पुटिनले सीलाई भने– युक्रेन युद्ध अन्त्य गर्ने प्रिय मित्रको योजनाबारे छलफल गर्नेछौँ

पुटिनले सीलाई भने– युक्रेन युद्ध अन्त्य गर्ने प्रिय मित्रको योजनाबारे छलफल गर्नेछौँ

चिनियाँ राष्ट्रपति सी चिनफिङ र रुसी समकक्षी भ्लादमिर पुटिन (तस्बिर- रोयटर्स कनेक्ट)

A+ A A-

चीनका राष्ट्रपति सी चिनफिङ र रुसी समकक्षी भ्लादमिर पुटिनबीच मस्कोमा भेटवार्ता भएको छ । उक्त भेटवार्तामा पुटिनले सीलाई युक्रेन युद्ध अन्त्य गर्ने चीनको योजनाबारे छलफल हुने बताएका छन् । पुटिनले भनेका छन्,‘हामी वार्ता प्रक्रियाका लागि सधैँ तयार छौँ ।’

बीबीसीका अनुसार वार्ताका क्रममा दुवैले एकअर्कालाई प्रिय मित्र भन्दै सम्बोधन गरेका थिए । चीनले गत महिना मात्र रुस–युक्रेन युद्ध अन्त्य गर्न १२ बुँदे योजना सार्वजनिक गरेको थियो । सो योजनामा शत्रुता बन्द गर्ने र शान्ति वार्ता पुनः सुरु गर्ने विषय समावेश छ ।

भेटका क्रममा पुटिनले चीनले सँधै न्यायका सिद्धान्तहरू पालना गरेको र हरेक देशको लागि अविभाजित सुरक्षालाई जोड दिएकोमा चीनको प्रशंसा गरेका थिए । जवाफमा सीले भनेका थिए,‘तपाईंको बलियो नेतृत्वमा रुसले आफ्नो समृद्ध विकासमा ठूलो फड्को मारेको छ । म विश्वस्त छु कि रुसी जनताले तपाईंलाई आफ्नो दृढ समर्थन जारी राख्नेछन् ।’

सी सोमबार रुस पुग्न अगाडि पुटिनले चीनको पिपल्स डेली पत्रिकासँग दुई राष्ट्र अमेरिकी आक्रामक नीतिका कारण कमजोर बन्न नहुने उल्लेख गरेका थिए ।

उता अमेरिकी विदेश मन्त्री एन्टोनी ब्लिङ्कनले भने युद्धलाई आफ्नै स्वार्थको लागि स्थिर पार्न चीन वा अन्य कुनै पनि देशको सहयोगमा रुसले चालेको रणनीतिक कदमबाट विश्व झुक्किन नहुने बताएका छन् ।

उनी भन्छन्,‘युक्रेनी भूभागबाट रुसी सेनालाई हटाउनेबारे केही उल्लेख नगरी युद्ध विराम आह्वान गर्नुले रुसको जितलाई अनुमोदन गर्न बल पुर्‍याउने छ ।’

युक्रेनले हिजो सोमबार र सुरुदेखि नै शान्तिवार्ताका लागि रुसी सेनाले आफ्नो भूभागबाट सेना हटाउनुलाई मुख्य सर्तको रूपमा जोड दिएको छ । यद्यपि, चीनको योजनामा त्यसबारे केही पनि जनाइएको छैन ।

चीनको १२ बुँदे योजनामा सबै देशहरूको सार्वभौमसत्ताको सम्मान गरिनुपर्ने जनाइएको छ । सोमबार नै सीले सिन्ह्वामा प्रकाशित एक लेखमा युक्रेन द्वन्द्व अन्त्यको समाधान खोजिने बताएका थिए ।

हालै मात्र चीनकै मध्यस्थतामा इरान र साउदीबीच कूटनीतिक सम्बन्ध पुनर्स्थापना भएको थियो । त्यसयता देखि नै चीनले रुस–युक्रेन युद्ध अन्त्यको आह्वान गर्ने अनुमान चलेको थियो ।

चिनियाँ राष्ट्रपति सी नवौँपटक रुस भ्रमणका लागि मस्को पुगेका हुन् । तीनदिने भ्रमणका लागि रुस पुगेका उनी मंगलबार स्वदेश फर्किनेछन् । भेटका क्रममा चीन र रुसबीच अन्य व्यापारिक सम्झौताहरु पनि हुनेछन् । बीबीसी

प्रकाशित मिति: मंगलबार, चैत ७, २०७९ ११:१४