युक्रेन युद्ध जारी रहँदा चिनियाँ राष्ट्रपति सी रुसको राजधानी मस्को पुगे

A+ A A-

चीनका राष्ट्रपति सी चिनफिङ तीन दिने रुस भ्रमणका लागि मस्को पुगेका छन् ।

सी भर्खरै राजधानी मस्को पुगेको रुसी समाचार संस्था तासले जनाएको छ । रुस र युक्रेनबीच युद्ध जारी रहेकै समयमा सी मस्को पुगेका हुन् । तेस्रोपटक राष्ट्रपति बनेपछि सीको यो पहिलो विदेश भ्रमण हो । राष्ट्रपतिका रूपमा सीले रुसको ९ औँ पटक भ्रमण गरेका हुन् ।

सीले पुटिनसँगको बैठकका क्रममा युक्रेन युद्धलाई रोक्न आह्वान गर्ने अनुमान छ । त्यसबाहेक चीन र रुसबीचको व्यापारको विषयमा पनि सम्झौताहरू हुनेछन् । रुसको नवौँ भ्रमणअगाडि मात्र राष्ट्रपति सी चिनफिङको एक लेख सिन्ह्वामा प्रकाशित भएको थियो जहाँ उनले रुस, युक्रेन द्वन्द्व र पश्चिमा राष्ट्रबारे आफ्नो धारणा राखेका थिए । सिन्ह्वाका अनुसार राष्ट्रपति सीले युक्रेनमा लामो समयदेखि जारी युद्ध अन्त्य गर्न आह्वान गरेका छन् ।

‘जटिल समस्याहरूको कुनै सरल समाधान छैन,’ सीले भनेका छन्, ‘हामी विश्वास गर्छौं कि जबसम्म सबै पक्षले सुरक्षाको साझा, व्यापक, सहयोगी र दिगो अवधारणालाई समर्थन गर्छन् र समान, तर्कसंगत तथा व्यावहारिक संवाद र परामर्शको पालना गर्छन्, हामी निश्चित रूपमा युक्रेनको संकट समाधानका लागि उचित मार्ग फेला पार्न सक्छौँ, जसले विश्वमा दिगो शान्ति र सार्वभौमिक सुरक्षा प्राप्त गर्ने बाटो देखाउँछ ।’

सो लेखमा सीले रुससँगको गहिरो राजनीतिक, कूटनीतिक र व्यापारिक सम्बन्धको पनि प्रशंसा गरेका थिए । उनले रुसको भ्रमणलाई मित्रता, सहयोग र शान्तिको यात्रा भनेका थिए । सीले आफ्नो लेखमा पश्चिमा राष्ट्रहरूलाई इंगित गर्दै विश्वव्यापी विकासलाई यतिबेला आधिपत्य जमाउने शक्ति र बदमासीले गहिरो चोट पुर्‍याएको पनि उल्लेख गरेका थिए ।सीएनएन