हेटौँडामा स्ववियु निर्वाचनको विवादपछि ज्यान मार्ने धम्की, मिलापत्र गराउन खोज्दै प्रहरी

हेटौँडामा स्ववियु निर्वाचनको विवादपछि ज्यान मार्ने धम्की, मिलापत्र गराउन खोज्दै प्रहरी

तस्वीरमा पीडित धिताल र जिल्ला प्रहरी कार्यालय मकवानपुर ।

A+ A A-

हेटाैँडामा ५ चैतमा सम्पन्न स्ववियु निर्वाचनमा भएको विवादको विषयमा विजेता पक्षलाई ज्यान मार्ने धम्की दिइएको छ । हेटौँडा उपमहानगरपालिका–१६ हटियास्थित जनप्रिय बहुमुखी क्याम्पसमा स्ववियु निर्वाचनमा पराजित गरेको भन्दै नेपाली कांग्रेस निकट युवाहरूले नेकपा एमाले निकट अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) पक्षका कैलाश धिताललाई र उनको परिवारलाई ज्यान मार्ने धम्की दिएको हो ।

पीडित धिताल र उनको श्रीमती आस्था रिजालले जिल्ला प्रहरी कार्यालय मकवानपुरमा ज्यान मार्ने धम्की दिने तीन जनाविरुद्ध किटानी जाहेरी दिएका छन् । हेटौँडा–१६ चिसापानी बस्ने ३० वर्षीय बुद्धिप्रसाद गौतम, ३२ वर्षीय शंकर पनेरु र सोही स्थानका ३३ वर्षीय सुर्वण पौडेलविरुद्ध किटानी जाहेरी परेको हो ।

पीडितले घटनाको प्रमुख योजनाकारका रूपमा पौडेललाई देखाएको छ । पीडित धितालका अनुसार घटना शुक्रबार साँझ ७ बजेको हो । हटिया चिसापानी नजिकै गौरिटारमा बस्दै आएका धिताललाई ज्यान मार्ने धम्की दिइएको र डेरामै पुगेर उनको श्रीमतीलाई अपशब्द बोल्दै हातपात प्रयास भएको जाहेरीमा उल्लेख छ ।

स्थानीय निजी विद्यालयमा प्रधानाध्यापकको काम गर्दै आएका धितालको श्रीमती रिजाल मात्रै कोठामा भएको अवस्थामा पौडेलको समूह पुगेका थियाे । उनीहरूले आफ्नो कोठामा आई अश्लील शब्द प्रयोग गरी हातपात गर्ने प्रयास र अभद्र व्यवहार गरेको पीडित रिजालले जानकारी दिएकी छन् । कोठामा धिताललाई नभेटेपछि धम्की दिने पौडेल र पनेरुले फोनबाटै ज्यान मार्ने धम्की दिएका हुन् ।

ज्यान मार्ने धम्की दिएको अडियो शिलापत्रसँग सुरक्षित रहेको छ । अडियोमा पौडेलले अपशब्द प्रयोग गर्दै ज्यान मार्ने धम्की दिएका छन् । पौडेलपछि पनेरुले पनि ज्यान मार्ने धम्की दिएको अडियोबाट खुल्न आउँछ । धिताललाई उनको घरबाटै उठाइदिनेसम्मको धम्की दिइएको छ । आरोपी पौडेल स्ववियु निर्वाचनमा नेपाल विद्यार्थी संघ (नेविसंघ)को तर्फबाट बुथ प्रतिनिधि बसेका थिए । धिताल अनेरास्ववियुलाई जिताउन कमाण्डरको रूपमा खटिएका थिए ।

उनी नेकपा एमाले निकट बुद्धिजीवि जिल्ला परिषद्को सदस्यसमेत छन् । जनप्रियमा नेविसंघ, माओवादी केन्द्र निकट अखिल (क्रान्तिकारी) र राप्रपा नेपाल निकटको राष्ट्रिय प्रजातान्त्रिक विद्यार्थी संघ (राप्रविसंघ) को गठबन्धनसँग अनेरास्ववियु, नेकपा (एकीकृत समाजवादी) निकट अनेरास्ववियू र नेत्रविक्रम चन्द विप्लव नेतृत्वको नेकपा निकट अखिल (क्रान्तिकारी)को गठबन्धनले निर्वाचनमा प्रतिस्पर्धा गरेको थियो ।

