सञ्चार सचिव भन्छन्- नेपाल साइबर आक्रमणको प्रयास हुने देशहरूमा अग्र स्थानमा पर्छ

सञ्चार सचिव भन्छन्- नेपाल साइबर आक्रमणको प्रयास हुने देशहरूमा अग्र स्थानमा पर्छ

A+ A A-

सञ्चार तथा सूचना प्रविधि मन्त्रालयका सचिव डा. वैकुण्ठ अर्यालले नेपाल साइबर आक्रमणको प्रयास हुने देशहरूमा अग्र स्थानमा पर्ने बताएका छन् ।

मंगलबार दिगो विकास तथा सुशासन समितिको बैठकका अर्यालले साइबर सुरक्षासम्बन्धी नीति रहे पनि त्यसको सफल कार्यान्वयन हुन नसकेको बताए । साइबर सुरक्षा नीति अन्तिम चरणमा पुगेको र अब चाँडै नै मन्त्रिपरिषद्‌मा पठाउने तयारी रहेको उनले जानकारी दिए ।

'साइबर अट्याकको एटेम्प्ट हुने मुलुकमध्ये अग्रणी मुलुक हो । नेपाल अग्रणी मुलुकमा पर्छ । त्यसलाई समेत आकलन गरेर हामीले सुरक्षामा कम्प्रोमाइज गरेका छैनौँ,' अर्यालले भने, 'निर्देशिकाले मात्रै काम गर्छ कि गर्दैन ? भन्नेकुरा छ । अब भने एउटा पोलिसीले पनि गर्नेछ ।’

बैठकमा राष्ट्रिय सूचना प्रविधि केन्द्रका कार्यकारी उपनिर्देशक सफल श्रेष्ठले प्राविधिक विज्ञ कर्मचारीहरू प्रविधिको क्षेत्रमा सरकारी कोटामा ल्याउन नै कठिन अवस्था रहेको बताए । सरकारी तवरबाट दिने सेवा सुविधामा प्राविधिक विज्ञहरूलाई टिकाउन नै गाह्रो भएको उनको भनाइ छ ।

नेपाल दूरसञ्चार प्राधिकरणका अध्यक्ष पुरुषोत्तम खनालले सुरक्षा सामग्री खरिद गर्दा ग्लोबल टेन्डर नगरी विशेष प्रकारले खरिद गर्ने व्यवस्था हुनुपर्ने बताए । सुरक्षा सामग्री पूर्वजानकारी दिएर खरिद गर्नु नहुने उनको भनाइ छ ।

‘हामी जुन सुरक्षा सामग्री खरिद गर्छौं, हामी ग्लोबल टेन्डर गरेर । हाम्रो सुरक्षा सामग्री यस्तो ल्याउँदै छौँ भनेर प्रि इन्फर्म गरेर खरिद गर्छौं,' खनालले भने, 'यसलाई विशेष प्रकारले खरिद गर्ने व्यवस्था गर्नुपर्छ । कतिपय देशले आफ्नो डाटा सेन्टर नै थाहा दिँदैनन् । भोलि हाम्रो डाटा सेन्टरमा नै आक्रमण भयो भने सबै कुरा जान्छ । हामी त्यतातर्फ ध्यान दिनुपर्छ ।'

प्रकाशित मिति: मंगलबार, चैत ७, २०७९ १६:०१