जाडो गएपछि आएको वाटर हिटरको विज्ञापनले 'ट्रोल' भइन् करिश्मा

A+ A A-

अलिअघि सोसल मिडियामा ‘मनाङ चामल’ को विज्ञापन चर्चामा थियो । अहिले अभिनेत्री करिश्मा मानन्धर अभिनित विज्ञापन 'भाइरल' भइरहेको छ ।

सामान्यतः तातो पानीले नुहाइने भनेको जाडो मौसममा हो तर गर्मी लागेपछि चैत ५ गते मध्यान्ह १२ः१० मा करिश्माले फेसबुकमा शेयर गरेकाे विज्ञापनमा सोसल मिडिया प्रयोगकर्ताहरू जमेर कमेन्ट गरिरहेका छन् ।

अक्सर कमेन्टमा विज्ञापन निर्मातालाई गाली अनि करिश्मालाई ‘ट्रोल’ गरिएको छ । नेपाली चलचित्रकी दिग्गज कलाकार भएकाले कतिपयले करिश्मालाई ‘महानायिका’ पनि भन्छन् । विज्ञापनको अभिनयलाई लिएर उनको ‘महानायिका’ पदवीमाथि समेत प्रश्न उठाइएको छ ।

खासमा करिश्माले खेलेको विज्ञापन बोस सोलार वाटर हिटरको हो । उनी दुई वर्षयता बोस होम एप्लायन्सकी ‘ब्राण्ड एम्बेसडर’ छिन् । सन्दर्भसँगै विज्ञापनको स्क्रिप्ट, प्रविधि र करिश्माको अभिनयमाथि धेरैले चित्त नबुझाएकाे देखिन्छ ।

‘सूर्जे कुमारीलाई नि जाडो हुँदो रहेछ, त्यो पनि चैतमा’, करिश्माको पोस्टमुनि सरोज घिमिरेको कमेन्ट छ । करिश्माको न्वारानको नाम सूर्यकुमारी हो ।

कतिपयको भनाइमा करिश्माले ‘ओभर एक्टिङ’ गरेकी छन् । उमेरअनुसारको अभिनय नमिलेको केही टिप्पणी छन् । शिला देवान लेख्छिन्, ‘एक्टिङ गर्न बिर्सनु भएजस्तो छ ।’

विज्ञापनमा करिश्मा टावल लाएर नुहाइरहेकी छन् । ‘टावल लाएर नि कोही नुहाउँछ ?’, विज्ञापन भिडियोको कमेन्टमा धेरैले जवाफ मागेका छन् ।

उनका फ्यान्सले समेत भिडियोको साउण्ड असाध्यै झुर रहेको टिप्पणी गरेका छन् । यसबाहेक थुप्रै दृष्टि र कोणबाट कमेन्टहरू आएका छन् ।

यसबारे दुई दिनअघि नै करिश्माले स्पष्टीकरण दिइसकेकी छन् । उनले प्रचार सामग्री निर्माणमा आफ्नो हात नहुने तथा विज्ञापनलाई सुधार गर्ने बताएकी छन् । तर उनले पाेस्ट गरेकाे विज्ञापन जस्ताकाे त्यस्तै छ ।

विज्ञापनका निर्देशक कुमार न्यौपानेले करिश्माको दोष नरहेको बताए । ‘विज्ञापनको गुणस्तर कम वा उच्चसँग मतलव हुँदैन । मुख्य भनेको आकर्षण हो । विज्ञापन भनेको आकर्षण हो । त्यहाँ कुनै छाडापन छैन, त्यहाँ कुनै नराम्रो संवाद छैन’, न्यौपानेले चाहिँ आफूले बनाएको विज्ञापनको बचाउ गरे ।

प्रकाशित मिति: आइतबार, चैत १२, २०७९ १७:३४