मधेश प्रदेशका मन्त्रालयहरूको नाम फेरियो, कार्यान्वयन भने अगामी आर्थिक वर्षदेखि

मधेश प्रदेशका मन्त्रालयहरूको नाम फेरियो, कार्यान्वयन भने अगामी आर्थिक वर्षदेखि

A+ A A-

मधेश प्रदेश सरकारले मन्त्रालयहरूको नाम परिवर्तन गरेको छ । प्रदेश सरकारले अगामी आर्थिक वर्षदेखि कार्यान्वयन हुने गरी मन्त्रालयहरूको नाम परिवर्तन गरेको हो ।

प्रदेश मन्त्रिपरिषद्को बैठकले प्रदेश सरकार कार्यविभाजन नियमावली–२०७९ लाई खारेज गर्दै मधेश प्रदेश सरकार कार्यविभाजन नियमावली २०७९ बनाएपछि मन्त्रालयको नाम परिवर्तन गरिएको हो ।

अब प्रदेशमा मुख्यमन्त्री तथा मन्त्रिपरिषद्को कार्यालय, अर्थ मन्त्रालय, उद्योग, वाणिज्य तथा पर्यटन मन्त्रालय, ऊर्जा, सिँचाई तथा खानेपानी मन्त्रालय, गृह, सञ्चार तथा कानुन मन्त्रालय, भूमि व्यवस्था, कृषि तथा सहकारी मन्त्रालय, भौतिक पूर्वाधार विकास मन्त्रालय, वन तथा वातावरण मन्त्रालय, शिक्षा तथा समाज कल्याण मन्त्रालय, स्वास्थ्य तथा जनसंख्या मन्त्रालय र श्रम तथा यातायात मन्त्रालय कायम भएको छ ।

मन्त्रालयको नाम परिवर्तन गरे पनि कार्यान्वयन भने अगामी आर्थिक वर्षदेखि हुने भूमि व्यवस्था कृषि तथा सहकारीमन्त्री बसन्त कुश्वाहाले जानकारी दिए । चालु आर्थिक वर्षमा बजेट विनियोजन भइसकेकोले अगामी आर्थिक वर्षदेखि मन्त्रालयको नाम र मन्त्रीहरूको जिम्मेवारी फेरफेर हुने उनको भनाइ छ ।

यसअघि मुख्यमन्त्री तथा मन्त्रिपरिषद्को कार्यालयलगायत अर्थ मन्त्रालय, गृह तथा सञ्चार मन्त्रालय, उद्योग, पर्यटन तथा वन मन्त्रालय, भौतिक पूर्वाधार विकास मन्त्रालय, भूमि व्यवस्था, कृषि तथा सहकारी मन्त्रालय, सामाजिक विकास मन्त्रालय, खानेपानी तथा ऊर्जा विकास मन्त्रालय, कानुन, न्याय तथा प्रदेशसभा मामिला मन्त्रालय, महिला, बालबालिका, युवा तथा खेलकुद मन्त्रालय र शिक्षा, विज्ञान, प्रविधि तथा वाणिज्य मन्त्रालयसहित ११ वटा मन्त्रालय रहेका थिए ।