आईजीपीका लागि कुँवर, थापा र ज्ञवालीको तीव्र लविङ

A+ A A-

नेपाल प्रहरीको महानिरीक्षक (आईजीपी) बढुवा गर्ने गरी आज अपराह्न ४ बजे मन्त्रिपरिषद् बैठक बस्दैछ । बिहीबार बस्ने नियमित बैठकलाई सारेर आईजीपी नियुक्त गर्न शुक्रबार मन्त्रिपरिषद् बैठक बस्न लागेको हो ।

हालका आईजीपी धीरजप्रताप सिंहले प्रहरी नियमावली, २०७१ मा रहेको ३० वर्षे सेवा अवधिका कारण शुक्रबार राति १२ बजेपछि अनिवार्य अवकाश पाउँदैछन् । गत वैशाखमा आईजीपी नियुक्त भएका सिंहले ११ महिना प्रहरी संगठन हाँके ।

सरकारले पाँच जना एआईजीपीमध्ये एक जनालाई आईजीपीमा बढुवा गर्नेछ । ६ चैतमा डीआईजीबाट एआईजीपीमा बढुवा भएका वसन्तबहादुर कुँवर, टेकप्रसाद राई, दीपक थापा, श्यामलाल ज्ञवाली र किरण बज्राचार्यमध्ये एक जना प्रहरीको ३०औँ आईजीपी हुनेछन् ।

उनीहरूले दुई दिनअघि मात्रै एआईजीको दर्ज्यानी चिह्न लगाएका थिए । आईजीपीको दौडमा रहेका पाँच जनामध्ये वसन्तबहादुर कुँवर, दीपक थापा र श्यामलाल ज्ञवालीको चर्चा बढी छ ।

कुँवरलाई आईजीपी बढुवा गर्न नेपाली कांग्रेसका केही नेताहरूको दौडधुप तीव्र छ । त्यस्तै, दीपक थापा र श्यामलाल ज्ञवालीलाई आईजीपी बनाउन माओवादी केन्द्रका दोस्रो तहका नेताहरू सक्रिय रहेको माओवादी केन्द्रका एक नेताले शिलापत्रलाई बताए ।

प्रधानमन्त्री कार्यालय स्रोतकाअनुसार पनि आईजीपीका लागि कुँवर, थापा र ज्ञवालीको नाम चर्चामा छ । आईजीपीको प्रतिस्पर्धामा रहेका कुँवर तत्कालीन गण्डकी प्रदेश प्रमुख रहेका बाबुराम कुँवरका सहोदर भाइ हुन् ।

बाबुराम कांग्रेसका तत्कालीन सभापति सुशील कोइराला प्रधानमन्त्री हुँदा महान्यायाधिवक्ता थिए । त्यस्तै, ज्ञवाली माओवादी केन्द्रका प्रवक्ता कृष्णबहादुर महरामार्फत आईजीपीको लविङमा छन् । माओवादी केन्द्रका अध्यक्षसमेत रहेका प्रधानमन्त्री पुष्पकमल दाहाल प्रचण्डसमेत ज्ञवालीलाई आईजीपी बढुवा गर्न सकारात्मक देखिएको स्रोतको दाबी छ । ज्ञवाली नागरिकता र शैक्षिक प्रमाणपत्रमा परेको जन्ममितिको अन्तरले विवादमा परेका थिए । उनीमाथि अनुसन्धान गर्न अख्तियार दुरुपयोग अनुसन्धान आयोगले गृह मन्त्रालयलाई पत्राचार गरेको थियो ।

तर, गृह मन्त्रालयको छानबिनले भने नागरिकतामा वर्षमात्रै कायम रहेको र शैक्षिक प्रमाणपत्रमा वर्ष महिना खुलेको कारण कुनै कैफियत नदेखिएको जनाएको छ । थापासमेत प्रधानमन्त्रीपुत्री रेनु दाहालमार्फत आईजीपीको लविङमा छन् । उसो त एआईजी टेक प्रसाद राई र किरण बज्राचार्यले समेत तीव्र लविङ थालेका छन् ।

प्रकाशित मिति: शुक्रबार, चैत १०, २०७९ १३:०५