भारतमा ७० वर्षमा पहिलोपटक जन्मिए लोपोन्मुख चिता, प्रधानमन्त्री मोदी खुसीले गदगद

भारतमा ७० वर्षमा पहिलोपटक जन्मिए लोपोन्मुख चिता, प्रधानमन्त्री मोदी खुसीले गदगद

A+ A A-

भारतमा ७० वर्षमा पहिलोपटक लोपोन्मुख चिताहरू जन्मिएका छन् । भारतको वातावरण, वन तथा जलवायु परिवर्तनमन्त्री भूपेन्दर यादवले बुधबार चार चिता जन्मिएको जानकारी दिएका हुन् ।

सन् १९५३ मै भारतमा चिता लोप भइसकेको घोषणा गरिएको थियो । तर, चिता जोगाउने अभियानका साथ गत वर्षयता भारतले विभिन्न देशबाट २४ चिता ल्याइसकेको छ ।

मध्य प्रदेशमा रहेको कुनो राष्ट्रिय निकुञ्ज वन्यजन्तु आरक्षण क्षेत्रमा ती चिताहरू छाडिएका छन् । सोही राष्ट्रिय निकुञ्जमा चार चिता जन्मिएका हुन् ।

गत महिना मात्र दक्षिण अफ्रिकाबाट भारतले १२ चिता ल्याएको थियो । हाल जन्मिएका चार चिताचाहिँ गतवर्षको सेप्टेम्बरमा नामिबियाबाट ल्याइएका १२ चितामध्ये एक पोथी चिताबाट जन्मिएका हुन् ।

भारतका प्रधानमन्त्री नरेन्द्र मोदीले आफ्नो देशमा ७० वर्षमा पहिलोपटक चिता जन्मिएपछि खुसी व्यक्त गरेका छन् । उनले फेसबुक र ट्वीटरमा अद्भुत समाचार भन्दै चिताका भिडियाे शेयर गरेका छन् ।

जलवायु परिवर्तन, वासस्थान विनाश र शिकारीका कारण चिताको संख्या दिनदिनै घट्दै गएको विश्व वन्यजन्तु कोष डब्लूडब्लूएफले जनाएको छ ।

Wonderful news. https://t.co/oPvVBNlhqC

— Narendra Modi (@narendramodi) March 29, 2023

कोषका अनुसार हाल विश्वमा ७ हजार चिताहरू मात्र जीवित छन् । दक्षिण र पूर्वी अफ्रिकी देशहरू नामिबिया, बोत्सवाना, केन्या र तान्जनियामा मात्र चिता पाइन्छन् ।

ब्रिटिस औपनिवेशिक शासनअन्तर्गत भारतभरका जंगलहरू बस्तीहरू विकास गर्न र व्यवस्थित वृक्षरोपण गर्न फाँडिएको थियो । जसको परिणामस्वरूप चिताले बासस्थान गुमाउँदा त्यहाँबाट चिता लोप भएको थियो ।

डेकन हेराल्डका अनुसार सन् १९४७ मा मध्य प्रदेशका महाराजा रमानुज प्रताप सिंहले भारतमा बचेका अन्तिम तीन चिता बन्दुकले हानेर मारेका थिए ।

चिता सबैभन्दा तीव्र गतिमा कुद्ने पृथ्वीको स्थल प्राणी हो । बीबीसीको सहयोगमा

प्रकाशित मिति: बिहीबार, चैत १६, २०७९ १४:२५