तनहुँ-१ मा एमालेबाट किरण र सर्वेन्द्रको चर्चा, जोशीले सघाउने आस !

A+ A A-

तनहुँ १ बाट प्रतिनिधिसभा सदस्य निर्वाचित रामचन्द्र पौडेल राष्ट्रपति बनेपछि १० वैशाखमा उपनिर्वाचन हुँदैछ । कांग्रेसले केन्द्रीय सदस्य गोविन्द भट्टराईलाई प्रतिनिधिसभा सदस्यमा उठाउने तयारी गरिरहेको छ । उनी ४ मंसिरकै चुनाव लड्न चाहन्थे । टिकट नपाएपछि स्वतन्त्र उम्मेदवारी दिने भट्टराईको तयारी थियो ।

रामचन्द्रले राष्ट्रियसभामा लैजाने आश्वासन दिएपछि उनी तत्काललाई चुपचाप बसेका थिए । भट्टराईलाई टिकट दिन रामचन्द्र त्यही कारण पनि सकारात्मक छन् । औपचारिक रूपमा भट्टराईको नाम उम्मेदवार भनेर घोषणा भएको छैन । तर, उनले टिकट पाउने पक्का छ । तनहुँ-१ मा राष्ट्रपति रामचन्द्रनिकट गण्डकी प्रदेशका पूर्वआन्तरिक मामिलामन्त्री डोबाटे विश्वकर्माको पनि दाबी छ ।

एमालेले कसलाई उठाउँछ ?

गठबन्धन एकजुट भएको अवस्थामा एमालेलाई चुनाव जित्न असहज देखिन्छ । तर, त्यहाँ चुनाव लड्न स्थायी कमिटी सदस्य किरण गुरुङ र पूर्वप्रहरी महानिरीक्षक सर्वेन्द्र खनालले चाहना राखेका छन् । ‘सर्वेन्द्रजी आफ्नै ठाउँबाट भनेर यो क्षेत्रबाट लड्ने सोचमा रहेको सुनिन्छ । पात्र पार्टीले नै टुंगो लगाऊला,’ एमाले तनहुँ उपाध्यक्ष हरिराज कँडेलले शिलापत्रसँग भने, ‘हामीले आकांक्षीको नाम पठाउँछौँ । निर्णय पार्टी केन्द्रले गर्छ ।’

खनालको जन्मथलो तनहुँ १ मै पर्ने व्यास नगरपालिका- ११, तनहुँसुर हो । गण्डकीका पूर्वअर्थमन्त्री गुरुङको भूगोल तनहुँ-२ हो । ४ मंसिरको चुनावमा त्यो क्षेत्रमा नेपाली कांग्रेसका शंकर भण्डारीसँग उनी पराजित भएका थिए । पूर्वआईजीपी खनाल काठमाडौं ६ मा राष्ट्रिय स्वतन्त्र पार्टीका शिशिर खनालसँग पराजित भएका थिए ।

४ मंसिरको चुनावमा तनहुँ १ मा रामचन्द्र पौडेलले नेकपा एमालेका एकबहादुर रानालाई पराजित गरेका थिए । पौडेलले २५ हजार ३१८ र रानाले १९ हजार ९४३ मत ल्याएका थिए । तनहुँमा कांग्रेस पूर्वसहमहामन्त्री गोविन्दराज जोशीका समर्थक छन् । वैशाखमा भएको स्थानीय तह चुनावमा एमालेले जोशीका छोरा दीपकलाई व्यास नगरपालिकाको मेयरमा सहयोग गरेको थियो । मंसिरको चुनावमा जोशीले एमालेलाई सहयोग गर्ने चर्चा थियो ।

तर, जोशी आफैँ चुनाव लडे । जोशीले यो चुनावमा एमालेको सहयोग लिने वा एमालेलाई सहयोग गर्ने आसमा एमाले तनहुँका नेताहरू छन् । गत मंसिरको चुनावमा रामचन्द्रलाई हराउन भन्दै जोशीले उम्मेदवारी दिँदा रामचन्द्रलाई झनै सजिलो भएको थियो । उक्त चुनावमा जोशीले ६ हजार ८८६ मत ल्याएका थिए । रामचन्द्र र एकबहादुरको मतान्तर ५ हजार ३७५ थियो ।

अहिले एमाले र जोशी समूह एकढिक्का भए चुनाव जित्न सकिने दाबी उपाध्यक्ष कँडेलको छ । ‘मत पहिलाकै जसरी खसेर दुवै एक ठाउँमा हुँदा सहज हुन्छ,’ उनी भन्छन्, ‘यो उपनिर्वाचन हो । पहिला माओवादीले आफू जित्न पनि कांग्रेसलाई मत दिनुपर्थ्यो, कांग्रेसले माओवादीलाई दिनुपर्थ्यो । अहिले त्यस्तो छैन ।’

४ मंसिरको चुनावमा प्रतिनिधिसभामा कांग्रेसका रामचन्द्र, प्रदेशसभा (क) मा कांग्रेसकै अशोककुमार श्रेष्ठ र प्रदेशसभा (ख) मा माओवादी केन्द्रका हरिबहादुर चुमान उम्मेदवार थिए । कँडेलले दाबी गरेअनुसार नै गठबन्धन इमानदार नभएमा कांग्रेसका उम्मेदवारलाई अप्ठ्यारो पर्न सक्छ । तनहुँमा एमालेले एकीकृत समाजवादीका नेतालाई प्रवेश गराएर टिकट दिनेसम्मको चर्चा छ ।

तनहुँ-१ मा एमालेले गठबन्धनका दल यसपटक एकले अर्कोलाई सघाउनुपर्ने बाध्यात्मक अवस्थामा नरहनुको फाइदा उठाउन चाहन्छ । त्यसका लागि सकेसम्म तनहुँ-१ को भूगोलले सुनेको नाम र चिनेको व्यक्ति हुनुपर्ने एमाले तनहुँका नेताहरू एकमत छन् ।

तनहुँ क्षेत्र नम्बर १ मा व्यास नगरपालिकाका १४ मध्ये १२ वडा (५ र ६ नम्बर वडाबाहेक), देवघाट, आँबुखैरेनी, बन्दीपुर गाउँपालिका, भानु नगरपालिका पर्छ । यो क्षेत्रमा गत ४ मंसिरको चुनावका लागि एक लाख २३ हजार ४९० मतदाता थिए । त्यतिबेला ६८ हजार १५८ (५५.१९ प्रतिशत) मत खसेको थियो । आगामी १० वैशाखको उपनिर्वाचनको मतदाता संख्या चैत १६ गतेमात्रै टुंगो लाग्ने जिल्ला निर्वाचन कार्यालय तनहुँका प्रमुख हरिप्रसाद ढकालले जानकारी दिए ।

प्रकाशित मिति: सोमबार, चैत १३, २०७९ १७:१२