यस्तो छ काठमाडौंको सडकमा गुड्न थालेको विद्युतीय ट्याक्सी, कति पर्ला मूल्य ?

A+ A A-

१ चैत २०७२ मा बसेको मन्त्रिपरिषद्को बैठकले २० वर्ष पुराना सम्पूर्ण सार्वजनिक सवारीसाधनहरू २ वर्षभित्र विस्थापन गरिसक्नुपर्ने निर्णय गर्‍यो । उक्त निर्यणअनुसार यो वर्ष २००२/२००३ मोडलका ३ हजार ५ सयभन्दा धेरै ट्याक्सी विस्थापित हुँदैछन् ।

त्यस्तै, बागमती प्रदेश सरकारको सन् २०८५ भित्र पेट्रोलियम सार्वजनिक सवारीसाधनलाई विद्युतीयले विस्थापित गर्ने नीतिबमोजिम पाइलट प्रोजेक्टको रूपमा २० वर्ष कटेका ट्याक्सी सट्टाभर्ना गर्दा विद्युतीयमै गर्नुपर्नेछ । बागमती प्रदेशले बनाएको कार्यविधिअनुसार २० वर्ष कटेका सबै ट्याक्सी विद्युतीयमा सट्टा भर्ना हुनुपर्नेछ ।

यही नीतिबमोजिम २० वर्ष कटेका केही ट्याक्सीलाई केही ट्याक्सी व्यवसायीले विद्युतीयमा सट्टा भर्ना गरेका छन् । अहिले उपत्यकाको सडकमा छिटफुट विद्युतीय ट्याक्सी देखिन थालेका छन् ।

बागमती प्रदेशले बनाएको विद्युतीय ट्याक्सीको मापदण्डअनुसार हाल टाटाको लागि नेपालको आधिकारिक वितरक सिप्रदी ट्रेडिङले ‘एक्सप्रेस टी’ मोडलको गाडी ल्याएको छ । कम्पनीले एक्सप्रेस–टी केही युनिट बेचिसकेको छ । त्यसैगरी, यसअघि नेपालमा ट्याक्सी बेचिरहेका सुजुकी र हुण्डाईले भने विद्युतीय ट्याक्सी बेच्ने सोच बनाएको छैन । त्यस्तै, सिजी मोटर्सले पनि विद्युतीय ट्याक्सी ल्याउने तयारी गरिरहेको छ ।

यस्तो छ हाल उपत्यकामा चलिरहेको विद्युतीय ट्याक्सी

हाल नेपाली बजारमा विद्युतीय ट्याक्सीको रूपमा टाटाको ‘एक्सप्रेस–टी’ मात्र उपलब्ध छ । ५५ किलोवाट मोटर र २६ किलोवाट लिथियम आयोन ब्याट्रीजडित यो ट्याक्सीले १७० एनएम टर्क दिन्छ । फुल चार्जमा ३ सय ६ किलोमिटर रेन्ज दिने भनिएको यो ट्याक्सी ५ सिट क्षमताको छ ।

यसको लम्बाइ ३९९३ मिलिमिटर, चौडाइ १६७७ मिलिमिटर, उचाइ १५३२ मिलिमिटर ह्विलबेस २४५० मिलिमिटर र ग्राउन्ड क्लियरेन्स २४५० मिलिमिटर रहेको कम्पनीले जनाएको छ । यो गाडी सामान्य होम चार्जरले ८ घण्टा ४५ मिनेट र डीसी फास्ट चार्जरले ५९ मिनेटमा चार्ज हुने कम्पनीले जनाएको छ ।

यसमा एयर ब्याग, इबीडीसहितको एबीएस, इलेक्ट्रिक विन्डोलगायतका फिचर्स छन् । कम्पनीले यसको ब्याट्री र मोटरमा यसमा ३ वर्ष वा १ लाख २५ हजार किलोमिटर वारेन्टी प्रदान गरेको छ । २० प्रतिशत मात्र डाउन पेमेन्ट गरेर खरिद गर्न सकिने यो गाडीको मूल्य कम्पनीले ३६ लाख ९९ हजार निर्धारण गरेको छ ।

यस्तो छ बागमती प्रदेशले बनाएको विद्युतीय ट्याक्सीको मापदण्ड

श्रम, रोजगार तथा यातायात मन्त्रालय बागमतीले सट्टाभर्ना हुने ट्याक्सीलाई साधारण र विशेष प्रकृतिका गरी दुई प्रकारका स्पेसिफिकेसन बनाएको छ ।

साधारण ट्याक्सी ५ सिट क्षमता, अटोमेटिक ट्रान्समिसन, कम्तीमा २ सय लिटरको बुट स्पेस भएको, ३० वा सोभन्दा धेरै किलोवाटको मोटर, २० किलोवाट वा सोभन्दा धेरै क्षमताको लिथियम आयोन ब्याट्री, सेडान बडी टाइप, कम्तीमा १७० मिलिमिटरको ग्राउन्ड क्लियरेन्स, कम्तीमा २१० किलोमिटर रेन्ज, एयर ब्याग, जीपीएस सिस्टम, एबीएस, सेन्ट्रल लकिङ र रेयर भ्यु क्यामरा अनिवार्य हुनुपर्नेछ ।

त्यसैगरी, विशेष प्रकृतिका ट्याक्सीमा ५ देखि ७ सिट क्षमता, अटोमेटिक ट्रान्समिसन, कम्तीमा २५० लिटर बुट स्पेस, कम्तीमा ५० किलोवाटको मोटर, कम्तीमा ४० किलोवाट आवरको लिथियम आयोन ब्याट्री, सेडान वा भ्यान बडी टाइप, कम्तीमा १७५ मिलिमिटरको ग्राउण्ड क्लियरेन्स, डुअल एयर ब्याग, जीपीएस सिस्टम, कम्तीमा २७५ किलोमिटर रेन्ज, हिल असिस्ट, एबीएस र ईबीडी, सेन्ट्रल लकिङ, पार्किङ सेन्सर, रेयर भ्यु क्यामरा, एसी र साउन्ड सिस्टम हुनुपर्नेछ ।