स्ववियु निर्वाचनमा दुवै गठबन्धनमा लागेको भागवण्डाअनुसार नेविसंघले र विप्लव (क्रान्तिकारी)ले सभापति लिएका थिए । जसमा विप्लव क्रान्तिकारी, अनेरास्ववियूको पूरा प्यानलले जित हासिल गरेको थियो । निर्वाचनमा लागेर हराएको भन्दै पौडेल पक्षले आफूमाथि आक्रमणको प्रयासले कोठामै पुगेको र नभेटेपछि फोनबाट ज्यान मार्ने धम्की दिएको पीडित धितालले जानकारी दिएका छन् ।

‘उनीहरूलाई मलाइ खोजिरहेका छन्, जहाँ भेट्यो त्यही मार्छु भन्दैछन्,’ उनले भने, ‘स्ववियु निर्वाचनमा नेविसंघलाई हराएको भनेर ममाथि आक्रमण गर्न कोठामा उनीहरू आएका थिए । मलाई नभेटेपछि फोनबाट ज्यान मार्ने धम्की दिएकाले न्यायका लागि प्रहरी कार्यालय पुगेको हुँ ।,’ उनले उत्पन्न घटनाबाट आफ्नो श्रीमती मानसिक तनावमा रहेको बताए ।

पीडक भनिएका पौडेलले धितालको डेरामै पुगेको र ज्यान मार्ने धम्की पनि दिएको स्वीकार गरे । तर, डेरामा पुगेर पीडित महिलालाई कुनै गलत नगरेको पौडेलले बताएका छन् । ‘म आवेगमा भएकाले डेरामा धिताललाई खोज्दै पुगेको हुँ । बाहिरबाटै त्यसलाई बाहिर निकाल भनेको पनि हुँ । कोठामा महिला मात्रै भएकाले म फर्किएको हो, महिलालाई गलत केही भनेको छैन’, पौडेलको दाबी छ । आफूले फोनबाट ज्यान मार्ने धम्की आवेगमा आएर दिएको तर, नियत भने त्यस्तो नभएको पौडेलको स्वीकारोक्ति छ ।

‘मैले फोनमा आवेगमा आएर बोलेको हुँ, रिसको बेला अनायासै भन्न आउँदो रहेछ । तर, नियत त्यस्तो थिएन,’ पौडेलले भने । उनले स्ववियु निर्वाचनको बेला आफू बुथ प्रतिनिधि रहेको र धितालले होच्याउने तरिकाले बोलेपछि रिस उठेको बताए । ‘मेरो अंकललाई मेरो बारेमा सोधेर होच्याउने गरी धितालले बोलेको हो । मैले आफ्नो काम गरिरहँदा होच्याउने गरी बोलेपछि रिस उठेको हो,’ पौडेलले भने ।

आफूलाई होच्याउने गरी बोलेर धिताल आफ्नो घर पनि आएको उनको दाबी छ । ‘पहिला मेरो घर आएको रहेछ । त्यसपछि उसलाई खोज्दै कोठामा पुगेको हुँ, भागेर हिँडिरहेको थियो,’ उनले भने । ज्यान मार्ने सम्मको धम्की दिएपछि पनि प्रहरी भने मिलापत्र गराउन लागिपरेको खुलेको छ । हटियास्थित प्रहरी चौकीले घरमै रहेका आरोपीहरूसमेत पक्राउ गर्न नसकेको पीडक धितालले बताए ।

मकवानपुरका प्रहरीप्रमुख प्रहरी उपरीक्षक वामदेव गौतमले घटनाबारे अनुसन्धान भइरहेको जानकारी दिए । किटानी जाहेरी परेको र घटनाको सत्यतथ्य बुझ्ने कार्य प्रहरीबाट भइरहेको भन्दै प्रहरीले मिलापत्र गराउन खोजेको बुझिएको छ । ‘किटानी जाहेरी आउने बितिक्कै समातिहाल्ने हैन, घटना हो वा होइन भनेर निर्क्याैल भएपछि समातिन्छ । उहाँहरू दुवै पक्षले आज प्रहरी कार्यालय आएर मिलापत्र गर्ने कुरा छ,’ गौतमले भने ।

प्रकाशित मिति: आइतबार, चैत १२, २०७९ १०:३८