बेल्जियममा ‘नेपाल महोत्सव गरिँदै, बेल्जियमकी राजकुमारी र प्रधानमन्त्रीलाई निमन्त्रणा

बेल्जियममा ‘नेपाल महोत्सव गरिँदै, बेल्जियमकी राजकुमारी र प्रधानमन्त्रीलाई निमन्त्रणा

A+ A A-

गैरआवासीय नेपाली संघ (एनआरएनए) बेल्जियमले नयाँ वर्ष २०८० को उपलक्ष्यमा आगामी २ वैशाखमा बेल्जियमको लुभेनमा ‘नेपाल महोत्सव २०२३’ आयोजना गर्ने भएको छ ।

उक्त महोत्सव बेल्जियम र यसका आसपासका देशहरूमा नेपाली कला, संस्कृति, मौलिक खाना, पर्यटन प्रर्वद्धन र नेपाली उत्पादनको प्रचार–प्रसार गर्ने उद्देश्यले गर्न लागिएको गैरआवासीय नेपाली संघ बेल्जियमका अध्यक्ष खड्गबहादुर केसीले जानकारी दिए ।

अध्यक्ष केसीले नेपाल महोत्सव संघको स्थापनाकालदेखि नै आयोजना गर्ने गरिएको हुँदा यो संघको वार्षिक कार्यक्रम अन्तर्गत नै पर्ने र यो महोत्सवले नेपालको मौलिक पहिचानलाई युरोपमा प्रचारप्रसार गर्न ठूलो मद्दत पुग्ने बताए ।

अध्यक्ष केसीका अनुसार महोत्सव लुभेन शहरको ट्रेन स्टेशन अगाडि मारटेलारेनप्लेनको खाली ठाउँमा हुने र उक्त स्थानमा नेपाली मौलिक खानाका विभिन्न परिकारहरू, नेपालको पर्यटकीय क्षेत्रको प्रचारप्रसारका लागि पर्यटन सूचना केन्द्र, नेपालमा उत्पादित हस्तकला लगायत अन्य बस्तुहरूको गरी करिब एक दर्जन स्टलहरू राखिने छन् ।

महोत्सवको अवलोकन र सहभागिताका लागि बेल्जियमकी राजकुमारी, प्रधानमन्त्री, परराष्ट्रमन्त्री, उप–प्रधानमन्त्री तथा मन्त्री, बेल्जियमका केही नगरपालिकाका मेयरहरू, युरोपियन युनियनका सांसद तथा पदाधिकारी, दक्षिण एसियाका कूटनीतिक नियोगका प्रमुखहरूलगायत संघका केन्द्रीय पदाधिकारीहरूलाई आमन्त्रण गरिएको अध्यक्ष केसीले बताए ।

बेनेलुक्स (बेल्जियम, नेदरल्याण्ड र लक्जम्वर्र्ग) का लागी नेपाली राजदूत गेहेन्द्र राजभण्डारीले नेपाल महोत्सव नेपाली मौलिकता प्रदर्शन गर्ने एउटा मुख्य माध्यम भएकोले यस प्रकारका कार्यक्रमले नेपाल र नेपालीहरूको पहिचान, प्रचारप्रसार र प्रबर्धन गर्नमा ठूलो भूमिका निर्वाह गर्ने बताए ।

राजदुत राजभण्डारीले महोत्सवको पूर्ण सफलताका लागि दूतावासको तर्फवाट समन्वय, प्रचारप्रसार र सहयोगसमेत गरेको जानकारी दिए । उनले महोत्सवमा बेल्जियमलगायत छिमेकी देशका कूटनीतिक नियोगका प्रमुखहरूको सहभागिता गराउन आफूहरूले समन्वय गरेको पनि बताए ।

गैरआवासीय नेपाली संघ बेल्जियमले महोत्सवलाई सफल रुपले सम्पन्न गर्न बेल्जियमका सबै नेपाली संघसंस्थाका प्रमुख, संघका पूर्व अध्यक्ष, केन्द्रीय पदाधिकारी तथा सदस्यहरूलाई मुल आयोजक समिति सदस्य निर्माण गरेको छ भने बेल्जियमका लागि नेपाली दूतावास, लुभेन नगरपालिका, मुण्डमुभ्स र एक्टिभ इन्टरकल्चरल फेडेरेशन (एआईएफ) बीच सहकार्य गरिएको छ ।

महोत्सवमा विभिन्न जातीय पोषाकसहति नेपाली परम्पराको झाँकी प्रस्तुत गरिने छ । महोत्सवमा नेपाली कलाकारको पनि प्रस्तुति रहने छ ।

प्रकाशित मिति: शनिबार, चैत ११, २०७९ १५:३९