इलेक्ट्रिक ट्याक्सीमा किन आकर्षित भएनन् व्यवसायी ?

A+ A A-

बागमती प्रदेश सरकारको सन् २०८५ भित्र पेट्रोलियम सार्वजनिक सवारीसाधनलाई विद्युतीयले विस्थापित गर्ने नीतिबमोजिम पाइलट प्रोजेक्टको रूपमा २० वर्ष कटेका ट्याक्सी, नीलो माइक्रो र ग्यास टेम्पोलाई विद्युतीय ट्याक्सीमा सट्टाभर्ना थाल्यो ।

विद्युतीय ट्याक्सीमा सट्टाभर्ना गर्ने निर्णय २४ चैत २०७८ मा मन्त्रिपरिषद्ले गरेको थियो । उक्त निर्णयअनुसार उपत्यकामा सञ्चालित २० वर्ष पुराना ग्यास टेम्पो र नीलो माइक्रोले सट्टाभर्नाको रूपमा विद्युतीय ट्याक्सी नै लिनुपर्ने प्रावधान छ ।

सरकारले विद्युतीय ट्याक्सीलदाई प्रोत्साहन गर्ने नीति लिए पनि सोचेजस्तो सफल हुन सकेको छैन । हालसम्म जम्मा चारवटा २० वर्ष पुराना ट्याक्सीले विद्युतीय ट्याक्सीका लागि सट्टा भर्ना गरेको श्रम रोजगार तथा यातायात मन्त्रालय बागमतीका प्रवक्ता हरिहर पोखरेलले बताए ।

‘अहिलेसम्म चारवटाले विद्युतीय ट्याक्सीका लागि सट्टा भर्ना गरेका छन् । यो संख्या बिस्तारै बढ्छ,’ पोखरेलले भने ।

खर्चको हिसाबले पेट्रोल ट्याक्सीभन्दा विद्युतीय ट्याक्सी सस्तो रहेको विद्युतीय ट्याक्सीचालक तथा व्यवसायी रेशम दुलालले बताए । ‘विद्युतीय ट्याक्सी किन्न ३७ लाख परे पनि ८० प्रतिशत बैंकले फाइन्यान्स गर्ने रहेछ । त्यस्तै, पेट्रोल ट्याक्सीमा दिनको २/३ हजार खर्च हुन्थ्यो भने विद्युतीय ट्याक्सीमा दैनिक १ सय ५० देखि २ सयको मात्रै बिजुली खर्च हुने रहेछ,’ उनले भने ।

अहिले २००२/२००३ मोडलका करिब ३ हजार ५ सय ट्याक्सीको अवधि २० वर्ष पूरा भइसकेको छ । २० वर्ष कटे पनि ती ट्याक्सी चलिरहेका छन् । सरकारले बनाएको स्पेसिफिकेसनअनुसारको ट्याक्सी नेपालमा नभएका कारण व्यवसायीहरू पुरानो ट्याक्सी चलाउन बाध्य भएको नेपाल मिटर ट्याक्सी व्यवसायी तथा चालक सेवा समाजका महासचिव दिलीप श्रेष्ठले बताए ।

‘सरकारले बनाएको स्पेसिफिकेसनअनुसार बल्ल एउटा कम्पनीले गाडी ल्याएको छ । हामी विद्युतीय गाडी ल्याउन सकारात्मक छौँ तर विद्युतीय गाडी झण्डै १० लाख महँगो हुने भएकाले सरकारले केही सहुलियत दिनुपर्छ,’ उनले भने ।

यस्तो छ बागमती प्रदेशले बनाएको विद्युतीय ट्याक्सीको स्पेसिफिकेसन

श्रम, रोजगार तथा यातायात मन्त्रालय बागमतीले सट्टाभर्ना हुने ट्याक्सीलाई साधारण र विशेष प्रकृतिका गरी दुई प्रकारका स्पेसिफिकेसन बनाएको छ ।

साधारण ट्याक्सी ५ सिट क्षमता, अटोमेटिक ट्रान्समिसन, कम्तीमा २ सय लिटरको बुट स्पेस भएको, ३० वा सोभन्दा धेरै किलोवाटको मोटर, २० किलोवाट वा सोभन्दा धेरै क्षमताको लिथियम आयोन ब्याट्री, सेडान बडी टाइप, कम्तीमा १७० मिलिमिटरको ग्राउन्ड क्लियरेन्स, कम्तीमा २१० किलोमिटर रेन्ज, एयर ब्याग, जीपीएस सिस्टम, एबीएस, सेन्ट्रल लकिङ र रेयर भ्यु क्यामरा अनिवार्य हुनुपर्नेछ ।

त्यसैगरी, विशेष प्रकृतिका ट्याक्सीमा ५ देखि ७ सिट क्षमता, अटोमेटिक ट्रान्समिसन, कम्तीमा २५० लिटर बुट स्पेस, कम्तीमा ५० किलोवाटको मोटर, कम्तीमा ४० किलोवाट आवरको लिथियम आयोन ब्याट्री, सेडान वा भ्यान बडी टाइप, कम्तीमा १७५ मिलिमिटरको ग्राउण्ड क्लियरेन्स, डुअल एयर ब्याग, जीपीएस सिस्टम, कम्तीमा २७५ किलोमिटर रेन्ज, हिल असिस्ट, एबीएस र ईबीडी, सेन्ट्रल लकिङ, पार्किङ सेन्सर, रेयर भ्यु क्यामरा, एसी र साउन्ड सिस्टम हुनुपर्नेछ ।

प्रकाशित मिति: मंगलबार, चैत ७, २०७९ ०६:४४