्षेत्र यकतरिनबर्गबाट उनलाई हिरासतमा लिइएको हो ।

एफएसबी भन्छ, ‘उनले अमेरिकी पक्षको निर्देशनमा काम गरिरहेका थिए र गोप्य जानकारी प्राप्त गर्ने प्रयास गरिरहेका थिए ।’

अमेरिकी पत्रिका वाल स्ट्रिट जर्नलले आफ्ना पत्रकार गिरफ्तार भएको विषयमा आफू सचेत भएको बताउँदै उनको सुरक्षाको ग्यारेन्टी हुनुपर्ने बताएको छ ।

एफएसबीका अनुसार जासुसी गरेको विषय पुष्टि भएमा उनलाई २० वर्षसम्मको जेल सजाय हुन सक्छ ।

वाल स्ट्रिट जर्नल अगाडि इभानले एएफपी र द मस्को टाइम्सका लागि काम गरेका थिए ।