विराट गोल्डकपः फाइनलअघि के भन्छन् विराटनगर र लुका सकरका प्रशिक्षक ?

A+ A A-

सातौँ संस्करणको विराट गोल्डकप फुटबलको उपाधिका लागि घरेलु टिम विराटनगर सिटी र पाहुना टोली भारतको लुका सकर क्लबबीच प्रतिस्पर्धा हुँदैछ । बिहीबार हुने फाइनलमा यी दुवै टिम उपाधि जित्नेमा आत्मविश्वासी देखिएका छन् ।

खेल शहीद रंगशालामा बिहीबार साँझ ६ः४५ बजे हुनेछ । भारतको लुका सकर पहिलोपटक विराट गोल्डकपको उपाधि जित्ने लक्ष्यमा छ । यता, घरेलु टोली विराटनगर ६१ वर्षपछि दोस्रोपटक विराट गोल्डकपको उपाधि जित्ने दाउमा छ ।

विराटनगर नेपाल पुलिस र जावलाखेललाई हराउँदै फाइनलमा प्रवेश गरेको हो । विराटनगरले क्वाटरफाइनलमा नेपाल पुलिसलाई १-० र सेमिफाइनलमा जावलाखेललाई २-१ गोलले हराउँदै उपाधि नजिक पुगेको हो । त्यस्तै, विराट गोल्डकपमा पहिलोपटक भाग लिएको लुका सकर क्वाटरफाइनलमा संकटा क्लबलाई सडनडेथमा ८-७ ले हराउँदै अन्तिम चारमा पुगेको थियो । सेमिफाइनलमा लुका सकारले साविक विजेता विभागीय टिम नेपाल एपीएफलाई टाइब्रेकरमा ४-२ गोलले हराएर फाइनलमा स्थान पक्का गरेको हो ।

लुका सकर र घरेलु टिम विराटनगरबीच फुटबल मैदानमा पहिलोपल्ट भेट हुँदैछ । साविक विजेता एपीएफ र लिग खेल्दै आएको ‘ए’ डिभिजन टिम संकटाजस्तो सशक्त टिमलाई पराजित गरेर फाइनल यात्रा तय गरेकाले लुका सकरका खेलाडीमा मनोबल उच्च देखिन्छ ।

घरेलु टोलीले तेस्रोपटक आफूलाई प्रतियोगिताको उपाधि नजिक पुर्‍याएको हो । विराटनगर ६१ वर्षपछि फाइनल पुगेको हो । यसअघि २०१८ सालमा तत्कालीन महेन्द्र गोल्डकपमा घरेलु टिम मोरङ ११ फाइनलमा पुगेर उपविजेता भएको थियो । त्यसबेलाको पहिलो उपाधि भारतको कलकत्ताले गोल्डकपको उपाधि जितेको थियो ।

२०१९ सालमा मोरङ ११ ले उपाधि जितेको थियो । त्यसपछि घरेलु टिम फाइनलमा पहिलोपटक पुगेको हो । गत वर्षको लिग विजेता मछिन्द्र क्लबको सेटलाई मैदानमा उतारेको आयोजक विराटनगरले सेमिफाइनल खेलबाट विमल घर्ती मगरलाई पनि मैदानमा उतारेको छ । घरेलु टिमलाई फाइनलमा पुर्‍याउन विमलले महत्त्वपूर्ण भूमिका खेलेका थिए । उनले निकालेका दुवै क्रस पासमा विराटनगरले संकटलाई २-१ गोलले पराजित गरेको थियो ।

आज भएको प्रि-म्याच कन्फ्रेन्समा विराट गोल्डकपको फाइनलअघि दुवै टिमका प्रशिक्षक र कप्तानले उपाधि जित्न खेल्ने बताएका छन् । विराटनगर सिटीका प्रशिक्षक सन्तोष न्यौपानले घरेलु मैदानमा विराट गोल्डकपमा टिमको लक्ष्य उपाधि जित्नु रहेको बताए । ‘विराट गोल्डकपको फाइनलमा पुगेका छौँ । उपाधि उचाल्ने प्रयास रहने छ,’ उनले भने ‘दुई लक्ष्य लिएर आएका थियौं । एउटा उपाधि र अर्को फाइनल पुग्ने । एउटा पूरा भयो अर्को भोलि हुन्छ ।’

विराटनगर सिटीका कप्तान विशाल श्रेष्ठले घरेलु दर्शकको साथ र हौसलाले उपाधि जित्ने दाबी गरे । ‘लुका सकर राम्रो टिम हो । अग्ला कद भएका खेलाडी छन् । त्यही भएर हामी टेक्निकल खेल प्रर्दशन गर्नेछौँ,’ उनले भने ।

लुका सकर क्लबका प्रशिक्षक नभास नोकाले फाइनलभन्दा अगाडि जसरी हाम्रा खेलाडी खेल खेलेका थिए, त्यही अनुरुप फाइनल खेल्ने बताए । ‘हामीलाई थाहा छ यो धेरै प्रतिष्ठित प्रतियोगिता हो । त्यसैले हामी यसलाई उठाउन सबैभन्दा राम्रो खेल्ने छौँ,’ उनले भने ।

चैत ९ देखि सुरु भएको रात्रिकालीन गोल्डकपको विजेताले २० लाख १५ हजार र उपविजेता १० लाख १५ हजार रुपैयाँ नगद प्राप्त गर्नेछन् ।

प्रकाशित मिति: बुधबार, चैत १५, २०७९ १३:०७