चुनावको आह्वान गरेको म्यानमारका सैन्य शासकद्वारा ४० राजनीतिक दलको वैधता खारेज

चुनावको आह्वान गरेको म्यानमारका सैन्य शासकद्वारा ४० राजनीतिक दलको वैधता खारेज

सैन्य सरकारका प्रमुख जनरल मिन अङ लाइङ

A+ A A-

म्यानमारको सैन्य शासकले त्यहाँका ४० राजनीतिक दलको वैधतालाई खारेज गरिदिएको छ । सेना प्रमुख मिन अङ लाइङले विरोधीलाई सिध्याइदिने धम्की दिएको केही दिनमै त्यहाँको जुन्ता शासकले राजनीतिक पार्टीहरूलाई खारेज गरिदिएको हो ।

नोबल शान्ति पुरस्कार पाएकी आङ साङ सूचीको नेस्नल लिग फर डेमोक्रेसी पार्टीको वैधता पनि खारेज भएको छ । अमेरिकाले सैन्य शासकको यस्तो गतिविधिको विरोध जनाएको छ ।

सेना नियन्त्रित निर्वाचन आयोगकका अनुसार सूचीको पार्टी र अन्य पार्टीहरूले सैन्य शासनअनुसार पार्टी पुनः दर्ता नगरेका कारण उनीहरूको वैधता खारेज गर्नु परेको हो । सन् २०२१ फेब्रुअरीमा सूचीको पार्टीको सरकारलाई अपदस्थ गर्दै सेनाले सत्ता हातमा लिएको थियो । यतिबेला सेनाले चुनावको आह्वान त गरेको छ तर त्यहाँ चुनाव लड्ने पार्टीहरू खारेज भएपछि यस कार्यलाई सेनाको सत्तामै बस्ने चाहनाको रूपमा हेरिएको छ ।

अमेरिकाले म्यानमारको आलोचना गर्दा म्यानमारलाई पुरानो नाम बर्माबाट सम्बोधन गरेको छ । अमेरिका भन्छ,‘बर्मामा कुनै पनि निर्वाचनलाई सबै सरोकारवालाहरूको सहभागिताबिना स्वतन्त्र वा निष्पक्ष मान्न सकिँदैन । साथै सैन्य शासनको व्यापक विरोधलाई ध्यानमा राख्दै, चुनाव गराउने एकपक्षीय निर्णयले अस्थिरता बढाउने सम्भावना छ ।’

केही दिनअगाडि मात्र सैन्य सरकारका प्रमुख जनरल मिन अङ लाइङले सैनिक शासनको विरोध गर्नेहरू आतंकवादी भएको बताएका थिए । सेनाको वार्षिक सैन्य परेडमा उनले सैन्य सरकारको विरोध गर्नेहरूलाई दमन गरेर सकाइदिने पनि चेतावनी दिएका थिए । म्यानमारमा मानवअधिकारको अवस्थाबारे प्रश्न उठाउने देशहरूलाई पनि लाइङले आतंकवादीको समर्थक भनेका थिए । एएफपी