अल्पमतमा खगराज, ‘वेटिङ मुख्यमन्त्री’को सुझाव– मार्गप्रशस्त गर्नुस्

A+ A A-

माओवादी केन्द्र सरकारबाट बाहिरिएसँगै गण्डकीका मुख्यमन्त्री खगराज अधिकारी अल्पमतमा परेका छन् । शुक्रबार माओवादीले समर्थन फिर्ता लिएसँगै अब मुख्यमन्त्री अधिकारीले ३० दिनभित्र संसदबाट विश्वासको मत लिनुपर्छ ।

राजनीतिमा कुनै उथलपुथल नभए अब वैशाख १० भित्र गण्डकी प्रदेशले नयाँ मुख्यमन्त्री पाउने छ । मुख्यमन्त्री अधिकारीले विश्वासको मत पाउने अवस्था नभएकाले संविधानको धारा १६८(३) अनुसार ठूलो दलको नेताको हैसियतले कांग्रेस दलका नेता सुरेन्द्रराज पाण्डे स्वतः मुख्यमन्त्री बन्ने छन् ।

‘वेटिङ मुख्यमन्त्री’ पाण्डे हालका मुख्यमन्त्री अधिकारीले मार्गप्रशस्त गर्नुपर्ने बताउँछन् । कांग्रेसले शनिबार पत्रकार सम्मलेन गरेर माओवादी बाहिरिएसँगै सरकार अल्पमतमा परेको र विश्वासको मत पाउने सम्भावना नभएको भन्दै अधिकारीलाई मार्ग प्रशस्त गर्न सुझाएको छ । ‘अल्पमतमा परेको र बहुमत जुटाउने सम्भावना पनि नरहेको अवस्थामा जतिसक्दो छिटो मार्गप्रशस्त गर्नु नै प्राकृतिक हुनेछ, प्रदेशको हितमा हुनेछ,’ पाण्डेले भने । कामचलाउ सरकार भएकाले आर्थिक दायित्व थुपार्ने, सरुवा–बढुवाका काम नगर्न मुख्यमन्त्री अधिकारीलाई पाण्डेको सुझाव छ ।

गण्डकीमा कांग्रेसका २७, एमालेका २२, माओवादीका ७ (सभामुखबाहेक), राप्रपाका २ र एकजना एकीकृत समाजवादी प्रवेश गरेका स्वतन्त्र निर्वाचित सांसद छन् । ६० सदस्यीय प्रदेशसभामा बहुमतका लागि ३१ सांसद चाहिन्छ । तर एमाले र राप्रपाका गरेर अहिले मुख्यमन्त्रीलाई २४ जनाको साथ छ ।

राप्रपाले पनि १३ फागुनमा संघ र प्रदेश सरकारलाई दिएको समर्थन फिर्ता लिने निर्णय गरेको थियो । निर्णय भए पनि पछि पार्टी नेतृत्वले एमालेले नेतृत्व गरेको प्रदेशमा तत्काल फिर्ता नलिने निर्देशन दिएपछि राप्रपाले मुख्यमन्त्रीलाई दिएको समर्थन फिर्ता लिएको थिएन ।

माओवादीले गत २५ पुसमा सरकार गठन गर्दा र २९ पुसमा मुख्यमन्त्री खगराज अधिकारीले विश्वासको मत लिँदा साथ दिएको थियो । राष्ट्रपति निर्वाचनमा केन्द्रमा समीकरण फेरिएसँगै एमाले नेताले नेतृत्व गरेको प्रदेश सरकारबाट माओवादी बाहिरिएको हो ।

सरकारमा संलग्न माओवादीका दुई जना मन्त्रीले मुख्यमन्त्री अधिकारीसमक्ष शुक्रबार साँझ राजीनामा बुझाएका छन् । माओवादी दल नेता एवं भौतिक पूर्वाधार विकास तथा यातायात व्यवस्था मन्त्री हरिबहादुर चुमान र उद्योग, पर्यटन वन तथा वातावरण मन्त्री रेशमबहादुर जुग्जालीले शुक्रबार राजीनामा दिएका हुन् ।

एजेण्डामा कुरा नमिलेर केन्द्रमा समीकरण फेरिएपछि आफूहरु पनि सरकारबाट बाहिरिनु स्वाभाविक भएको माओवादी दल नेता चुमान बताउँछन् । ‘समृद्धिका एजेण्डामा दृढतापूर्वक अघि बढ्न चाहन्छौं । यही विषयमा केन्द्रमा मत विभाजित हुन थाल्यो,’ चुमानले भने, ‘मत नमिलेपछि केन्द्रकै प्रभाव प्रदेशमा पर्‍यो । त्यसैले नयाँ गठबन्धन बनाउनुपर्‍यो ।’

कांग्रेस दल नेता पाण्डे छिटोछिटो राजनीतिक मोर्चाबन्दी फेरबदल हुनु मुलुकलाई आवश्यक राजनीतिक स्थिरताका लागि हितकार नभएको बताउँछन् । तर, निर्वाचनपछि पनि एकजुट हुने भनेर कांग्रेस–माओवादीले गरेको वाचा अनुकूल अहिलेको नयाँ गठबन्धन रहेको उनको भनाइ छ । ‘सम्पन्न राष्ट्रपतिको निर्वाचनपछि फेरिएको राजनीतिक समीकरणले भने हामीले निर्वाचनको समयमा जनतासँग गरेका प्रतिबद्धता र वाचा अनुकूल छ,’ उनले भने, ‘निर्वाचनपछि केही समय ‘लिक’ बाहिर पुगेको राजनीति ‘लिक’मा प्रवेश गरेको महसुस गरेका छौं ।’

यसअघि कांग्रेसकै कृष्णचन्द्र नेपाली मुख्यमन्त्री रहँदा सघाएको भन्दै अहिले मुख्यमन्त्रीमा माओवादीको पनि दाबी छ । तर, अब ठूलो दलको नेता मुख्यमन्त्री बन्ने व्यवस्था संविधानले गरेकाले तत्काल माओवादीले मुख्यमन्त्री पाउने छैन । तर, आलोपालो सरकारको नेतृत्व भएमा पाण्डेले छोडेपछि माओवादीले पछि मुख्यमन्त्री पाउन सक्छ ।

प्रकाशित मिति: शनिबार, चैत ११, २०७९ १६:५८