आईएमई लाइफ इन्स्योरेन्स कम्पनीको बीमाकोष २२.३१ प्रतिशतले वृद्धि

A+ A A-

आईएमई लाइफ इन्स्योरेन्स कम्पनीको बीमाकोष २२.३१ प्रतिशतले वृद्धि भएको छ ।

कम्पनीको हिजो सोमबार सम्पन्न छैटौँ वार्षिक साधारणसभामा सभाका सभापति डा. अर्यालले आर्थिक वर्ष २०७९/०८० को पुस मसान्तसम्मको अपरिस्कृत विवरणअनुसार बीमाकोष २२.३१ प्रतिशतले वृद्धि भई ५ अर्ब ४७ करोड ९४ लाख रुपैयाँ पुगेको जानकारी दिएका हुन् ।

साधारणसभा कम्पनीको सञ्चालक समितिका अध्यक्ष डा.रामहरि अर्यालको अध्यक्षतामा सम्पन्न भएको हो ।

सभामा डा. अर्यालले सर्वसाधारणका निमित्त शेयर जारी गर्न भइरहेको आन्तरिक तयारी पनि अन्तिम अवस्थामा पुगेको जानकारी दिँदै जीवन बीमा कम्पनीहरूमाझ अब्बल कम्पनीका रूपमा स्थापित गर्ने प्रतिबद्धता व्यक्त पनि व्यक्त गरे ।

त्यस्तै, सभाले आर्थिक वर्ष २०७८/०७९ को लेखापरीक्षकको प्रतिवेदनसहित वासलात, नाफा नोक्सान हिसाब, नगद प्रवाह विवरण र तत्‌सम्बन्धी अनुसूची तथा NFRS प्रणाली लागू गरी तयार गरिएको वित्तीय विवरणमाथि छलफल भई पारित पनि गरेको छ ।

त्यस्तै, सभाले संशोधित प्रबन्धपत्र तथा नियमावली अभिलेख गर्ने निकायबाट कुनै फेरबदलको निर्देशन प्राप्त भएमा सोहीअनुसार फेरबदल गर्न सञ्चालक समितिलाई अख्तियारी दिने प्रस्ताव पनि पारित गरेको छ । त्यस्तै, सर्वसाधारणलाई छुट्याइएको शेयर जारी गर्ने कार्यको सम्बन्धमा नियमनकारी निकायहरूबाट प्राप्त निर्देशन कार्यान्वयन गर्न सञ्चालक समितिलाई अख्तियारी दिने, कम्पनीको सञ्चालक समितिमा स्वतन्त्र सञ्चालक नियुक्तिसम्बन्धी प्रस्तावहरू पनि सो सभाले पारित गरेको छ ।

सभामा कम्पनीका प्रमुख कार्यकारी अधिकृत कवि फुयाँलले कम्पनीको प्रभावकारी आन्तरिक नियन्त्रण प्रणाली, सुशासन, मानव संसाधनको विकास एवं ग्राहक सेवाप्रति निरन्तर प्रतिबद्ध रहने बताए ।

प्रकाशित मिति: मंगलबार, चैत ७, २०७९ १२:२३