दुई जहाज झन्डै ठाेक्किएकाे घटनामा एयर इन्डियाकाे चालक दललाई प्रतिबन्ध, एटीसीलाई पनि कारबाही

दुई जहाज झन्डै ठाेक्किएकाे घटनामा एयर इन्डियाकाे चालक दललाई प्रतिबन्ध, एटीसीलाई पनि कारबाही

A+ A A-

१९ हजार फिटमा उडिरहेको जहाज एकैपटक १५ हजार फिटमा तल झारेर अर्काे जहाजसँग झण्डै ठाेक्किन पुगेकाे घटनामा नेपाल नागरिक उड्डयन प्राधिकरणले एयर इन्डियाका चालक दललाई नेपाल उडानमा प्रतिबन्ध लगाएकाे छ । साथै टावरमा कार्यरत तीन जना एयर ट्राफिक कन्ट्रोलर (एटीसी)लाई समेत कारबाही गरिएकाे छ ।

गत शुक्रबार मलेसियाको क्वालालम्पुरबाट काठमाडौं आइरहेको नेपाल एयरलाइन्स र दिल्लीबाट काठमाडौं आइरहेको एयर इन्डियाको जहाज आकाशमा झन्डै ठोक्किएका थिए । नेपाल नागरिक उड्डयन प्राधिकरणका अनुसार १९ हजार फिटमा रहेको एयर इन्डियाको जहाज एक्कासि १५ हजार फिटमा झर्दा तीन सय फिट नजिकै रहेको नेपाल एयरलाइन्सको जहाजसँग झन्डै ठोक्किएको थियो ।

यो घटनाबारे छानबिन गर्न दुई सदस्यीय समिति गठन गरेर एयर इन्डियाका चालक दललाई तत्कालका लागि नेपालमा हुने उडानमा प्रतिबन्ध र त्रिभुवन अन्तर्राष्ट्रिय विमानस्थलस्थित टावरमा कार्यरत तीन जना एटीसीलाई कारबाही गरिएको प्राधिकरणका प्रवक्ता जगन्नाथ निरौलाले जानकारी दिए । ‘एयर इन्डियाका चालक दललाई थप कारबाहीका लागि भारतीय नागरिक उड्डयन कार्यालयको हवाई सुरक्षा विभागलाई पत्राचार गरेका छौँ’, निराैलाले भने ।

उनले एउटै उचाइमा दुईवटा जहाजलाई एकै पटक उडान अनुमति दिइएको विषयमा पनि अनुसन्धान भइरहेकाे जानकारी दिए । घटना भएको समयमा टावरमा रहेका एटिसीलाई ‘एक्टिभ पोजिसन’ मा काम गर्न रोक लगाएर अनुसन्धान भइरहेकाे उनले जानकारी दिए ।

प्रवक्ता निराैलाका अनुसार छानबिन समितिको अध्ययन प्रतिवेदन नआउँदासम्म तीन जना एटीसीले काम गर्न पाउने छैनन् । दुई जहाज एकै ठाउँमा होल्ड गर्दा कम्तीमा हजार मिटर उचाइको दूरी हुनुपर्ने प्रावधान छ ।

एयर इन्डियाको जहाज १५ हजार फिटमा आइसकेको जानकारी एकैचोटि एटीसीले राडरमार्फत पाएका थिए । दुईवटा जहाजको दूरी एकदम नजिक भएपछि निगमको जहाज चेतावनी प्रणालीले जहाज ठोक्किन सक्ने सूचना सम्प्रेषण गरेपछि नेपाल एयरलाइन्सको जहाज सात हजार फिटमा झरेको थियो । उक्त समय दुईवटै जहाजमा गरी ३५० यात्रु सवार थिए ।

प्रकाशित मिति: सोमबार, चैत १३, २०७९ ०९:०२