बारा–२ मा उपेन्द्रलाई राेक्न खटिए सीके राउत, लाेसपाले के गर्ला ?

A+ A A-

बारा निर्वाचन क्षेत्र नम्बर–२ मा हुन लागेको उपचुनावका लागि राजनीतिक दलहरू सक्रिय भएका छन् । जनता समाजवादी पार्टी (जसपा)बाट निर्वाचित रामसहायप्रसाद यादव उपराष्ट्रपति बनेपछि खाली बनेकाे बारा–२ मा उपचुनाव हुन लागेकाे हाे ।

यसअघि ४ मंसिरमा भएकाे चुनावमा सप्तरी २ बाट जनमत पार्टीका अध्यक्ष उपेन्द्र यादवसँग हारेका जसपा अध्यक्ष उपेन्द्र यादव बारा–२ बाट चुनाव लड्ने तयारीमा छन् । तर अन्य मधेसकेन्द्रित पार्टीले भने अध्यक्ष यादवलाई रोक्न चुनावी मोर्चा बनाउन थालेका छन् ।

वैशाख १० गते हुने उपनिर्वाचनका लागि जनमत र लोकतान्त्रिक समाजवादी पार्टी (लोसपा)ले माेर्चा बनाउने तयारी गरेका छन । लोसपा कार्यकारिणी समितिको बिहीबार बसेको बैठकले उपचुनावका लागि दल दर्ता गर्ने र चुनावको तयारी थाल्ने निर्णय गरेको छ ।

मधेसको गढ रहेको बारामा उपचुनावको तयारी लोसपाले गर्नु स्वभाविक रहेको पार्टीका वरिष्ठ नेता शरतसिंह भण्डारीले बताए । लोसपा मधेसकेन्द्रित दल रहेकाले उपचुनावमा उम्मेदवारी दिने तयारी भएको बताउँदै उनले भने, ‘मंसिर महिनामा सम्पन्न भएको निर्वाचनमा लोसपा कांग्रेस, माओवादी र नेकपा एससहितको गठबन्धनमा थियो । त्यही गठबन्धन पुन: सक्रिय बनाउने विषयमा छलफल भइरहेको छ ।’

गत निर्वाचनमा जसपाको एमालेसित गठबन्धन थियो भने जनमत पार्टीले एक्लै चुनाव लडेको थियो । जसपाबाट अध्यक्ष यादवले उपचुनाव लड्ने लगभग निश्चित छ । जसपाका नेता, कार्यकर्ताहरू चुनावमा जुटिसकेका छन् ।

जनमत पार्टीका अध्यक्ष सीके राउतले बुधबार पार्टी प्रवेश कार्यक्रमलाई सम्बोधन गर्दै यादवको चर्को आलोचना गरेका थिए । अध्यक्ष राउतले बारा–२ मा बाराकै बासिन्दाले चुनाव लड्नुपर्ने र कुनै बाहिरियालाई चुनाव जित्न नदिन कार्यकर्तालाई आह्वान गरेका थिए ।

प्रकाशित मिति: शुक्रबार, चैत १०, २०७९ १३:०२