मनै लाेभ्याउने गाभर भ्याली

A+ A A-

बाँके जिल्लामा घुम्न लायक स्थल बनेको छ गाभर भ्याली, जो बैजनाथ गाउँपालिका- १ मा छ, त्यही रमाइलो भ्यालीभित्र घुम्न आउने पाहुनाको आतिथ्यता अनि आफ्नो होमस्टेभित्र रमाएका छन् एक कमर्सिल पर्यटन व्यवसायी गणेश दहित । गणेश दहित र उनको परिवारको बाँके बसाइँ सराइको पनि कथा अलग्गै छ ।

बाँकेको उत्कृष्ट पर्यटकीय गाउँका रूपमा प्रसिद्ध गाभर भ्यालीनजिकैको च्यामा गाउँमा गणेशका हजुरबुबा २००५ सालमा दाङबाट बसाइँ सरेर आएको सुनाए गणेशले । त्यो समय चाँदीका ३६० कम्पनी सिक्का दिएर उनका बाजेले च्यामामा १२ बिघा जग्गा किनेका रहेछन् । जंगली हात्ती अनि डाकाको निकै डर त छँदै थियो, त्यसमाथि औलोको पनि डर । त्यति हुँदाहुँदै पनि बाजेले संघर्षपूर्ण रूपमा बसोबास गरेको गर्विलो कथा सुनाए उनले ।

१७ वर्षको हुँदा उनले विभिन्न अन्तर्राष्ट्रिय गैरसरकारी संस्थामा काम गरे । अनि त्यसपछि उनले ३ कट्ठा नम्बरी र ३.५ कट्ठा ऐलानी जग्गा किने गाभरमा, जहाँ न बाटो थियो, न त खाली जमिन नै । वरिपरि जङ्गल थियो । त्यो जमिन किनेर उनले झाडी फाँडे, त्यसपछि झण्डै २ लाख रुपैयाँ खर्च गरेर बाटो बनाए । अनि उनले आफ्नो जिन्दगीको कमाइ हिम्मत गरेर खर्चिए गाभरमा । उनले गाभरमा होमस्टे र अन्य सुन्दर संरचना निर्माण गर्न झण्डै ७० लाख रुपैयाँ खर्चिए ।

हुन पनि उनको होमस्टे पस्नेबित्तिकै पाहुना त्यसै खुसी हुन्छन् । उनले आफ्नै कन्सेप्टमा त्यहाँभित्रका संरचना निर्माण गरेको सुनाए । उनले ठूलो रकम खर्च गरेर काम सुरु गर्नेबित्तिकै कोभिड महामारीले पिरल्यो । उनलाई त्यो समय टिक्न पनि निकै नै धौधौ भयो । तर पनि उनले हिम्मत हारेनन् । समय केही सहज भएपछि पाहुनाको चहलपहल बढ्यो । अहिले उनको आफ्नो परिवार सबै होमस्टेमा समर्पित छन् भने छिमेकी ३ जनालाई समेत रोजगारी दिएको उनले सुनाए ।

गाभर भ्यालीमा विभिन्न ठाउँबाट पर्यटकहरू घुम्न आए पनि प्राय: शुक्रबार र शनिबार प्रमुख रूपमा बाँके जिल्लाकै स्थानीय पर्यटकहरू बढी आउने गरेको गणेशले सुनाए । उनले अहिलेको ट्रेन्डलाई ध्यान दिएर होमस्टेलाई अगाडि बढाएको सुनाए । अहिलेको पुस्ता फेसबुक/ टिकटकलगायतका सामाजिक सञ्जालमा बढी रमाउँछ्न् । त्यसैले उनले आफ्नो होमस्टे रहेको साढे ६ कट्ठा जग्गामा टिकटक बनाउने स्थल र सेल्फी जोनहरू थुप्रै तयार गरेका छन् ।

गाभार भ्याली बाँके राष्ट्रिय निकुञ्जको मध्यवर्ती क्षेत्रमा अवस्थित छ, जहाँ रारा राष्ट्रिय निकुञ्जबाट बसाइँ सारिएका मुगालीहरू र दाङबाट बसाइँ सरेर आएका थारूहरूको बसोबास छ । मुगाली खाना र त्यहाँको संस्कार अनि थारू खाना तथा संस्कारको रमाइलो जमघट छ, गाभर भ्यालीमा ।

गणेशले आफ्नो होमस्टेलाई 'अम्ब्रेला होमस्टे'को नाम दिएका छन् । उनकोमा आउने पाहुनाहरूले विशेष गरी थारू परिकार नै बढी रुचाउँछ्न् । बस्नलाई ४ कोठा र दिउँसो खाना/ खाजा खानलाई उनका प्रशस्त कटेजहरू छन् । शुल्क लिएर फोटो / भिडियो खिच्न थारू वेशभूषासमेत उनले पाहुनालाई उपलब्ध गराउने गरेका छन् ।

होमस्टे सञ्चालकहरूलाई क्षमता अभिवृद्धिका लागि विभिन्न तालिमहरू र अन्यत्र ठाउँका होमस्टेहरूको भ्रमण र यहाँको होमस्टेको प्रचारप्रसारमा स्थानीय सरकार, प्रदेश सरकार र पर्यटनसँग सरोकार राख्ने सरकारी तथा गैरसरकारी क्षेत्रबाट योगदान हुनुपर्ने उनको सुझाव छ । तर, अहिलेसम्म आफूले त्यो रूपमा कहीँकतैबाट सहयोग नपाएको उनले सुनाए ।

गाभर भ्यालीमा बसेर वरिपरिको गाउँ घुम्न र बाँके राष्ट्रिय निकुञ्ज भ्रमण गर्न सकिन्छ । अहिले गाभार भ्याली पूर्ण रूपमा पर्यटकीय गाउँ बनेको छ । त्यहाँ नयाँनयाँ होमस्टेहरू पनि थपिँदै गएका छन् । बाँके निकुञ्जमा पाटे बाघ, चौका, चित्तललगायतका थुप्रै जनावरहरूका साथै धेरै प्रजातिका चराहरूसमेत अवलोकन गर्न पाइन्छ । बाँके निकुञ्ज नयाँ भएकाले पनि त्यति धेरै प्रचारप्रसार हुन सकेको छैन ।

बाँके निकुञ्जलाई आधार बनाएर कोहलपुर र त्यसआसपासका गाउँहरूमा पर्यटकीय पूर्वाधारहरू बनाउन सके पर्यटकको चहलपहल बढ्ने उनको भनाइ छ । त्यसो गर्न सके बाँके जिल्लालाई पर्यटनको माध्यमबाट चिनाउनुका साथै जिल्लाको समग्र आर्थिक समृद्धिका लागि एउटा बलियो आधार तयार हुनेमा दुई मत छैन ।

प्रकाशित मिति: शनिबार, चैत १८, २०७९ ०८:४९