वर्ल्डलिंकमा दुई विदेशी संस्थाले गरे १ अर्ब ९८ करोड रुपैयाँ लगानी

A+ A A-

इन्टरनेट सेवा प्रदायक वर्ल्डलिंकमा दुईवटा विदेशी संस्थाले १ अर्ब ९८ करोड रुपैयाँ लगानी गरेका छन् । कम्पनीका लागि बिट्रिस इन्टरनेसनल इन्भेस्टमेन्ट (बीआईआई), बेलायत सरकारको विकास वित्त संस्था र प्रभावकारी लगानीकर्ता तथा डोल्मा इम्प्याक्ट फन्ड (डीआईएफ आईआई)ले उक्त परिमाणको लगानी गरेका हुन् ।

वर्ल्डलिंकले जनाएअनुसार कम्पनीले बिट्रिस इन्टरनेसनलइन्भेस्टमेन्ट (बीआईआई), बेलायत सरकारको विकास वित्त संस्था र प्रभावकारी लगानीकर्ताबाट ८.४ मिलियन डलर अर्थात् १ अर्ब ८ करोड नेपाली रुपैयाँ र डोल्मा इम्प्याक्ट फन्डबाट ६.९ मिलियन डलर अर्थात् ९० करोड नेपाली रुपैयाँबराबरको लगानी प्राप्त गरेको हो । यो लगानी नेपाली इन्टरनेट क्षेत्रमा सबैभन्दा ठूलो लगानी रहेको बताइएको छ ।

सन् २०१९ को अक्टोबरमा १२ मिलियन डलर अर्थात् १ अर्ब ३५ करोड नेपाली रुपैयाँबराबरको लगानी बिट्रिस इन्टरनेसनल इन्भेस्टमेन्टबाट कम्पनीले पाइसकेको छ । यसअघिको लगानी र हालको लगानी गरी कम्पनीमा बिट्रिस इन्टरनेसनल इन्भेस्टमेन्टको कुल लगानी २७.२ मिलियन डलर अर्थात् ३ अर्ब ३३ करोड रुपैयाँबराबर पुगेको छ ।

वर्ल्ड लिंक नेपालमा ७ लाख ५० हजारभन्दा बढी ग्राहकहरू भएको सबैभन्दा ठूलो निजीक्षेत्रको इन्टरनेट सेवा प्रदायक कम्पनी हो, जसले ग्रामीण क्षेत्रलाई केन्द्रित गरी देशभर इन्टरनेट विस्तारका गतिविधिहरूलाई गति दिने कार्य गरिरहेको छ ।

वर्ल्डलिंकमा हाल ५ हजार ५ सय कर्मचारीले रोजगारी पाएका छन् । कम्पनीमा पछिल्लो समयमा लगानी थप भएसँगै थप १ हजार रोजगारी सिर्जना गर्न र कर्मचारीहरूको सीप अभिवृद्धिका लागि तालिम प्रदान गर्न मद्दत पुग्ने कम्पनीले जनाएको छ ।

बिट्रिस इन्टरनेसनल इन्भेस्टमेन्ट र डोल्मा इम्प्याक्ट फन्डको लगानीले सीप विकास र तालिम कार्यक्रमहरू विस्तार गर्न तथा स्वास्थ्य र सुरक्षा मापदण्डको गुणस्तर अभिवृद्धिमा प्रगति हुने अपेक्षा गरिएको छ ।

कर्णालीका उच्च पहाडी र कम विकसित क्षेत्रहरूमध्येको एक तथा कठिन भौगोलिक अवस्था भए पनि वर्ल्डलिंकले फाइबर टु दि होम (एफटीटीएच) मार्फत सेवा दिन सफल भएको छ । साथै कम्पनीको इन्टरनेट सेवा छत्रकोट गाउँपालिका र रुरु गाउँपालिकाजस्ता देशकै विकट विभिन्न ग्रामीण भागमा समेत पुगेको छ । यस कम्पनीसँग हाल २० लाखभन्दा बढी होमपास (पोर्ट) को क्षमता छ ।

बिट्रिस इन्टरनेसनल इन्भेस्टमेन्ट र डोल्मा इम्प्याक्ट फन्डद्वारा प्रदान गरिएको पुँजीले इन्टरनेट विस्तारका गतिविधिहरूलाई तीव्र गतिमा अगाडि बढाइने कम्पनीले जनाएको छ । कम्पनीले साना तथा मझौला उद्यमी तथा घरपरिवारलाई भरपर्दो इन्टरनेट सेवा उपलब्ध गराउनेछ भने गुणस्तरीय इन्टरनेटले उद्यमहरूको विकासलाई मात्र होइन, अन्तर्राष्ट्रिय बजारसँग पनि जोड्ने विश्वास गरिएको छ ।

