सांसद पद खारेज भएपछि गान्धीलाई सरकारी आवास पनि खाली गर्न भनियो

राहुल गान्धी ।

A+ A A-

भारतको संसद ‘लोकसभा’को सदस्यता खारेज भएपछि कंग्रेस आईका पूर्वअध्यक्ष राहुल गान्धीलाई सरकारी आवास खाली गर्न निर्देशन दिइएको छ ।

सोमबार मात्र लोकसभा सचिवालयले पत्र लेख्दै गान्धीलाई अब सांसद नरहेकाले केही दिनमै सरकारी आवास छाड्न निर्देशन दिएको थियो । गान्धीले जवाफमा आफूले पत्रमा भनिएका सबै विवरणको पालना गर्ने बताएका छन् ।

गान्धीले भनेका छन्, ‘विगत चार कार्यकालमा लोकसभाको निर्वाचित सदस्यको हैसियतमा जनताको जनादेशका कारण म यहाँ बसेको सम्झनाहरू ताजा छन् । मेरो अधिकारको रक्षा नगरी म तपाईंको पत्रमा दिइएका विवरणहरू पालना गर्नेछु ।’

अदालतले गान्धीलाई दुई वर्षको जेल सजाय सुनाएको भोलिपल्ट गत शुक्रबार भारतीय संसद सचिवालयले उनको पद रद्द गरेको थियो । भारतको केरला राज्यको वायनाडबाट लोकसभा सदस्य निर्वाचित गान्धीको संसद पद खारेज भएपछि कंग्रेस आईका सांसदहरूले विरोधमा सोमबार कालो पोशाक लगाएर संसद प्रवेश गरेका थिए ।

गान्धीलाई गुजरातको सुरत जिल्ला अदालतले दुई वर्षको जेल सजाय सुनाएकाले उनको पद गएको भारतीय सञ्चारमाध्यमहरूले जनाएका छन् । उनी यस कानुनअनुसार अब ६ वर्ष चुनाव पनि लड्न पाउँदैनन् ।

यद्यपि, संसद सचिवालयको यो निर्णय र अदालतको फैसलाविरुद्ध पुनरावेदन गर्न सक्नेछन् । सन् २०१९ को चुनावको समयमा गान्धीले ‘सबै चोरको सरनेम मोदी किन हुन्छ’ भन्दै भाषण गरेका थिए । सोही विषयमा अदालतले उनलाई २ वर्षको जेल सजाय सुनाइएको हो ।

कंग्रेसले गान्धीको संसद पद गुम्नुमा वर्तमान भाजपा सरकार दोषी रहेको भन्दै विरोध जनाइरहेका छन् । कंग्रेस आईका अध्यक्ष मल्लिकार्जुन खड्गेले गान्धीको पद खारेजीपछि ‘मोदीको भारतमा लोकतन्त्रको अन्त्य’ भएको टिप्पणी गरेका छन् ।

खड्गेले एएनआईसँग भनेका छन्, ‘हामी किन कालो कपडामा यहाँ छौँ ? हामी देखाउन चाहन्छौँ कि प्रधानमन्त्री मोदीले देशमा प्रजातन्त्र समाप्त गर्दैछन् । उनले पहिले स्वायत्त निकायहरू समाप्त गरे, त्यसपछि उनीहरूले चुनाव जितेकाहरूलाई धम्की दिएर जताततै आफ्नै सरकार खडा गरे । त्यसपछि नझुक्नेलाई झुकाउन सरकारी संयन्त्र प्रयोग गरे ।’

प्रकाशित मिति: मंगलबार, चैत १४, २०७९ १५:२७