मुस्लिम समुदायको पवित्र रमजान शुक्रबारदेखि

फाइल तस्वीर ।

A+ A A-

इस्लाम धर्मावलम्बीको सबभन्दा ठूलो पर्व रमजान रोजा शुक्रबारदेखि सुरु हुँदै छ । खाडी मुलुक सउदी, कतारलगायतका देशहरूमा बिहीबारदेखि नै सुरु भए पनि नेपाल, भारत, पाकिस्तान, बगंलादेशलगायत दक्षिण एसियामा शुक्रबारदेखि रोजा हुँदै छ ।

बिहीबार साँझ चन्द्रमा देखेपछि जनकपुरसहित नेपालभरिका मुस्लिम सामुदाय शुक्रबारदेखि रोजा बस्नेछन् । रोजा (व्रत) हरेक मुस्लिम सामुदायका बालिग महिला तथा पुरुषमा अनिर्वाय गरिएको छ । इस्लाम धर्मका पाँच अधारस्तम्भ इमान, नवाज, रोजा, जकात, हजमध्ये रोजा एक हो । इस्लामिक महिना सवाण समाप्त भई रमजानको पहिलो चन्द्रमा देखेपछि रमजान सुरु हुन्छ ।

रमजान महिनाभर ३० दिनसम्म मुस्लिम समुदय रोजा गर्छन् । रोजामा मुस्लिम समुदायका महिला तथा पुरुष दिनभर केही नखाइ व्रत बस्छन् । रोजा बस्नेहरूले सूर्य उदाउनुअघि र सूर्य अस्ताएपछि मात्र अन्नजल ग्रहण गर्छन् ।

इस्लामिक धर्मग्रन्थअनुसार रोजा दुई हिजरी सवाण (महिना) को १० तारिकदेखि मुस्लिम समुदायमाथि फर्ज अर्थात् अनिर्वाय गरिएको छ । इस्लामिक धार्मिक गुरुहरूका अनुसार अहिले १४औँ हिजरी चलिरहेको छ । दिनभर मजदूरि गर्नेदेखि राजा महाराजासम्मले रोजा गर्नुपर्ने इस्लामिक मान्यता छ । महिला पुरुष दुवै बालिग मुस्लिममाथि रोजा अनिर्वाय गरिएको मौलना अहमद हुसैन बताउँछन् ।

‘ऐ इमानबला तिमीमाथि रोजा अनिर्वाय गरिएको छ । जस्तो कि तिम्रो अग्रजहरूमाथि अनिवार्य गरिएको थियो । यसलाई तिमीले पनि अपनाउनुपर्ने हुन्छ,’ पवित्र कुरआन सरिफ उल्लेख रहेको हुसैन बताउँछन् ।

रमजानको मुस्लिम समुदायमा विशेष महत्त्व छ । अन्य महिनाभन्दा रमजानमा उपवास तथा दान गर्दा ७० गुणा बढी सवाव (पुण्य) प्राप्ति हुने जनविश्वास छ । रमजानकै २७ तारिकमा पवित्र कुरआन सरिफ नाजिल (अवतरित) भएको मोफ्ती असरफ राजा बरकाती बताउँछन् ।

यसै महिनामा साढे सात तोला सुन वा साढे ५२ तोला चाँदी तथा त्यति बराबरको सम्पत्ति भए गरिब विपन्नहरूलाई अनिवार्य रूपमा जकात अथार्त दान गर्न साढे दुई प्रतिशतका दरले रकम निकाल्नुपर्ने हुन्छ । यसले गरिब र अशक्तहरूका लागि केही गरौँ भन्ने सन्देश दिने गरेको छ ।

रमजानभर मुस्लिम समुदाय अल्लाहप्रति समर्पित भइ डर तथा नैतिकताको घेराभित्र मनलाई राख्दै धार्मिक तथा समाजलाई भलो हुने काममा तल्लीन हुन्छन् । एक महिनासम्म रोजा बसेपछि इदुल फित्र अथार्त ईद मनाइन्छ ।

प्रकाशित मिति: बिहीबार, चैत ९, २०७९ २०:०१