त्यस्तै, सर्वसाधारणका लागि सस्तो र गुणस्तरीय इन्टरनेटको पहुँचमा भएको सुधारले नेपालको आर्थिक वृद्धि र समग्र विकासमा योगदान पुर्‍याउने कम्पनीको विश्वास छ । यो संयुक्त राष्ट्र संघको दिगो विकासको लक्ष्यमध्ये एक पनि हो ।

वर्ल्डलिंकका अध्यक्ष तथा प्रबन्ध निर्देशक दिलीप अग्रवालले भने, 'हामीले यसमा गर्व मात्रै गर्दैनौँ कि लगानीकर्ताको विश्वासमा आँच आउन नदिने कुरामा पनि हामी प्रतिबद्ध छौँ । यो २७ वर्षको हाम्रो समर्पण र दूरसञ्चार क्षेत्रमा विश्वासको परिणाम पनि हो ।'

उनले थपे, 'बिट्रिस इन्टरनेसनल इन्भेस्टमेन्ट र डोल्मा इम्प्याक्ट फन्डले देखाएको हृदयपूर्ण सहायताले वर्ल्डलिंकलाई अन्तर्राष्ट्रियस्तरको कम्पनीमा रुपान्तरण गर्न मद्दत पुग्नेछ । यसले अन्य कम्पनीलाई पनि प्रेरित गरेर रोल मोडल बनाउन नेतृत्व गर्नेछ । यो साझेदारीले ‘जुनसुकै बेला र जहाँ पनि जडान’ गर्ने हाम्रो उद्देश्यलाई अभिप्रेरित गरेको छ र नेटवर्कको थप विस्तारका लागि गति दिन थप उत्साह प्रदान गरेको छ ।’

बिट्रिस इन्टरनेसनल इन्भेस्टमेन्टका प्राविधिक र टेलिकमका प्रबन्ध निर्देशक अभिनव सिन्हाले भने, 'हामी यसका अनुभवी संस्थापक र व्यवस्थापन टोलीको नेतृत्वमा वर्ल्डलिंकको विस्तार र प्रभावबाट प्रभावित भएका छौँ । हामीले सन् २०१९ देखि कम्पनीमा लगानी गरेसँगै उनीहरूले हजारौँ घरपरिवार र व्यवसायहरूलाई इन्टरनेटमा जोडेका छौँ । हाम्रो दोस्रो लगानीले वर्ल्डलिंकलाई नेपालमा भरपर्दो र सस्तो इन्टरनेट सेवाका साथमा थप कठिन क्षेत्रमा प्रवेश गर्न, थप रोजगारी र स्थानीय अर्थतन्त्रमा वृद्धिलाई प्रोत्साहन गर्ने अवसरहरू सिर्जना गर्न सहयोग गर्नेछ ।’

नेपालका लागि बेलायती राजदूत निकोला पोलिटले भनिन्, 'बिट्रिस इन्टरनेसनल इन्भेस्टमेन्टले विश्वव्यापी रूपमा इन्टरनेट पहुँच प्रदान गर्न प्रयासरत रहेको वर्ल्डलिंकलाई आफ्नो समर्थन जारी राखेको देख्दा म खुसी छु । नेपालमा दिगो आर्थिक विकासका लागि डिजिटल रुपान्तरण एक प्रमुख कारक हो र यस क्षेत्रका घरपरिवार र व्यवसायहरूलाई समर्थन गर्नेजस्ता लगानीहरू महत्त्वपूर्ण छ ।’

डोल्मा फन्ड म्यानेजमेन्टका संस्थापक र प्रमुख कार्यकारी अधिकृत (सीईओ) (डोल्मा इम्प्याक्ट फन्ड आईआईका प्रबन्धक) प्राध्यापक टिम गोचर ओबीईले भने, ‘छोटो अवधिको आर्थिक फड्को मार्ने नेपालको सबैभन्दा राम्रो मौका भनेको डिजिटल उद्योग हो । हामीले हाम्रो प्रविधि लगानीमा असाधारण वृद्धि देखेका छौँ, एआई सेवाहरूमा मात्र ५ हजारभन्दा बढी गुणस्तरीय रोजगारी छ ।'

उनले थपे, 'तर, यी कामहरू मुख्यतया शहरी क्षेत्रहरूमा मात्र सीमित छन्, जहाँ ब्रोडब्यान्ड छिटो र अधिक विश्वसनीय छ, वर्ल्डलिंकमा हाम्रो लगानी, हाम्रो साझेदारीले बिट्रिस इन्टरनेसनल इन्भेस्टमेन्टसँगसँगै रोजगारीहरूलाई थप क्षेत्रहरूमा पुर्‍याउन सक्षम बनाउनेछ । जसले गर्दा स्वास्थ्य, शिक्षा, वित्तीय र व्यापारदेखि अन्य सेवाहरूमा राम्रो पहुँच र विश्वव्यापी डिजिटल अर्थतन्त्रमा व्यापक सहभागिता हुनेछ ।'

प्रकाशित मिति: बुधबार, चैत ८, २०७९ १८:३०