मधेश सरकारले बजेट कटौती गरेपछि मन्त्रालयकै कामकाज प्रभावित

A+ A A-

मधेश प्रदेश सरकारले मातहतका मन्त्रालय तथा कार्यालयहरूको बजेट कटौती तथा रोक्का गरेपछि प्रदेश सरकारको कामकाज प्रभावित भएको छ ।

आर्थिक गतिविधि संकुचन भइ चालु आर्थिक वर्षमा लक्ष्यअनुसार राजस्व संकलन हुन नसक्ने, नेपाल सरकारबाट अनुदान तथा राजस्व बाँडफाँटबाट प्राप्त हुने आयमा समेत प्रभाव पर्ने देखिएकोले सार्वजनिक खर्चलाई २० प्रतिशत कटौती गर्न प्रदेश सरकारले मातहतका मन्त्रालय तथा कार्यालयहरूलाई निर्देशन दिएको छ ।

२३ माघमा बसेको प्रदेश मन्त्रिपरिषद्को निर्णयअनुसार चालु आर्थिक वर्षमा विनियोजित बजेटमध्ये खर्च भई बाँकी रहेको बजेटमा तत्काल २० प्रतिशत कटौती गरी पीएलएमबीआईएसमा प्रविष्टि संसोधन गरी अर्थ मन्त्रालयमा पठाउन निर्देशन दिएको थियो ।

आर्थिक समस्याका कारण सार्वजनिक खर्चलाई पुनः प्राथमिकीकरण गरी प्रदेश गौरव तथा रुपान्तरणकारी आयोजना तथा रोजगारी सिर्जनामा महत्त्वपूर्ण योगदान गर्ने योजना तथा कार्यक्रमका लागि स्रोत व्यवस्थापन गर्न, सार्वजनिक खर्चमा मितव्ययीता कायम गर्न तथा प्रदेश सरकारको वित्त सन्तुलन कायम गर्न सरकारले यस्तो निर्णय गरेको प्रदेशका अर्थ मन्त्रालयले जनाएको छ ।

प्रदेश सरकारको यस्तो निर्णयले मन्त्रालयको दैनिक कार्यसमेत प्रभावित भएको छ । प्रदेशस्थित कोष तथा लेखा नियन्त्रक कार्यालयले सबै मन्त्रालय तथा कार्यालयहरूको भुक्तानी रोक्का गरेको छ । कोलनिकाले चालु तथा पुँजीगतका सबै खर्च रोक्का गरेपछि प्रदेश सरकारमातहत रहेका मन्त्रालय तथा कार्यालयहरूको भुक्तानी ठप्प छ । मन्त्रालयहरूका क्रियाकलाप पनि माघदेखि नै ठप्प छन् ।

समाजिक विकास मन्त्रालयका एक कर्मचारी भन्छन्, ‘सरकारले बजेट रोक्का गरेपछि स्वास्थ्यसम्बन्धी दैनिक कार्यहरूसमेत प्रभावित भएको छ । कुनै समय अपर्झट खर्च गर्नुपर्दा उधारो गर्नुपर्ने बाध्यता छ ।’

प्रदेश सरकारले मसलन्द तथा कार्यालय समग्री, कार्यालय सञ्चालन, सेवा, सूचना पत्रपत्रिका र परामर्श सेवा, निर्मित भवन संचरना सुधार, सिप विकास तथा जनचेतना तालिम गोष्ठीसहित विभिन्न २७ वटा शीर्षकमा खर्च कटौती गर्न निर्देशन दिएको छ ।

चालु आर्थिक वर्षको ६ महिनाभन्दा बढी समय बितिसक्दा पनि प्रदेश सरकारको विकास बजेट खर्चको अवस्था कमजोर छ । अर्थ मन्त्रालयका एक कर्मचारी भन्छन्, ‘प्रदेश सरकारको विकास बजेटको खर्चको अवस्था यसै पनि कमजोर थियो । बजेट रोक्का गरेपछि प्रदेशले के विकास गर्छ ? विगतका वर्षहरूमा कुल बजेटको बढीमा ६० प्रतिशत मात्रै खर्च हुने गरेको देखिन्छ, काम अगाडि बढ्ने बेलामै बजेट रोक्का भएपछि बजेट कार्यान्वयको अवस्था विगतका वर्षहरूभन्दा यस वर्ष झन् न्युन हुने देखिन्छ ।’

प्रकाशित मिति: मंगलबार, चैत ७, २०७९ २०:५४