प्रधानमन्त्री प्रचण्डले भनेझैँ तत्काल हाइड्रोजन कार चढ्न कति सम्भव ?

A+ A A-

हाइड्रोजन फ्युललाई भविष्यको इन्धन पनि भनिन्छ । हाल यो इन्धन सवारीसाधन, अन्तरीक्षयानलगायतमा परीक्षण भइरहेको छ । २३ फागुन २०७९ मा प्रधानमन्त्री पुष्पकमल दाहाल 'प्रचण्ड'ले हाइड्रोजन गाडी चढ्ने योजना रहेको बताए ।

सोलुखोला–दूधकोशी जलविद्युत् आयोजनाको काठमाडौंबाट उद्घाटन गर्दै प्रचण्डले विद्युत् प्राधिकरणका कार्यकारी निर्देशक कुलमान घिसिङले डिजेल र पेट्रोलको विकल्पमा हाइड्रोजन गाडी चढ्न सल्लाह दिएको र त्यस विषयमा छलफल चलाएको बताए ।

प्रचण्डले भनेझैँ सजिलै हाइड्रोजन गाडी चढ्न सकिएला त ?

अहिले विश्व बजारमा हाइड्रोजन फ्युल गाडीलाई त्यति सफल मानिँदैन । टोयोटा, होण्डा, हुण्डाईलगायतका कम्पनीले हाइड्रोजन फ्युल सेल बेस्ड रिसर्च र डेभलभमेन्ट सन् २००० अघिदेखि नै सुरु गरेका थिए । २० वर्षभन्दा लामो समयमा टोयोटाले मात्र हाइड्रोजन गाडीका लागि अर्बौं डलर खर्च गरिसकेको छ ।

फलस्वरुप टोयोटाले हाइड्रोजन फ्युल सेल बेस्ड ‘मिराई’ बजारमा ल्यायो । तर, संसारमै सबैभन्दा धेरै बिक्री भएको हाइड्रोजन फ्युल सेल बेस्ड गाडी मिराई २०१४ देखि हालसम्म जम्मा १८ हजार युनिट मात्र बिक्री भएको छ ।

फ्युल सेल बेस्ड गाडी सामान्य विद्युतीयभन्दा एड्भन्स हो । यो फ्युल ५ मिनेटमा भर्न सकिन्छ र फ्युल भरेपछि ६ सय किलोमिटरसम्म गुड्न सकिन्छ । विद्युतीय गाडीको हेर्ने हो भने डीसी फास्ट चार्जरले चार्ज गर्दा पनि ३० मिनेट लाग्छ । फस्ट चार्ज गर्दा ब्याट्रीको आयु घट्ने विभिन्न अनुसन्धानले देखाएको छ ।

त्यसो भए ग्राहकले किन रुचाएनन् त हाइड्रोजन फ्युल बेस्ड गाडी ?

यसको मुख्य कारण पूर्वाधार नै हो । बेलायतकै कुरा गर्ने हो भने हाल ३५ हजारको आसपास चार्जिङ स्टेसन छ । त्यहा १५ वटा मात्र हाइड्रोजन फ्युल सेल पम्प छन् । यसकारण प्रयोग कर्ताले झञ्झट बेहुर्नुपरेको छ ।

बेलायत जस्तो देशले यसको भौतिक पूर्वाधारमा अघि बढ्न सकेको छैन भने नेपाललाई तत्काल अति नै कठिन छ । त्यस्तै, यो अति प्रज्वलन्सिल पदार्थ भएकाले यसलाई ढुवानी र भण्डारण गर्न पनि उच्चस्तरीय संरचनाको आवश्यक पर्छ ।

त्यस्तै अटोमोबाइल कम्पनीहरू हाइड्रोजन फ्युल बेस्ड गाडीमा अझै पनि रिसर्चकै चरणमा छन् । त्यसकारण पनि ग्राहकको रुचाईमा परेनन् । प्रधानमन्त्रीले आफूले हाइड्रोजन फ्युल बेस्ड गाडी चढ्न त सक्लान तर यसलाई सर्वसाधारणको पहुचमा ल्याउने अझै लामो समय लाग्ने देखिन्छ ।

प्रकाशित मिति: बिहीबार, चैत १६, २०७९ १९:१९