सवारीसाधन लिलाम नहुँदा करोडौँ राजस्व गुमाउँदै जनकपुर भन्सार, चोरी भए महत्त्वपूर्ण पार्टस्

सवारीसाधन लिलाम नहुँदा करोडौँ राजस्व गुमाउँदै जनकपुर भन्सार, चोरी भए महत्त्वपूर्ण पार्टस्

A+ A A-

विभिन्न समयमा चोरी पैठारीमा संलग्न ७ सय सवारीसाधन प्रहरीले जनकपुर भन्सार कार्यालयलाई बुझाए पनि समयमा लिलामी नगर्दा ती सवारीसाधनहरू काम नलाग्ने हुन थालेका छन् ।

प्रहरीले भन्सारलाई बुझाएका ६८० मोटरसाइकल, आठ वटा तीन पाङ्ग्रे टेम्पु र १२ पिकअफ भ्यान गरी ७ सय सवारिसाधनहरू लिलाम हुन सकेको छैन । ती सवारीसाधानहरू भन्सार परिसरमा यत्रयत्र राखिएकोले घाम र पानिमा खिया लागेर नष्ट हुन थालेका छन् । जसका कारण कार्यालयले करोडौँ राजस्व गुमाउने देखिएको छ ।

खुला अकाशमुनि राखिएका ती सवारीसाधनका महत्त्वपूर्ण पार्टस्‌हरू चोरी हुने गरेका छन् । त्यसमा कर्मचारी र सुरक्षार्थ खटिनेहरूको संलग्नता हुने गरेको स्थानीयको आरोप छ । राखिएका प्रायः सबै सवारीसाधनहरू हेर्दा कुनै न कुनै पार्टस् चोरी भएको देखिन्छ । केही दिन मात्रै चलेर पक्राउ गरिएका कतिपय मोटसाइकलका चक्का, टायरलगायतका समानहरू चोरिएका छन् । कतियमा भने पुरानो मोटरसाइकलका समान लगाइएको छ ।

कतिपय रिपेयरिङ पसलहरूले त्यहाँ राखिएका मोटरसाइकलका पार्टस् ल्याउने गरेको स्थानीयको आरोप छ । मोटरसाईकल मर्मत गर्ने एक मेकानिक भन्छन्, ‘भन्सार कार्यालयमा राखिएका मोटरसाइकलदेखि अन्य सवारीसधानहरू ठीक हुँदैनन् । त्यहाँका अधिकांश मोटरसाइकलको महत्त्वपूर्ण समान पहिला नै बिक्री भइसकेको हुन्छ ।’

भन्सारमा राखिएका सवारीसाधन ।

२०७७ पुसयता कुनै पनि सवारीसधानहरूको लिलाम हुन नसकेको भन्सार प्रमुख केशवराज ओली बताउँछन् । लिलामी प्रक्रिया झञ्झटिलो भए पनि निकट भविष्यमै ती साधनहरू लिलाम गर्न सूचना निकालिने उनको भनाइ छ । लिलामि गर्न केन्द्रीय कार्यालयलाई परिपत्र गरिसकेको उनले जानकारी दिए ।

ती सवारीसधानहरू चोरी पैठारीमा प्रयोग हुँदै आएको र प्रहरीले विभिन्न मितिमा पक्राउ गरी भन्सार कार्यालयलाई बुझाएको हो ।

जनकपुर भन्सारको चालु आर्थिक वर्षमा पनि लक्ष्य पूरा हुनेमा शंका

गत वर्ष राजस्व लक्ष्य पूरा गर्न नसकेको जनकपुर भन्सार कार्यालयलाई चालु आर्थिक वर्षमा पनि लक्ष्य पूरा गर्न धौधौ हुने देखिएको छ ।

कार्यालयले यस वर्ष ४९ करोड ४४ लाख ५२ हजार लक्ष्य पाएकोमा फागुन मसान्तसम्म २२ करोड ७ लाख ४४ हजार ९ सय ७५ रुपैयाँ राजस्व असुली गरेको छ । चालु आर्थिक वर्षको ८ महिनामा भन्सार कार्यालयले ५० प्रतिशत पनि राजस्व संकलन गर्न नसकेको छैन ।

गत वर्ष कार्यालयको वार्षिक लक्ष्य ४८ करोड ५५ लाख ९२ हजार रहेकोमा २२ करोड ७१ लख ४३ हजार मात्र राजस्व असुली गरेको थियो । गत वर्ष कार्यालयले लक्ष्यभन्दा २५ करोड ४४ लाख ९ हजार कम राजस्व असुली गरेको थियो ।

कार्यालयका प्रमुख भन्सार अधिकृत केशवराज ओली भने सीमावर्ती क्षेत्रमा कडाई गरिएकोले आगामी ४ महिनामा लक्ष्य पूरा हुने दाबी गर्छन् । सीमावर्ती क्षेत्रमा हुने तस्करी र चोर पैठारीका कारण वार्षिक लक्ष्य पूरा हुन नसकेको स्थानीय व्यापारीहरूको भनाइ छ ।

प्रकाशित मिति: बुधबार, चैत ८, २०७९ २०:१३