म्यानमारमा बन्धक बनाइएका नेपालीबारे सरकार अझै बेखबर

A+ A A-

म्यानमारमा बन्धक बनाइएका नेपालीको उद्धारमा कठिनाइ भएको छ । पछिल्लो समय म्यानमार, थाइल्यान्ड र कम्बोडियामा सयै नेपाली बन्धक भएको सूचना प्रहरीको मानव बेचबिखन नियन्त्रण ब्युरोमा पुगेको छ । तर, उद्धारमा भने कठिनाइ भएको ब्युरोका एसपी कृष्ण पंगेनीले बताए ।

‘केही नेपालीलाई चिनियाँ तस्करहरूले बन्धक बनाएर अनलाइनमार्फत ठगी गर्न प्रयोग गरेको खुलेको छ । तर, उनीहरू म्यानमार सरकारको समेत नियन्त्रण बाहिर रहेको कारण उद्धार गर्न कठिन छ,’ एसपी पंगेनीले भने ।

बन्धक बनाएको पुष्टि भए पनि हालसम्म कति नागरिक बन्धक छन् भन्ने यकिन तथ्यांक भने नभएको उनको भनाइ छ । बन्धन बनाइएकाहरूलाई कहिलेकाहीँ मात्रै परिवारको सम्पर्कमा आउने गरेको प्रहरीको भनाइ छ ।

परराष्ट्र मन्त्रालयका प्रवक्ता सेवा लम्सालले म्यानमारमा केही नेपाली बन्धक रहेको सूचना प्राप्त भए पनि त्यसको आधिकारिक तथ्यांक नभएको बताइन् । ‘हामीलाई पीडितको परिवारले आफ्नो मान्छे बन्धक भएको भनेर आधिकारिक डकुमेन्टसहित आएका छैनन् । यद्यपि विभिन्न माध्यमबाट आएका सूचनाको आधारमा दूताबासले काम गरिरहेको छ,’ लम्सालले भनिन् ।

विभिन्न व्यक्तिमार्फत उनीहरू म्यानमार थाइल्यान्ड, कम्बोडिया पुगेको खुलेको छ । प्रहरीका अनुसार हाल म्यानमारबाट उद्धार गरेर नेपाल फर्किएका एक युवाले समेत प्रहरीमा उजुरी दिन अस्वीकार गर्दा प्रहरीलाई तस्कर पक्राउ गरेर अनुसन्धान गर्न असहज भएको छ ।

ब्युरोका एसपी पंगेनीले भने, ‘म्यानमारबाट उद्धार गरेर एक जना नेपाली काठमाडौं फर्किएका छन् । तर, उनले आफूलाई म्यानमार पठाउनेमाथि जाहेरी नदिँदा पक्राउ गर्न सकिएको छैन ।’

चीनसँग सीमा जोडिएका थाइल्यान्ड र म्यानमारको भू–भागमा नेपालीहरू बन्धक बनाइएको छ । बन्धक बनाइएकाहरू आईटीसम्बन्धी जानकार युवाहरू रहेको प्रहरीको भनाइ छ ।

उनीहरूलाई चिनियाँ नागरिकले ठूलो आर्थिक प्रलोभनमा पारेर म्यानमारको विद्रोही क्षेत्रमा पुर्‍याएका हुन् ।

चिनियाँहरूले विभिन्न व्यक्तिलाई क्रिप्टो करेन्सी कारोबारको नाममा लगानी गर्न लगाएर ठगी गर्न लगाउनेदेखि विभिन्न मुलुकका बैंक ह्याक गर्ने काममा खटाउने गरेको खुलेको छ ।

त्यसरी पुग्ने नेपालीलाई बन्धक बनाएर काममा लगाउनेदेखि काम गर्न नसक्नेमाथि शारीरिक यातनासमेत दिने गरेको खुलेको छ ।

नेपाल सरकारले समेत म्यानमारस्थित दूतावासलाई बन्धक बनाइएका नेपालीको खोजी र उद्धार गर्न पत्रचार गरेको छ । तर, नेपालीहरूलाई बन्धक बनाइएको क्षेत्रमा म्यानमार सरकारको समेत उपस्थिति नहुनाले आफूले उद्धार गर्न नसक्ने जवाफ फर्काएको छ ।

याे पनि :